ሶሎሞነ ማቸታ
1 ካዎይ ሶሎሞነ ዳሮ አላጋ ቢታ ማጫሳታ ዶስስ። ሄሳት ግብፀ ካዋ ናኤፐ ሀራ ሞአበታ፥ አሞነታ፥ ኤዶመታ፥ ስዶናታነ ህተታ ማጫሳታ። 2 ጎዳይ እስራኤለ አሳስ፥ "ኤንቲ ህንተ ዎዛና ባለድ ባንታ ኤቃታኮ ዛርያ ግሾ ሀ አሳታራ ኤኮንነ ገሎን ዋላከቶፍተ" ያግድ ካሰ ኦድስ። ሽን ሶሎሞነ ኤንታ ሲቁዋን ቃሸትስ። 3 ሶሎሞነስ ካዎ ናአ ግድዳ ላፑን ፄቱ ማቸትነ ሄ ፄቱ ላገት (ቁባተት) ደኦሶና። ሄ ማቸት እያ ፆሳፈ ሃስዶሶና። 4 ሶሎሞነይ ጭምሸ ብያ ዎደ እያ ማቸት እያ ዎዛና ሀራ ፆሳታኮ ዛርዶሶና። እያ አዋ ዳዊቲ ኩመ ዎዛናን ጎዳስ ሃረትዳይሳዳ እ ባ ጎዳ ፆሳስ ሃረትቤና። 5 ሶሎሞነይ አስታሮቶ ጌተትያ ስዶናታ ፆሴስነ ሞሎካ ጌተትያ እፀትዳ አሞነታ ኤቃ ጎይንስ። 6 ሶሎሞነይ ጎዳ ስንን ኢታባ ኦስ፤ እያ አዋ ዳዊቲ ካልዳይሳዳ ጎዳ ፖሎ ካልቤና።
7 ሶሎሞነይ ካሞሻ እፀትዳ ኤቃስነ ሞሎካ ጌተትያ አሞነታ ኤቃስ የሩሳላመፐ ዉሎሀ ባጋን ደእያ ደረ ሁጰን ቃ ጎይኖ በሳታ ኬፅስ። 8 አላጋ ቢታፈ ኤክዳ ባ ማቸታስ ሄሳዳ ጊግስን፥ ኤንቲ ባንታ ኤቃታስ ያን እፃነ ጩይዶሶናነ ያርሾ ያርሽዶሶና።
9 እያዉ ናምኡ ቶሆ ቆንጭዳ ጎዳ እስራኤለ ፆሳፈ ሶሎሞነ ዎዛናይ ሃክዳ ግሾ፥ ጎዳይ እያ ሀንቀትስ። 10 ሀራ ፆሳታ ካሎናዳ ጎዳይ ሶሎሞነ ኪትስ፥ ሽን ሶሎሞነይ ጎዳ ኪታ ናግቤና። 11 ሄሳ ግሾ፥ ጎዳይ ሶሎሞነኮ፥ "ኔኒ ሀይሳዳ ሀንዳ ግሾነ ታ ጫቁዋነ ታ ዎጋ ነ ናጎና ግሾ ታኒ ነ ካዎተ ኔፐ ኤካዳ ነ አይለታፐ እሱዋስ እማና። 12 ግዶሽን፥ ነ አዋ ዳዊታ ግሾ ታኒ ሀይሳ ነ ደኦ ላይን ኦከ፥ ነ ናኣ ኩሸፐ ኤካና። 13 ሄስ ሀንኮካ፥ ካዎተ ነ ናኣ ኩሸፐ ኡባ ኤክከ፤ ታ አይልያ ዳዊታ ግሾነ ታኒ ዶርዳ የሩሳላመ ግሾ እስ ኮቸ እያዉ እማና" ያግስ።
ሶሎሞነ ሞርከታ
