አክያ ትንብተ
1 ሄ ዎደ እዮርባማ ናአይ አብይ ሀርገትስ። 2 እዮርባም ባ ማችዉ፥ "ደንዳ፤ ኔኒ እዮርባማ ማቾ ግደይሳ ኦንካ ኤሮና መላ ነ ማኡዋ ላማዳ ሴሎ ባ። ሄኮ፥ ታኒ ሀ አሳ ቦላ ካዎታናይሳ ታዉ ኦድዳ ናበይ አክይ ያን ደኤስ። 3 ታሙ ኡይ፥ ጉ ዳቦነ እስ ኦቶ ኤስ እያዉ ኤካዳ ባ። ሀ ሀርግዳ ናአባ እ ነዉ ኦዳና" ያግስ።
4 እዮርባማ ማችያ እ ግዳይሳዳ ኦዳ አክያ ሶ ሴሎ ባሱ። አክይ ጭምዳ ግሾ እያ አይፈይ ፄላናዉ ዳንዳኤና። 5 ሽን ጎዳይ አክያኮ፥ "ሄኮ፥ እዮርባማ ማችያ ሀርገትዳ ባ ናአባ ኦይቻናዉ ኔኮ ያዉሱ። ኔኒ እዉ ሀይሳ ሀይሳ ያጋዳ ኦዳ። እያ ኔኮ ጋክያ ዎደ ሀራ ማጫስ ዳናና" ያግስ።
6 አክይ ፐንገን ቶሆ ግርስ ስእድ ሀይሳዳ ያግስ፤ "እዮርባማ ማቸ፥ አነ ሃ ገላ። ኔኒ አይስ ሀይሳ መላ ሀራ አስ ዳናዲ? ታኒ ኢታ ኪታ ነዉ ኦዳና። 7 ኔኒ እዮርባማኮ ባዳ፥ ጎዳይ እስራኤለ ፆሳይ ሀይሳዳ ያጌስ ያጋ፤ ‘ታኒ ነና አሳ ግዶፈ ቁ ኦስ፤ ታ አሳ እስራኤለ ቦላ ነና ካዎስ። 8 ዳዊታ ኮቻፈ ካዎተ ኤካዳ ነዉ እማስ፤ ሽን ኔኒ ታ አይልያ ዳዊታ መላ ግዳካ። እ ታ ኪታ ናግስ፤ ታ ስንን ሱረባ ፃላላ ኦሸ ባ ኩመ ዎዛናን ታና ካልስ። 9 ኔፐ ካሰ ደእያ ኡባይ ኦዳይሳፈ አያ ኢታባ ኔኒ ኦዳሳ። ኔኒ ነዉ ሀራ ፆሳታነ ብራፐ መዳ ኤቃታ መዳሳ። ያታዳ ታና ሀንቀዳሳ፤ ታዉ ዞኮ ዛራዳሳ። 10 ሄሳ ግሾ፥ ታኒ እዮርባማ ኬ አሳ ቦላ ኢታባ ኤሀና። እስራኤለ ቢታን እዮርባማ ኬ አሳፐ አይለ ግድን ዎማኖ እስ አደካ አሾና ይሳና። ከምኤለይ ታማን ፁገትድ ዉረይሳዳ ታኒ እዮርባማ ኬ ፁጋዳ ዉርሳና። 11 እዮርባማ ኮቸ ግድድ ካታማን ሀይቅያ ኦናካ ካናት ማና፤ ጋፃረን ሀይቀይሳታ ሳሎ ካፎት ማና። ታኒ ጎዳይ ሀይሳ ኦዳስ!’ " ያግስ።
12 እዮርባማ ማቸኮ፥ "ኔኒ ደንዳዳ ነ ሶ ባ። ነ ቶሆይ ካታማ ገልያ ዎደ ናአይ ሀይቃና። 13 እስራኤለ ኡባይ ናኣስ ዬክድ ሞጋና። እዮርባማ ኬን ጎዳ እስራኤለ ፆሳ ስንን እያን ሎኦባይ በንትዳ ግሾ፥ እዮርባማ ኬፈ እያ ፃላል ሞገታና። 14 ቃስ እዮርባማ ኬ ይስያ ካዎ ጎዳይ ባዉ እስራኤለ ቦላ ደንና። 15 ጎዳይ እስራኤለ ሾጫና፤ ሃ ግዶን ማይረይ ቃፀይሳዳ ጎዳይ ሄ ዎደ እስራኤለ ቃና። አሼራ ጌተትያ ፆሰ ምስለ ኤስድ፥ ጎዳ ሀንቀዳ ግሾ፥ ኤንታ አዋታስ እ እምዳ ሎኦ ቢታፈ ኤንታ ሾዳና፤ ኤንታ ኤፍራፂሳ ሻፋፐ ሄፍንን ላላና። 16 እዮርባም ኦዳ ናጋራ ግሾነ እስራኤለ አሳ ናጋራ ኦስስዳ ግሾ ጎዳይ እስራኤለ አጋና" ያግስ።
