Mateus 26

የሱሳ ቦላ ማቀትዶሶና

1 የሱሲ ሀ ትምርትያ ኡባ ዉርስዳ ዎደ ባ ታማረታኮ፥ 2 "ናምኡ ጋላሳፐ ጉየ፥ ፓስካ ባኣለ ቦንችያ ጋላስ ግደይሳ ኤሬታ። ሄ ጋላስ አሳ ናእ ማስቃለ ቦላ ካቀታናዉ አሳ ኩሸን አድ እመታና" ያግስ።✝26:2 ከሳ 12:1.

3 ሄ ዎደ ካህነ ሀላቃትነ ጭማት፥ ቃያፋ ጌተትያ ካህነ ሀላቃ ኬን ሺቅድ፥ 4 አስ ኤሮና የሱሳ ኦይክድ፥ ዎናዉ ማቀትዶሶና። 5 ሽን ኤንቲ፥ "አሳይ ኦሽ ከሶና መላ ግድ፥ ፓስካ ቦንችያ ጋላስ ሄሳ ኦኮ" ያግዶሶና።

የሱሳ ሽቶ ትይዳ ማጫስዉ

6 የሱሲ ብታነ ካታማን ባሮ ሀርግዳ ስሞና ሶን ደኤስ። 7 የሱሲ እማቱዋ ቦላ ደእሽን እስ ማጫስያ አልባስፅሮሳ ብልቃፀ ኩመ ዳሮ አልኦ ሽቶ ኤካ ያዳ የሱሳ ሁጰን ትጋሱ።✝26:7 ሉቃ 7:37. 8 ሽን የሱሳ ታማረት ሄሳ በእድ ሀንቀትድ፥ "ሀ ሽቶይ ጮ ኢተይ አይብሴ? 9 ሀ ሽቶይ አልኦ ጋተን ባይዘትድ፥ ሚሸይ ማንቆታስ እመታናዉ ዳንዳኤቴስ" ያግዶሶና።

10 የሱሲ ኤንቲ ገይሳ ኤርድ፥ ኤንታኮ፥ "ሀ ማጫስዉ አይስ ዋይሰቲ? እያ ታዉ ሎኦባ ኦሱ። 11 ማንቆት ኡባ ዎደ ህንተራ ዳና። ሽን ታኒ ህንተራ ኡባ ዎደ ደእከ።✝26:11 ዛረ 15:11. 12 እያ ሀ ሽቱዋ ታ ቦላ ትግዳይስ ታና ሞጋናዉ ጊግሳናሳ። 13 ታኒ ህንተዉ ቱማ ኦዳይስ፤ ቢታ ኡባን ሀ ዎንገላይ ሳባከትያ በሳን አዉንካ፥ አሳይ እዮ ሀሳያና መላ እያ ኦዳይስ ኦደታና" ያግስ።

ይሁድ የሱሳ አድ እሙዋ

14 ሄ ዎደ ታማነ ናምኡ የሱሳ ታማረታፐ እሶይ፥ አስቆሮታ ይሁዳ ጌተተይስ ካህነ ሀላቃታኮ፥ 15 ብድ፥ "ታኒ ህንተዉ የሱሳ አ እምኮ፥ ህንተ ታዉ አይ እማኔ?" ያግድ ኤንታ ኦይችስ።✝26:15 ዛካ 11:12. ኤንቲ ዞረትድ ሀስታሙ ብራ ሳንትመ*26:15 ብራ ሳንትመ፦ አይኮይካ ጉዠትቦና ጌሻ ብራ ሳንትመ ጉሱ።*26:15 ሀስታሙ ብራ ሳንትመ፦ ሀስታሙ ብራ ሳንትመይ እስራኤለ ቢታን አይለይ ሻመትያነ ባይዘትያ ጋተ። እምዶሶና። 16 ሄሳፈ ጉየ፥ ይሁድ የሱሳ አድ እማናዉ እንጀትያ ዎደ ዎቼስ።

ጎዳ ካሁዋ

17 ኡይ ባኣለ ቦንችያ ኮይሮ ጋላስ፥ የሱሳ ታማረት እያኮ ይድ፥ "ፓስካ ቦንችያ ጋላስ ኔኒ ማና ካ ኑኒ አዉን ጊግስኖ?" ያግዶሶና።

18 የሱሲ ኤንታኮ፥ "ካታማን ደእያ አድያኮ ብድ፥ ‘አስታማረይ፥ ታዉ ዎደይ ጋክዳ ግሾ፥ ታ ታማረታራ ፓስካ ቦንችያ ጋላሳ ነ ሶን አና ያጌስ’ ያግተ" ያግስ።

19 እያ ታማረት የሱሲ ባንታና ኪትዳይሳዳ ኦድ፥ ፓስካ ባኣለ ጋላስ ማና ካ ጊግስዶሶና።

20 ሳአይ ኦማርስያ ዎደ፥ የሱሲ ታማነ ናምኡ ሀዋረታራ ካ ማናዉ ኡትስ። 21 ኤንቲ ምሽን፥ የሱሲ ኤንታኮ፥ "ታኒ ህንተዉ ቱማ ኦዳይስ፤ ህንተፈ እስ ኡራይ ታና አድ እማና" ያግስ።

22 ኤንቲ ዳሮ ዳጋምድ፥ እሶይ እሶይ፥ "ጎዳዉ፥ ቱማ ታነሻ?" ግድ እያ ኦይችዶሶና።

23 የሱሲ ዛሪድ፥ "ባ ኩሽያ ታራ እስፈ ሻትያን የደይስ እ ታና አድ እማና።✝26:23 ማዝ 41:9. 24 አሳ ናአይ፥ ፆሳ ቃላን እያዉ ፃፈትዳይሳዳ ሀይቃና። ሽን አሳ ናኣ አድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን" ያግስ።

25 እያ አድ እማናዉ ደእያ ይሁድ ዛሪድ፥ "አስታማርያዉ፥ ኔኒ ገይ ታነዬ?" ያግስ።

የሱሲ ዛሪድ፥ "ኔኒ ነ ሁጰን ጋዳሳ" ያግስ።

26 ኤንቲ ምሽን፥ የሱሲ ኡይ ኤክድ ፆሳ ጋላትስ። ሄ ኡይ መንድ ባ ታማረታስ እምድ፥ "ሄእተ፥ ሚተ፥ ሀይስ ታ አሹዋ" ያግስ።

27 ፁኣ ኤክድ፥ ፆሳ ጋላትስ። ኤንታዉ እምድ፥ "ኡባይ ሀይሳፈ ኡይተ። 28 ሀይስ ዳሮ አሳ ናጋራ አቶተስ መላ ጉክያ ታ ሱ። ሀ ሱይ ፆሳይ ህንተራ ገልያ ጫቁዋ ምንይሳ።✝26:28 ከሳ 24:8፤ ኤርም 31:31.