14 ሄሳፈ ጉየ፥ ጎዳይ ኤዶመ ቢታ ካዎታ ኮቸ ግድዳ፥ ኤዶመ አድያ ሀዳዳ ሶሎሞነ ቦላ ሞርከ ኦድ ደንስ። 15 ካሰ ዳዊቲ ኤዶመ አሳታራ ኦለትዳ ዎደ ሀይቅዳይሳታ ሞጋናዉ ብዳ ቶራ ሞጮናይ እዮኣብ ኤዶመን ደእያ አደታ ኡባ ዎድ ዉርስስ። 16 ኤዶመን ደእያ አደታ ኡባ ይሳና ጋካናዉ እዮኣብነ እስራኤለ አሳ ኡባይ ያን ኡሱፑን አጌና ኡትዶሶና። 17 ሽን ሄ ዎደ ጉ ናአ ግድዳ ሀዳድ፥ ባ አዋስ ኦዳ ኤዶመ ሞርናታፐ ጉታራ ግብፀ ባቃትስ። 18 ኤንቲ ምድያመፐ ደንድድ ፓራና ብዶሶና፤ ፓራነፐ ባንታራ አሰ ኤክድ ግብፀ ካዋኮ ብዶሶና። ካዎይ ሀዳዳስ እስ ኬነ ጋደ እምድ ካ እያዉ የድስ። 19 ሀዳድ ካዋ ዳሮ ኡፋይስን፥ ካዎይ ባ ማቸ፥ ፃፍናስ ምችዉ እያዉ ማቾ ኦድ እሚስ። 20 እያ ጋኑባታ ጌተትያ ናአ እያዉ የላሱ። ፃፍናሳ እያ ካዎ ጋን ድቻሱ፤ ጋኑባት ያን ካዋ ናይታራ እስፈ ደእስ።
21 ሀዳድ ግብፀን ደእሸ ዳዊቲነ ኢያ ቶራ ሞጮናይ እዮኣብ ሀይቅዳይሳ ስእድ፥ ካዋኮ፥ "ታኒ ታ ቢታ ስማና መላ ታና የዳ" ያግስ።
22 ካዎይ እያ፥ "ነዉ ሀይሳን አይብ ፓጭን፥ ነ ቢታ ባናዉ ኮያይ?" ያግድ ኦይችስ።
ሀዳድ፥ "ታዉ አይብካ ፓጭቤና፥ ሽን ታኒ ባና" ያግስ።
23 ቃስካ ፆሳይ ኤልያዳ ናኣ ራዞና ሶሎሞነ ቦላ ሞርከ ኦድ ደንስ። ራዞን ሱባ ካዋ አድራዛራፐ ባቃትስ። 24 ዳዊቲ ሱባ ኦላንቾታ ይስዳ ዎደ ራዞን ባዉ አሰ ሺሽድ ፓኖታ ሀላቃ ግድስ። ፓኖት ዳማስቆ ብድ፥ ኦይክድ ያን ኡትድ ራዞና ካዎዶሶና። 25 ሀዳድ መዳ መቱዋ ቦላ ጉጅድ፥ ሶሎሞነይ ደእዳ ላይ ኡባን ራዞን እስራኤለታስ ሞርከ ግድስ። ራዞን ሶረን ካዎትድ እስራኤለ አሳስ ሞርከ ግድስ።
እዮርባም ሶሎሞነ ቦላ ደንድስ
26 ሄሳዳካ ናባፃ ናአይ እዮርባም ሶሎሞነ ቦላ ማካልድ ደንድስ። እ ሶሎሞነ አይለታፐ እሱዋ። እ ኤፍሬማ ቢታን ደእያ ፃሬዳፐ ይዳ አስ፤ እያ አየ ሱንይ ፅሩአ፤ እያ አምኦ። 27 ካዋ ቦላ እ ማካልድ ደንድዳ ታርከይ ሀይሳፈ ካልድ ፃፈትዳይሳ። ሄ ዎደ ሶሎሞነይ ሚሎ ግምቤስነ ባ አዋ ዳዊታ ካታማ ግምበ ድርሳ ዩሹዋን ደእያ ኦላ ኩንስ። 28 እዮርባም ምኖ አስ፤ ሶሎሞነይ ሀ ናአተይ ባ ኦሱዋ ዋትድ ሎይ ኦያኮ በእድ፥ ዮሰፋ11:28 ዮኤፋ ናይት ምናሰነ ኤፍሬማ። እስ እስ ካሰ ማፃፋት ምናሰነ ኤፍሬማ ቢታን ጎሶና።ቢታን ኦያ ማዳ ኦያ አሳ ቦላ ሀላቃ ኦድ ሹምስ።
