ኡባፈ አይ ኦኔ?
(ማር 9:33-37፤ ሉቃ 9:46-48)
1 ሄ ዎደ የሱሳ ታማረት ይድ፥ "ሳሎ ካዎተን ኡባፈ አይ ኦኔ?" ያግድ ኦይችዶሶና።18:1 ሉቃ 22:24. 2 የሱሲ እስ ጉ ናአ ፄግድ ኤንታ ግዶን ኤስድ ሀይሳዳ ያግስ። 3 "ታኒ ህንተዉ ቱማ ኦዳይስ፤ ህንተ ላመቶናነ ጉ ናይታዳ ሀኖና እፅኮ ሳሎ ካዎተ ኡባራካ ገላናዉ ዳንዳኤከታ።18:3 ማር 10:15፤ ሉቃ 18:17. 4 ህዛ፥ ሀ ጉ ናአዳ ባና ካዉሽያ ኦንካ ሳሎ ካዎተን ኡባፈ አይሳ ግዳና። 5 ሀይሳ መላ ናአ ታ ሱንን ሞክያ ኦንካ ታና ሞኬስ።
6 "ሽን ታናን አማንያ ሀ ጉታፐ እሱዋ ናጋራ ኦና መላ በ ግድያ ኦንካ ግታ ጋቻ ዎፃ ባ ቆን ቃችድ ጪሞ አባን ምተትኮ እያዉ ሎኦ። 7 አላመን አሳይ ናጋራ ኦና መላ ኦያባት ደእያ ግሾ አላምያ አየ! ሄሳ መላባት ዮና አተና፥ ሽን በይ እያ ጋሶን ያ ኡራ አየ!
8 "ነ ኩሸይ ዎይኮ ነ ቶሆይ ነና ባለኮ ኔፐ ቃንፃ የጋ። ኔኒ ናምኡ ኩሸራ ዎይኮ ናምኡ ቶሆራ መርና ታማን የገታናፐ ኩሸ ዎይኮ ቶሆ ዱፃ ግዳዳ መርና ደኦ ደመይስ ነዉ ሎኦ።18:8 ማቶ 5:30. 9 ቃስ ነ አይፈይ ነና ባለኮ እዮ ዎጫ ከሳዳ ዎራ ሆላ። ኔኒ ናምኡ አይፈራ ጋናመ ታማን የገተይሳፈ እስ አይፈራ መርና ደኡዋ ገለይስ ነዉ ሎኦ።18:9 ማቶ 5:29.
10 "ታ ህንተዉ ኦዳይስ፤ ሳሎን ደእያ ኤንታ ናግያ ኪታንቾት ኡባ ዎደ ሳሎን ደእያ ታ አዋ ስንን ደእያ ግሾ፥ ህንተ ሀ ጉታፐ እሱዋካ ካና መላ ናገትተ።18:10 ሉቃ 19:10. 11 አሳ ናአይ ይዳይሳታ አሻናዉ ይስ"18:11 አሳ ናአይ ይዳይሳታ አሻናዉ ይስ፦ እስ እስ በን ማፃፋት ፓይዶ 11 ጉጆሶና። ያግስ።
ይዳ ዶርሳ ሌምሶ
(ሉቃ 15:3-7)
12 ቃስ የሱሲ፥ "ህንተዉ አይ ዳኒ? እስ ኡራስ ፄቱ ዶርሳት ደኤይሳታፐ እሶይ ይኮ ኡዱፉን ታማነ ኡዱፉናታ ደርያ ቦላ የግ አግድ ሄ ይዳይሳ ኮያናዉ ቤኔ? 13 ታ ቱማ ኦዳይስ፤ እ ደምዳ ዎደ ኡዱፉን ታማነ ኡዱፉናታፐ አድ ይድ በንትዳ እስ ዶርሳ ግሾ ኡፋይቴስ። 14 ሄሳዳካ፥ ሳሎን ደእያ ህንተ አዋይ ሀ ጉታፐ እሶይ ያና መላ ኮየና።
ቆህዳ አስ ዋታኔ?
15 "ነ እሻይ ነና ቆህኮ ነርካ እያኮ ባዳ እያ ቆሁዋ እያዉ ኦዳ። እ ነና ስእኮ እያ ነዉ እሻ ኦ።18:15 ሉቃ 17:3. 16 ሽን እ ነና ስኦና እፅኮ፥ ናምኡ ዎይኮ ሄ አሳ ማርካን ሞቶይ ላሰትያ ግሾ፥ እስ ዎይኮ ናምኡ አስ ኤካዳ እያኮ ባ።18:16 ዛረ 19:15. 17 እ ኤንታና ስኦና እፅኮ፥ ዎሳ ኬስ ኦዳ። ዎሳ ኬ ግያባ ስኦና እፅኮ አማኖና አሳዳ ዎይኮ ቃራፃ ቃንፅስያ አሳዳ እያ ፓይዳ።
18 "ታ ህንተዉ ቱማ ኦዳይስ፤ ሳአን ህንተ ድግያባት ኡባይ ሳሎን ፆሳ ማታን ድገትዳባ ግዳና። ሳአን ህንተ ሀኖ ግያባት ኡባይ ሳሎን ፆሳ ማታን ሀንዳባ ግዳና።18:18 ማቶ 16:19፤ ዮሀ 20:23.
