1 ካዎታ ማፃፋ 12

ታሙ እስራኤለ ኮቻታ ሻከተ

1 እስራኤለ አሳ ኡባይ ሮብኣማ ካዎያናዉ ሴከማ ብዳ ግሾ እካ ያ ብስ። 2 ካዋ ሶሎሞነፐ ባቃትድ፥ ግብፀን ደእያ ናባፃ ናአይ እዮርባም ሄሳ ስእዳ ዎደ ግብፀፈ ስሚድ ይስ። 3 እስራኤለ አሳይ እዮርባማ ኪትድ ፄግስን፥ እነ እስራኤለ ማባራ ኡባይ ሮብኣማኮ ብድ፥ 4 "ነ አዋይ ኑና ዴፆ ቃምባራ ቶስስ፤ ሽን ሀእ እ ኑና ኦስስያ ዎልቃማ ኦሱዋነ ዴፆ ቃምባራ ኑስ ካዉሻርክ። ያትኮ፥ ኑኒ ነዉ ሃረታና" ያግዶሶና።

5 ሮብኣም ኤንታኮ፥ "ብድ ሄን ጋላስ ስሚድ ታኮ ዪተ" ያግን አሳይ ብዶሶና።

6 ሄሳፈ ጉየ፥ ካዎይ ሮብኣም፥ እያ አዋይ ሶሎሞነይ ደኦን ደእያ ዎደ፥ ሶሎሞነ ዞርያ ጭማታ፥ "ሀ አሳስ ዎይጋዳ ዛራ ጌቲ?" ያግድ ዞረ ኦይችስ።

7 ጭማት ዛሪድ፥ "ሀች ኔኒ ሀ አሳስ አይለ ግዳዳ ኦኮነ ኤንታ ኦይሻስ ሎኦ ቃላ ዛርኮ፥ ኡባ ዎደ ኤንቲ ነዉ አይለ ግዳና" ያግዶሶና።

8 ሽን ሮብኣም ጭማት ዞርዳ ዞርያ አግድ፥ እያራ ድጭድ እያዉ ኦያ ናአተታ ዞረ ኦይችስ። 9 እ ኤንታኮ፥ "ህንተ ታና አይ ዞረቲ? ‘ነ አዋይ ኑና ቶስዳ ዴፆ ቃምባራ ኑስ ካዉሻርክ’ ግያ ሀ አሳስ ዎይጋዳ ዛሮ?" ያግድ ኦይችስ።

10 ናአተት ዛሪድ፥ " ‘ነ አዋይ ኑና ዴፆ ቃምባራ ቶስስ፤ ሽን ኔኒ ኑስ ካዉሻርክ’ ግያ አሳስ፥ ‘ታ ጉ ብራይ ታ አዋ ፄሳፈ ኦርዴስ። 11 ታ አዋይ ህንተዉ ቃምባራ ዴፀስ፤ ሽን ታኒ እያፐ አዳ ዴፀና። ታ አዋይ ህንተና ልሶን ጋራፍስ፤ ሽን ታኒ ህንተና ኮርነዳ ዱክያ ልሶን ጋራፋና’ ያጋዳ ዛራ" ያግዶሶና።

12 ካዎይ፥ "ሄን ጋላስ ስሚድ ታኮ ዪተ" ግዳይሳዳ እዮርባምነ አሳ ኡባይ ሄን ጋላስ ሮብኣማኮ ስሚድ ይዶሶና። 13 ካዎይ ጭማታ ዞርያ አግድ ኤንታዉ ሀንቆን ዛርስ። 14 ናአተት ዞርዳ ዞርያ ካልስ። እ ኤንታኮ፥ "ታ አዋይ ህንተ ቃምባራ ዴፀስ፤ ሽን ታኒ እያፐ አዳ ዴፀና። ታ አዋይ ህንተና ልሶን ጋራፍስ፤ ሽን ታኒ ህንተና ኮርነዳ ዱክያ ልሶን ጋራፋና" ያግድ ዛርስ። 15 ጎዳይ ሴሎፐ ይዳ አክያ ባጋራ ካሰ ናባፃ ናኣ እዮርባማስ ኦድዳ ቃላይ ፖለታና መላ ሄስ ጎዳፐ ሀንዳ ግሾ ካዎይ አሳይ ግያባ ስኦና እፅስ።

16 እስራኤለ አሳ ኡባይ ካዎይ ኤንቲ ገይሳ ስኦና እፅዳይሳ በእድ ሀይሳዳ ያግዶሶና፤ "ዳዊታፐ ኑና ጋክያ ግሾይ አይቤ? እሰየ ናኣፐ ኑኒ ላትያባይ አይቤ? እስራኤለ አሳዉ፥ ህንተ ሶ ህንተ ሶ ስምተ። ዳዊታ፥ ነ ኬ ናጋ" ያግድ፥ እስራኤለ አሳ ኡባይ ባንታ ሶ ባንታ ሶ ስምዶሶና። 17 ሽን ሮብኣም ይሁዳን ደእያ እስራኤለ አሳ ቦላ ካዎትስ።