17 እዮርባማ ማችያ ባዳ ትርሳ ጋካዳ፥ ፐንገ የያ ዎደ ናአይ ሀይቅስ። 18 ባ አይልያ ናብያ አክያ ባጋራ ጎዳይ ኦድዳይሳዳ እያ ሞግዶሶና፤ እስራኤለ አሳ ኡባይ እያዉ ዬክዶሶና።
19 እዮርባም ኦዳ ሀራባይ፥ እ ኦለትዳ ኦላይነ እያ አይሶ ማራይ፥ ሄኮ፥ እስራኤለ ካዎታ ታርከ ማፃፋን ፃፈትድ ደኤስ። 20 እዮርባም ላታማነ ናምኡ ላይ ካዎትድ ሀይቅስ። እያ በሳን እያ ናአይ ናዳብ ካዎትስ።
ይሁዳ ካዋ ሮብኣማ
(2 ታር 11:5—12:15)
21 ሶሎሞነ ናአይ ሮብኣም ይሁዳን ካዎትስ፤ ሮብኣም ካዎትያ ዎደ እያዉ ላይ ኦይታማነ እስኖ። ጎዳይ ባ ሱንይ ፄገታና መላ እስራኤለ ኮቻታ ቢታ ኡባ ግዶፈ ዶርዳ የሩሳላመ ካታማን፥ ሮብኣም ታማነ ላፑን ላይ ካዎትስ። እያ አየ ሱንይ ናእሞ፤ እያ አሞነ ቢታ አስ። 22 ይሁዳ አሳይ ጎዳ ስንን ኢታባ ኦዶሶና። ባንታ ኦዳ ናጋራን ባንታ አዋታፐ አድ ጎዳ ሀንቀዶሶና። 23 ቃስ ኤንቲ ቃ ጎይኖ በሳታ፥ ኤቃ ሹቻታነ አሼሮ ጌተትያ ፆሰ ምስለታ ደረ ቦላነ እርፃ ምታ ጋርሳን ኤስዶሶና። 24 ሀር አቶሽን፥ ኤንታ ቃ ጎይኖ በሳን፥ ጎይኖ ዎጋ ኦድ አደይ አደራ ጋሄቴስ። ጎዳይ እስራኤለ ስንፈ ከስዳ ካዎተት ኦያ እፀትዳ ኦሶታ ኡባ እስራኤለ አሳይ ኦዶሶና።
25 ሮብኣም ካዎትዳ እቻሻን ላይን ግብፀ ካዎይ ሽሻቅ የሩሳላመ ካታማ ቦላ ኦላ ደንስ። 26 ፆሳ ኬነ ካዎ ጋን ደእያ ሻሉዋ፥ ሶሎሞነይ ቆፅስዳ ዎርቃ ጎንዳለታ ኡባ ቦንቅድ ኤክስ። 27 ያትን፥ ካዎይ ሮብኣም ሄ ጎንዳለታ ግሾ ናሰ ብራታፐ ሀራ ጎንዳለታ ኦስስስ። ኤንቲ ናገታና መላ ካዎ ጋ ፐንግያ ናገይሳታ ሀላቃታስ እሚስ። 28 ካዎይ ፆሳ ኬ ብያ ዎደ ናገይሳት ጎንዳለታ ኦይኮሶና፤ እ ስሚድ ብያ ዎደ ኤንቲ ዛሪድ ናገይሳታ ኬን ዎሶና።
29 ሮብኣም ሀንዳ ሀራባይነ እ ኦዳ ኡባይ ይሁዳ ካዎታ ታርከ ማፃፋን ፃፈትስ። 30 ሮብኣምነ እዮርባም ኡባ ዎደ ኦላን ደእዶሶና። 31 ሮብኣም ሀይቅድ ባ ማይዛታን ጋሄትስ፤ ዳዊታ ካታማን ደእያ ባ አዋታ ዱፎን ሞገትስ። እያ አየ ሱንይ ናእሞ፤ እያ አሞነ ቢታ አስ፤ ሮብኣማ በሳን እያ ናአይ አብይ ካዎትስ።