1 ያትን፥ አይሁደ ግዶን አይ ዱማተ ደኢ? ዎይኮ ቃፃረተን አይ ማደይ ደኢ? 2 ቱማካ አይሁደ ግዶይ ዳሮ ኦገራ ማዴስ። ኡባፈ ስን ፆሳይ ባ ቃላ ሀዳራ አይሁደታስ እሚስ።

3 ያትን፥ ኤንታፈ እሶት እሶት ቃላ አማኖና እፅኮ፥ ኤንታ እፆይ ፆሳ አማነተ ድግዬ? 4 ድገና! አሳ ኡባይ ዎርዳንቾ ግድኮካ ፆሳይ ቱማ ግዶ። ጌሻ ማፃፋን፥

"ነ ቃላን ነ ፅላሳ፤

ነና ሞተይሳ ፕርዳን ላሳ"

ጌተትድ ፃፈትስ።✝

5 ያትን፥ ኑ ናጋራይ ፆሳይ ፅሎ ግደይሳ በሲያባ ግድኮ፥ ኑ ዎይጋኔ? ፆሳይ ኑ ናጋራ ግሾ፥ ኑ ቦላ ፕርድኮ፥ ልከ ግደነዬ? ሀይሳ ታኒ አሳ ቆፋ ጋይስ። 6 ሄስ ኡባራካ ሀነና። ሄሳዳ ሀንኮ፥ ፆሳይ ሀ አላምያ ቦላ ዋት ፕርዳኔ?

7 ሽን ታ ዎርዶተይ ፆሳ ቱማ ቆንጭስድ፥ እያ ቦንቹዋ ዳርስ በሲያባ ግድኮ፥ ያትን፥ አይስ ታ ቦላ ናጋራንቾዳ ፕርዴቲ? 8 እስ እስ አሳይ፥ "ሎኦይ ያና መላ ኢታ ኦስ" ያግድ ታማርስያዳ ኦድ ታና ሞቶሶና። ሄሳ መላ አሳ ቦላ ያ ፆሳ ፕርዳይ ልከ።

9 ያትን፥ ኑኒ ዎይጋኔ? ኑ አይሁደት፥ አይሁደ ግዶናይሳታፐ አናዬ? ግደና! አይሁደ ግድን፥ አይሁደ ግዶና እፅን ኡባይ ናጋራንቾ ግደይሳ ታኒ ካሰታዳ ህንተዉ ኦዳስ።

10 ጌሻ ማፃፋን፥

"ፅሎ አስ እሶይካ ባዋ።✝

11 አኬክያ አስ ባዋ፥

ፆሳ ኮይያ ኦንካ ባዋ።

12 አሳ ኡባይ ፆሳስ ዞኮ ዛርዶሶና፤

ኡባይ እስፈ ፓናባ ግድዶሶና።

ሎኦ ኦያ ኦንካ ባዋ፤

እስ አስካ ባዋ።

13 ኤንታ ዶናፐ ከይያ ቃላይ፥

ዶየትዳ ዱፎፐ ከይያ ፅንቆ መላ፤

ባንታ እንፃርሳን ጭሞሶና።

ኤንታ ዶናፐ አሰ ዎያ፥

ሾሻ ማርዘይ ከዬስ።✝

14 ኤንታ ዶናን ጫሞ ኦዳይነ ባደ ኩምስ።✝

15 ኤንቲ ሱ ጉሳናዉ ኤለሶሶና።✝

16 ኤንታ ኦግያን ዮይነ ቆሆይ ደኤስ።

17 ኤንቲ ሳሮተ ኦግያ ኤሮኮና።

18 ባንታ ደኡዋን ፆሳስ ያዮኮና"

ጌተትድ ፃፈትስ።✝

19 አሰ ኡባ ዶና ኦይናዉነ ኩመ አላምያ ፆሳ ፕርዳፈ ጋርሳን ሺሻናዉ፥ ህገይ እመትዳይ ህገፈ ጋርሳን አቀይሳታስ ግደይሳ ኑ ኤሮስ። 20 ሄሳ ግሾ፥ ኦንካ ህገስ ኪተትድ ፆሳ ስንን ፅላናዉ ዳንዳኤና። ህገይ አስ ኡባይ ናጋራንቾ ግደይሳ በሴስ።✝

21 ሽን ሀእ ፆሳይ አስ ህገይ ባይናሽን ፅልያ ኦገ ቆንጭስስ። ሄ ኦግያ ሙሰ ህገይነ ናበት ማርካትዶሶና። 22 ሀ ፅሎተ፥ ፆሳይ የሱስ ክርስቶሳ ባጋራ አሳ ኡባስ ሻኮይ ባይና እሜስ።

23 አሳ ኡባይ ናጋራ ኦዶሶና፤ ፆሳይ ኤንታዉ እምዳ ቦንቹዋፈ ሃክድ አትዶሶና። 24 ሽን ኤንቲ ፆሳ አ ኬሀተን፥ ዎዝያ ክርስቶስ የሱሳ ባጋራ ጮ ፅልዶሶና። 25 ፆሳይ የሱስ ክርስቶሳ ያርሾ ኦድ እምዳይ፥ እያ አማንያ ኡባይ እያ ሱን ናጋራ አቶተ ደማና መላሳ። ፆሳይ ሄሳ ኦዳይ ባ ዳንዳአን ካሰ ናጋራ ታይቦና አግድ፥ ባ ፅሎተ በሳናሳ። 26 ሀእ ዎድያን የሱሳ አማንያ ኡባ ፅልስድ፥ ፆሳይ ባ ሁጰን ፅሎ ግደይሳ በሴስ።

27 ያትን፥ ኑ ጬቀትያባይ አይብ ደኢ? አይብካ ባዋ። ኑኒ ጬቀተይ ህገስ ኪተትያ ግሾዬ? አካይ! አማኖ ግሾሳ። 28 ፆሳይ አሰ ፅልሰይ አማኖናፐ አትሽን፥ ህገስ ኪተተን ግዶናይሳ ኑ አኬኮስ።

29 ዎይኮ ፆሳይ አይሁደታ ፃላላ ፆሰዬ? አይሁደ ግዶናይሳታስ ፆሰ ግደነዬ? ቱማ፥ አይሁደ ግዶናይሳታስካ እ ፆሰ። 30 ፆሳይ እሶ፤ አይሁደታነ አይሁደ ግዶናይሳታ አማኖን ፅልሰይ እያ።✝ 31 ያትን፥ ኑኒ ህግያ አማኖ ግሾ ሻሮስ ጉሰዬ? ግደና! ህግያ ምንስፐ አትሽን።