18 ካዎይ ሮብኣም ማዳ ኦይሳታ ሀላቃ አዶንራማ እስራኤለ አሳኮ ኪትን፥ ኤንቲ ሹቻን ጫድድ ዎዶሶና። ያትን፥ ካዎይ ሮብኣም ባ ፓራ ጋርያን ገልድ የሩሳላመ ባቃትስ። 19 ሄ ዎደፐ ዶምድ ሀች ጋካናዉ ታሙ እስራኤለ ኮቻት ዳዊታ ኮቻፈ ካዎትዳ ካዎታ ቦላ ማካልዶሶና። 20 እዮርባም ግብፀፈ ስምዳይሳ እስራኤለ አሳ ኡባይ ስእዳ ዎደ እያ ባንታ ማባራኮ ፄግድ እስራኤለ ቦላ ካዎዶሶና። ዳዊታ ኮቻፈ ካዎትዳ ካዎታስ አማነትዳይ ይሁዳ ኮቻ ፃላላ።

21 ሶሎሞነ ናአይ ሮብኣም የሩሳላመ ጋክዳ ዎደ፥ እስራኤለ አሳራ ኦለትድ፥ ካዎተ ባዉ ዛራና መላ ሮብኣም ይሁዳፐነ ብንያመፐ ዶረትዳ 180,000 ኦላንቾታ ሺሽስ። 22 ሽን ፆሳ ቃላይ ፆሳ አስ ግድዳ ሳማየኮ ሀይሳዳ ያግድ ይስ። 23 "ሶሎሞነ ናኣ፥ ይሁዳ ካዋ ሮብኣማስ፥ ይሁዳስ፥ ብንያመስነ አትዳ አሳ ኡባስ ሀይሳዳ ያጋ፤ 24 ጎዳይ ህንተኮ፥ ‘ህንተ ዳቦታራ፥ እስራኤለታራ ኦለታናዉ ቦፕተ። ሀይሳ ታኒ ኦዳ ግሾ ህንተ ኡባይ ህንተ ሶ ህንተ ሶ ስምተ’ ያጋዳ ኦዳ" ያግስ። ኤንቲ ጎዳ ቃላ ስእድ ሶ ብዶሶና።

ዎርቃ ማራታ

25 ሄሳፈ ጉየ እዮርባም ደረይ ዳርያ ኤፍሬማ ቢታን ደእያ ሴከማ ሚፃ ኦ ግምብድ፥ ያን ደእስ፤ ያፐ ከይድ ብድ ጵንኤላ ግምብስ።

26 እዮርባም ባ ዎዛናን፥ "ካዎተይ ዳዊታ ኮቻስ ስማና። 27 ሀ አሳይ ፆሳ ኬን ያርሾ ያርሻናዉ የሩሳላመ ብያባ ግድኮ፥ ኤንቲ ባንታ ጎዳኮ፥ ካዋ ሮብኣማኮ ስማና። ኤንቲ ታና ዎድ፥ ይሁዳ ካዋ ሮብኣማኮ ስማና" ያግድ ቆፕስ።

28 ካዎይ ዞረትዳፐ ጉየ ዎርቃፈ ናምኡ ማራ ምስለታ መድ፥ አሳኮ፥ "ህንተ ህዛፐ የሩሳላመ ቡሳይ ግዳና። ህንተኖ እስራኤለ አሳዉ፥ ሄኮ፥ ህንተና ግብፀፈ ከስዳ ህንተ ፆሳት ሀይሳታ!" ያግስ። 29 ኤንታፈ እሱዋ ቤተለን፥ እሱዋ ዳነን ዎስ። 30 ሀ ሀኖታይ ኤንታዉ ናጋራ ግድስ፤ አሳይ ሄ ማራ ምስልያ ጎይናናዉ ዳነ ጋካናዉ ብዶሶና።

31 እዮርባም ደረ ሁጰን ቃ ጎይኖ በሳታ ጊግስድ ሌወ ኮቸ ግዶና እፅኮካ ኦናካ ካህነ ኦድ ሹምስ። 32 ይሁዳን ቦንቸይሳዳ ሆስፑን አጌናን ታማነ እቻሻን ጋላሳን ባኣለ ቦንቻናዳ እዮርባም ቃማ ቃችድ ያርሾ ያርሽስ። እ ሀይሳዳ ሀንድ ቤተለ ብድ፥ ባ መዳ ማራ ምስልያስ ያርሾ ያርሽስ። ባ መዳ ቃ ጎይኖ በሳታን ካህነታ ቤተለን ሹምስ። 33 እ ባ ሁጰን ዶርዳ ሆስፑን አጌናን፥ ታማነ እቻሻን ጋላስ ቤተለ ብድ ሄ ጋላሳይ እስራኤለ አሳስ ባኣለ ግዳና መላ አዋጅስ። እፃነ ጩይሳናዉ ያርሾ በሳ ከይስ።