ፆሳ ኬ ኬፃናዉ ጊገተ
(2 ታር 2:1-18)
1 ፅሮሳ ካዎይ ክራም ዳዊታራ ስጋን ጋምእዳ ግሾ፥ ሶሎሞነይ ባ አዋ ዳዊታ በሳን ካዎታናዉ ትየትዳይሳ ስእድ፥ አሰ ሶሎሞነኮ ኪትስ። 2 ሶሎሞነይ ዛሪድ፥ 3 "ጎዳይ እያ ሞርከታ እያ ቶሁዋፐ ጋርሳን ሃርሳና ጋካናዉ፥ ታ አዋ ዳዊታ ቦላ ደንድዳ ኦላ ጋሶን፥ ጎዳ ባ ፆሳ ሱንስ ፆሳ ኬ ኬፅቦናይሳ ነ ኤራሳ። 4 ሽን ሀእ ጎዳይ ታ ፆሳይ ታዉ ሸምፖ እሚስ፤ ታዉ አይባ ሞርከይ ዎይኮ ኢታባ ኦይ ባዋ። 5 ጎዳይ ታ አዋ ዳዊታስ፥ ‘ታኒ ነ በሳን፥ ነ አራታን ካዎያ ነ ናአይ ታ ሱንስ ኬ ኬፃና’ ግዳይሳዳ ታኒ ጎዳ ታ ፆሳ ሱንስ ኬ ኬፃናዉ ሀልቻስ። 6 ሄሳ ግሾ፥ ልባኖሰፐ ዝጋ ማስያ አሳታ የዳ፤ ታ አሳት ነ አሳታራ ኦና። ነ አሳታስ ነ ቃንፃ ግዳባ ታ ቃንፃና። ስዶና አሳታዳ ም ማሰ ሂላ ኑ አሳይ ኤሮናይሳ ነ ኤራሳ" ያግስ።
7 ክራም ሶሎሞነ ኪታ ስእድ ዳሮ ኡፋይትስ፤ "ሀ ግታ ካዎተ ሃራና መላ ዳዊታስ ሀ ጭንጫ ናኣ እምዳ ጎዳይ ጋላተቶ" ያግስ።
8 ሄሳፈ ጉየ ክራም ሶሎሞነኮ ሀይሳዳ ያግድ ኪትስ፤ "ነ ኪትዳ ኪታይ ታና ጋክስ። ኔኒ ኮይዳባ ታኒ ኦና፤ ዝጋነ ፂዳ ታ ነዉ ሺሻና። 9 ታ አሳይ ዱሩማ ጪነ ልባኖሰፐ አባኮ ጋዛና። ታኒ ቃሽሳዳ፥ አባ ቦላራ ቶከትድ ነ ኮይያ በሲ ጋናዳ ኦና፤ ያን ኤንቲ ብርሽድ ነ አሳስ እማና። ሄሳፈ ጉየ፥ ኔኒ ነ ባጋራ ታ ካዎ ኬን ደእያ አሳስ ምያባ ኪታዳ ታ አሙዋ ፖላና" ያግስ።
10 ሄሳዳ ኦድ ክራም ሶሎሞነይ ኮይዳ ኬና ዝጋነ ፂዳ እሚስ። 11 ሶሎሞነይ ካዎ ኬን ደእያ አሳይ ማና መላ 20,000 ኩንታለ ግስተነ 400,000 ልትሮ ሻማሆ ዛይተ ላይን ላይን ፓጮና ክራማስ እሚስ። 12 ጎዳይ ሶሎሞነስ እማና ግዳይሳዳ፥ እያዉ ጭንጫተ እሚስ። ክራምነ ሶሎሞነይ ባንታ ግዶን ሳሮ ደእዶሶና፤ ኤንቲ ናምአይ ባንታ ግዶን ጫቅዶሶና።
13 ካዎይ ሶሎሞነይ እስራኤለ 30,000 ማዳ ኦይሳታ ዶርድ ከስስ። 14 አዶንራማ ጌተትያ አድያ ኤንታ ቦላ ሀላቃ ኦድ ሹምስ። ሄ ኦሳንቾታ ታሙ ታሙ ሙኩላን ሻክድ፥ ሄ ጩጋ ከስስ፤ እስ እስ ጩጋይ ታራን ታራን ብድ፥ እስ አጌና ልባኖሰን ኦናዳነ ናምኡ አጌና ባንታ ሶን ዳናዳ ኦስ። 15 ሶሎሞነስ ቶሆ ቶክያ 70,000 አሳትነ ሹቹ ቆእያ 80,000 አሳት ገዘ ቢታን ደኦሶና። 16 ኤንታ ቦላ ሀላቃ ግድድ ኦስስያ 3,300 አሳታ ሹምስ። 17 ካዋ ሶሎሞነ ኪታን፥ ፆሳ ኬ ባሱዋስ ግዳና መላ ግታ ሹቻታ ቆእድ ጊግስዶሶና። 18 ሶሎሞነ አሳይነ ክራማ አሳይ ኩሸ ሂላ ኤረይሳት፥ ገባላ አሳራ ግድድ፥ ፆሳ ኬ ኬፃናዉ ም ቃንፅድ፥ ሹቻ ቆእድነ ማስድ ጊግስዶሶና።