29 እስ ጋላስ እዮርባም የሩሳላመፐ ከይድ ብሽን፥ ሴሎፐ ይዳ ናበይ አክይ ኦራ ማኦ ማእድ እያራ ኦገን ጋሄትስ። ደንባን ኤንታ ናምኣ ፃላል ደኦሶና። 30 አክይ ባ ማእዳ ኦራ ማኡዋ ኦይክድ፥ ታማነ ናምአ ከስድ ዳክስ። 31 እዮርባማኮ፥ "ታሙ ዳከ ነዉ ኤካ። ጎዳይ እስራኤለ ፆሳይ ሀይሳዳ ያጌስ፤ ‘ሄኮ፥ ታኒ ካዎተ ሶሎሞነ ኩሸፐ ኤካዳ ታሙ ኮቻታ ነዉ እማና። 32 ሽን ታ አይልያ ዳዊታ ግሾነ እስራኤለ ዛረ ኡባ ግዶፈ ታኒ ዶርዳ የሩሳላመ ግሾ እስ ኮቸ እያዉ አጋና። 33 ታኒ ሄሳ ኦያ ጋሶይ፥ ሶሎሞነይ ታና አግድ ስዶና ፆስዉ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይንዳ ግሾሳ። ቃስ ታ ኦግያን ሄመቶና እፅዳ ግሾነ እያ አዋይ ዳዊቲ ኪተትዳይሳዳ ታ ዎጋነ ታ ህግያ ናጎና እፅዳ ግሾሳ።
34 " ‘ግዶሽን፥ ታኒ ካዎተ ሶሎሞነ ኩሸፐ ዉርሳ ኤክከ። ታኒ ዶርዳይሳ ግሾነ ታ ኪታነ ታ ዎጋ ናግዳ ታ አይልያ ዳዊታ ግሾ ሶሎሞነይ ደኦን ደእሽን ሄሳ ኦከ። 35 ታኒ ካዎተ እያ ናኣ ኩሸፐ ኤካዳ ታሙ ኮቻታ ነዉ እማና። 36 ታ ሱንይ ያን ፄገታና መላ ታኒ ዶርዳ የሩሳላመን፥ ኡባ ዎደ ታ አይልያ ዳዊታ ኮቻይ ካዎታና መላ ታኒ እስ ኮቸ እያ ናኣስ እማና። 37 ታኒ ነና ኤካና፤ ነ ዎዛናይ ዶስዳ ኡባ ኔኒ ሃራና፤ ኔኒ እስራኤለ ቦላ ካዎታና። 38 ታኒ ነና ኪትያባ ኔኒ ኦኮ፥ ታ ኦግያን ሄመትኮነ ታ አይለይ ዳዊቲ ናግዳይሳዳ ታ ዎጋነ ታ ኪታ ናጋዳ፥ ታ ስንን ሱረባ ኦኮ፥ ታ ኔራ ግዳና። ዳዊታስ ኦዳይሳዳ ነ ኮቻት ካዎተን ምናናዳ ኦና፤ እስራኤለ ነዉ እማና። 39 ሶሎሞነ ናጋራ ግሾ ታኒ ዳዊታ ኮቻ ሴራና፤ ሽን መርናዉ ሴርከ’ " ያግስ። 40 ሶሎሞነይ ኢዮርባማ ዎናዉ ኮይስ፤ ሽን እዮርባም ግብፀ ካዋ ሽሻቃኮ ባቃትድ፥ ሶሎሞነይ ሀይቃና ጋካናዉ ግብፀን ጋምእስ።
ሶሎሞነ ሀይቁዋ
(2 ታር 9:29-31)
41 ሶሎሞነ ሀንዳ ሀራባይ፥ እ ኦዳባይ፥ እያ ጭንጫተይ ሶሎሞነ ታርከ ማፃፋን ፃፈትስ። 42 ሶሎሞነይ እስራኤለ ቦላ የሩሳላመን ኦይታሙ ላይ ካዎትስ። 43 ሄሳፈ ጉየ፥ ሶሎሞነይ ሀይቅድ፥ ባ ማይዛን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።