1 ካዎታ ማፃፋ 9

ፆሳይ ሶሎሞነስ ዛሪድ ቆንጭስ

1 ሶሎሞነይ ፆሳ ኬነ ካዎ ጋ ኬፅድ ዉርስዳ ዎደ ባ ዎዛናን ኦናዉ አሞትዳ ኡባ ፖልዳፐ ጉየ፥ 2 ጋባኦናን ካሰ ቆንጭዳይሳዳ ጎዳይ ዛሪድ እያዉ ቆንጭስ።

3 ጎዳይ፥ "ኔኒ ታ ስንን ዎስዳ ዎሳነ ዋሱዋ ታኒ ስአስ። ኔኒ ኬፅዳ ኬይ መርናዉ ታ ሱንይ እያን ፄገታና መላ ኦዳ ጌሻስ። ታ አይፈይነ ታ ዎዛናይ ኡባ ዎደ ያን ዳና። 4 ሽን ኔኒ ነ አዋይ ዳዊቲ ሄመትዳይሳዳ ቦረይ ባይና ሱረተን ታ ስንን ሄመትኮ፥ ታ ኪታ ኡባ ኦኮነ ታ ዎጋነ ታ ህግያ ናግኮ፥ 5 ታኒ ነ አዋ ዳዊታስ፥ ‘እስራኤለ ካዎተ አራታን ኡትያ አስ ኔኒ ኩመ ያካ’ " ግዳይሳዳ ነ አራታ እስራኤለ ቦላ መርናዉ ምንዳ ኤሳና።

6 "ሽን ነ ዎይኮ ነ ናይት ታና ካሎ አግድ ጉየ ስምኮ፥ ታኒ ህንተና ኪትዳ ታ ኪታነ ታ ዎጋ ናጎና እፅድ አላጋ ፆሳታ ጎይንኮ፥ 7 እስራኤለ አሳ ታኒ ካሰ ኤንታዉ እምዳ ቢታፈ ሾዳና፤ ታኒ ታ ሱንስ ጌሽዳ ሀ ኬ አጋና። እስራኤለት አሳ ኡባ ግዶን ካስነ ሚቻስ አታና። 8 ሀ ማላልስያ ፆሳ ኬይ ላለትድ ላለ ዶረ ግዳና። ማታራ አያ አሳ ኡባይ ዳጋምድ፥ ‘ጎዳይ ሀ ቢታነ ሀ ፆሳ ኬ አይስ ሀይሳዳ ኦዴ?’ ያጋና። 9 አሳይ ዛሪድ፥ ‘ኤንታ ማይዛታ ግብፀፈ ከስዳ፥ ጎዳ ባንታ ፆሳ ኤንቲ አግድ፥ አላጋ ፆሳታ ካልዳ ግሾነ ኤንታ ጎይንዳ ግሾ ጎዳይ ኤንታ ቦላ ሀ ኢታባ ኡባ ኤህስ’ " ያግድ ዛራና።

ሶሎሞነ ሀራ ኦሶታ

10 ሶሎሞነይ ሀ ናምኡ ኬታ፥ ፆሳ ኬነ ባ ካዎ ጋ ኬፅዳ ላታማን ላይ ዉርሰን፥ 11 ፅሮሳ ካዎይ ክራም ፂዳ፥ ዝጋነ ዎርቃ ኡባ እምዳ ግሾ፥ ጋልላን ደእያ ላታሙ ካታማታ ሶሎሞነይ እያዉ እሚስ። 12 ሽን ክራም ፅሮሳፐ ከይድ፥ ሶሎሞነይ እያዉ እምዳ ካታማታ በአናዉ ብዳ ዎደ ካታማት እያ ኡፋይስቦኮና። 13 ክራም ሶሎሞነኮ፥ "ታ እሻዉ፥ ሀይሳቲ ነ ታዉ እምዳ ካታማት አይባ ካታሜ?" ያግስ። ሄሳ ግሾ፥ እ ሄ ካታማታ፥ "ፓና ቢታ" ያግድ ሱንስ። ሄ ሄራይ ሀች ጋካናዉ ሄ ሱንን ፄገቴስ። 14 ክራም 4,000 ክሎ ግራመ ዎርቃ ካዋ ሶሎሞነስ ካሰ የድስ።

15 ፆሳ ኬ፥ ካዎ ጋ፥ ሚሎ፥ የሩሳላመ ካታማ ግምብያ፥ ሀፆራ፥ ማግዶነ ገዘራ ግምባናዉ ካዋ ሶሎሞነስ ኦሳንቾት ደኦሶና። 16 ግብፀ ካዎይ ካሰ ገዘራ ኦይክድ ታማን ፁግስ። ካታማን ደእያ ካናነ አሳታ ዎስ፤ ሶሎሞነይ ኤክዳ ባ ናእዉ ዎይቶ ኦድ እሚስ። 17 ሶሎሞነይ ገዘራነ ጋርሳ ቤት-ሀሮና ዛሪድ ኬፅስ። 18 ባእላታ፥ ይሁዳ መላ ደእያ ታማራ፥ 19 ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ናግያ ካታማታ፥ የሩሳላመን፥ ልባኖሰንነ እ ሃርያ ቢታ ኡባን ኬፃናዉ ኮይዳ ኡባ ኬፅስ።

20 አሞረታፐ፥ ህተታፐ፥ ፓርዘታፐ፥ ህወታፐነ ያቡሰታፐ አትዳ አሳት ኡባይ እስራኤለ አሰ ግዶኮና። 21 ኤንቲ እስራኤለ አሳይ ቢታፈ ዉርስድ ይሳናዉ ዳንዳኦና እፅን ሄ ቢታን አትዳ አሳ ኮቻታ። ሶሎሞነይ ኤንታ አይለ ኦን፥ ኤንቲ ሀች ጋካናዉ አይለተን ኦሶና። 22 ሽን ሶሎሞነይ እስራኤለ አሳፐ ኦናካ አይለ ኦቤና። ኤንቲ እያዉ ሞርናታ፥ ኦላንቾታ፥ ቶራ ሞጮና፥ ፓራ ጋረ ላግያ አሳስ ሀላቃነ ፓራ አስ ግድድ ኦዶሶና። 23 ኤንቲ ሶሎሞነይ ኦስስያ ኬ ኬፀይሳታ ሀላቃታ፤ ኤንቲ እቻሹ ፄታነ እሻታማ።

24 ግብፀ ካዋ ናእያ ዳዊታ ካታማፐ ሶሎሞነይ እዉ ኬፅስዳ ኬ ይዳፐ ጉየ፥ እ ሚሎ ካታማ ግምብስ።

25 ሶሎሞነይ ጎዳስ ግምብዳ ያርሾ በሳን ፁሳነ እስፈተ ያርሾ ላይን ሄ ቶሆ ያርሼስ። ጎዳ ስንን እፃነ ጩይሴስ፤ ሄሳን ፆሳ ኬይ ፖለትስ።

26 ሄሳፈ ጉየ፥ ካዎይ ሶሎሞነይ ኤዶመ ቢታን ዞኦ አባ ጋፃን፥ ኤሎታ ማታን ደእያ ኤፅዮን-ጋብራን ማርካበታ ኦስ። 27 ካዎይ ክራም ሶሎሞነ አሳራ ኦና መላ ማርካበ ላጎን ሎህዳ ባ አሳታ ኪትስ። 28 ኤንቲ ኦፍራ ቢታ ብድ 14,000 ክሎ ግራመ ዎርቃ ካዋ ሶሎሞነስ ኤክድ ይዶሶና።