19 "ቃስካ ታ ህንተዉ ኦዳይስ፤ ሳአን ህንተፈ ናምአይ ባንታ ዎስያባስ እስ ዎዛናን ግድድ ፆሳ ዎስያባ ግድኮ ሳሎን ደእያ ታ አዋይ ህንተዉ ኦና። 20 ታና ካለይሳታፐ ናምአ ዎይኮ ሄ ግድድ ሺቅያ በሳን ታኒ ኤንታ ግዶን በንታና" ያግስ።
አቶ ጉሳባ
21 ሄ ዎደ ጰፅሮስ የሱሳኮ ይድ፥ "ጎዳዉ፥ ታ እሻይ ታና ቆህኮ አፑን ቶሆ ታኒ አቶ ጋናዉ በሲ? ላፑን ቶሆ ጋካናሰዬ?" ግድ ኦይችስ።18:21 ሉቃ 17:3-4.
22 የሱሲ ዛሪድ፥ "ግደና፥ ላፑን ታሙ ቶሆ ላፑናፐ አትሽን፥ ላፑን ቶሆ ግደና።18:22 መ 4:24.
23 "ሄሳ ግሾ፥ ፆሳ ካዎተይ ባ ኦሳንቾታራ ባ ሚሸይ ፓጭዳኮነ ፓላህዳኮ በአናዉ ቆፕዳ ካዋ ዳኔስ። 24 ሄ ካዎይ ሚሸይ ፓጭዳኮነ ፓላህዳኮ በእያ ዎደ ዳሮ ግንድግንዳ አጮይ ደእያ እስ ኡራ እያኮ ኤህዶሶና። 25 ሽን ሄ አይለይ አጩዋ ቃንፃናዉ ፆነትን እያራ፥ እያ ማቸራ፥ እያ ናይትነ እያዉ ደእያባይ ኡባይ ባይዘትድ አጮይ ጭገታና መላ እያ ጎዳይ ኪትስ። 26 ያትን አይለይ ባ ጎዳ ቶሁዋ ቦላ ጉልባትድ፥ ‘ታ ጎዳዉ፥ ሀያና ጉ ዎደ ታካርክ፥ ታ አጩዋ ኡባ ታ ጭጋና’ ያግድ ዎስስ። 27 ካዎይ እያዉ ቃትድ፥ የድ አግስ፤ እያ አጩዋ ማርስ።
28 "ሽን ሄ አይለይ ከይ ብድ ባ ላገ ኦሳንቾታፐ እሶይ ባፐ ዳሮ ጉ ሚሸ ታልእዳይሳ፥ ‘ነ ቦላ ደእያ ታ ሚሽያ ታዉ ጭጋ’ ግድ ቆ ኦይክስ።
29 "ሄ እያ ላገ አይሌይ እያ ስንን ጉልባትድ፥ ‘ሀያና ጉ ዎደ ታካርክ ታኒ ታ አጩዋ ኡባ ጭጋና’ ያግድ ዎስስ።
30 "ሽን እፅድ ኤክ ኤፍድ ባ ላገይ አጩዋ ቃንፃና ጋካናዉ ቃሾ ኬ ገልስስ። 31 ሄሳ ግሾ፥ ሀራ ላገ ኦሳንቾት ሄሳ በእዳ ዎደ ዳሮ ይሎትድ፥ ብድ ባንታ ጎዳስ እ ኦዳባ ኡባ ኦድዶሶና።
32 "ያትን ካዎይ ሄ አይልያ ፄግስድ፥ ‘ሀ ኢታ አይልያዉ፥ ኔኒ ታና ዎስዳ ግሾ፥ ታ ነ አጩዋ ኡባ ነዉ ማራስ። 33 ያትን፥ ታኒ ነ አጩዋ ማርዳይሳዳ ኔኒ ነ ላገ አይልያ አጩዋ ማራናዉ ነዉ በሰኔ?’ ያግስ። 34 ሄሳ ግሾ፥ ካዎይ ዳሮ ይሎትድ፥ እ ባ አጩዋ ኡባ ጭጋና ጋካናዉ ፓፃ ካኤታና መላ ቃሾ ኬን የግስ።
35 "ሄሳዳካ፥ ህንተ እሶይ እሶይ ህንተ እሻ ዎዛናፐ ማሮና እፅኮ ሳሎን ደእያ ታ አዋይ ህንተና ሄሳዳ ኦና" ያግስ።