1 እስራኤለ ቢታ ዳይናት አይስያ ዎደ ሄ ቢታን ኮሽ ከይስ። እስ አደይ ባ ማቸራነ ባ ናምኡ አደ ናይታራ ይሁዳ ቢታን ቤተለመ ካታማፐ ደንድድ ሞአበ ቢታ ጉ ዎደ ያን ዳናዉ በትስ። 2 ሄ አድያ ሱንይ አበመለከ፥ እያ ማቸ ሱንይ ኑሃሞ፥ እያ ናምኡ አደ ናይታ ሱንይ ማሀሎናነ ከለዎና። ኤንቲ ይሁዳ ቤተለመን ደእያ ኤፍራታ ያራ። ኤንቲ ሞአበ ብድ ያን ደእዶሶና።

3 ኤንቲ ያን ደእሽን ኑሃም አዝናይ አበመለከይ ሀይቅን፥ እያ ባ ናምኡ ናይታራ አታሱ። 4 ሄ ናይት ሞአበ ቢታ ማጫ ናይታፐ ኦርፋነ ኡሩቶ ጌተተይሳታ ማችድ፥ ታሙ ላይ ደኣፐ ጉየ፥ 5 ማሀሎንነ ከለዎን ናምአይካ ሀይቅዶሶና። ኑሃማ እ አዝናይነ ናምኡ ናይት ሀይቅን ባርካ አታሱ።

6 እያ ሞአበን ደእሽን፥ ጎዳይ ባ አሳ እስራኤለስ ኬህድ ካ ኤንታዉ እምዳይሳ ስአዳ ባ ናምኡ ናይታ ማቸታራ ሞአበ ቢታፈ ጉየ ስማናዉ ደንዳሱ። 7 እያ ባ ደእያ በሳፈ ናምኡ ባ ናይታ ማቸታራ ጉየ ይሁዳ ኤፍያ ኦገ ቦላ ከይዶሶና።

8 ኑሃማ ባ ናይታ ማቸታኮ፥ "ህንተ ኡባትካ ህንተ አየ ሶ፥ አየ ሶ ስምተ። ህንተ ሀይቅዳይሳታስነ ታዉ ኬህዳይሳዳ ጎዳይ ህንተዉ ኬሆ። 9 ህንተ ገላና አዝናታ ሶን ጎዳይ ህንተዉ ሸምፖ እሞ" ያጋዳ ዬራዳ ኤንታና አንጃሱ።

ኤንትካ ባንታ ቃላ ቁ ኦድ ዬክድ፥ 10 "ኑካ ኔራ ነ አሳኮ ባና" ያግዶሶና።

11 ሽን ኑሃማ ኤንታኮ፥ "ታ ናይቶ ህንተ ሶ ስምተ። ህንተ ታራ አይስ ቤቲ? ህንተዉ አዝና ግዳና አደ ናይታ ህዛፐ ጉየ የላና ዳኒ? 12 ታ ናይቶ ስምተ፥ ታኒ አዝና ገሎናዳ ጭማስ። እ ዎና ታኒ የላና ግያኮ ኡባ ሀች ቃማ አዝና ገላዳ አደ ናአ የልያኮካ፥ 13 ሄሳት ድጭድ ጋካና ጋሶ ኤንታና ናጋነዬ? ኤንታ ግሾ ግድ አዝና ገሎና አታናዬ? ታ ናይቶ፥ ሄስ ሀኖናባ ግደይሳ ህንተ ኤሬታ። ጎዳይ ታና ኡንኤዳ ግሾ ህንተፈ ታ አ ጫመታስ" ያጋሱ።

14 ሄሳን ኤንቲ ባንታ ቃላ ቁ ኦድ ዳርስ ዬክዶሶና። ኦርፍ ባ አዝና አይዉ ዬራዳ ጉየ ስማሱ። ሽን ኡሩታ ኢፐ ሻከትከ ጋዳ ጋንታ ካና ሻሾ ግዳሱ።

15 ኑሃማ ዛራዳ፥ "በአ፥ ነ አዝና እሻ ማችያ ባ አሳኮነ ባ ፆሳታኮ ስማሱ፥ ነካ ኢራ ስማዳ ባ" ያጋሱ።

16 ሽን ኡሩታ ዛራዳ፥ "ታኒ ኔፐ ሻከታና መላነ ነና አጋዳ ጉየ ስማና መላ ታና ዋይሶፓ። ኔኒ ብያ ሶ አዉ ግድኮነ ታ ባና፥ ኔኒ ደእያ ሶ አዉንካ ታኒ ዳና። ነ ደረይ ታ ደረ ግዳና፥ ነ ፆሳይ ታ ፆሳ ግዳና። 17 ነ ሀይቅያ ሶን ታ ሀይቃና፥ ያን ሞገታና። ሀይቆፐ አትሽን፥ ሀራባይ ታና ኔፐ ሻክኮ፥ ጎዳይ ታና ፕርዶ።" 18 ኡሩታ ኢራ ባናዉ ቃንፅዳይሳ ኑሃማ ኤራዳ ስእ ጋሱ።

19 ያፐ ናምኡ ማጫሳት ቤተለመ ጋካናዉ ብዶሶና። ብድ ኤንቲ ቤተለመ ጋክዳ ዎደ ሄ ካታማ አሳ ኡባይ ኤንታባን ማላለትዶሶና። ቃስ ማጫሳይ፥ "ሀና ኑሃሞ?" ያግዶሶና።

20 እያ ዛራዳ ኡባ ዳንዳእያ ፆሳይ ታ ደኡዋ ዳሮ ጫመዳ ግሾ፥ "ታና ኑሃሞ ጎፕተ፤ ‘ማራ’ ጊተ። 21 ታኒ ኩመ ከያዳ ባስ፥ ሽን ጎዳይ ታና መላ ኩሸ ዛርስ። ጎዳይ ታና ካዉሽስ፤ ኡባ ዳንዳእያ ፆሳይ ታና ኡንኤስ። ታና አይስ ኑሃመ ግድ ፄገቲ?" ያጋሱ።

22 ሄሳዳ ሀናዳ ኑሃማ ባ ናኣ ማቸ ሞአበ ኡሩትራ ስማሱ። ኤንቲ ቤተለመ ጋክዳይ ባንግ ቡሮ ጫካ ዶመትያ ዎደና።