1 Kawo wozani Godaa kushena;

iya wozanaa dhawa haathada

ba koyida soo zaarees.

2 Asi oothiyaba ubbay iyaw like daanees;

shin Goday iya wozanaa qofaa paacees.

3 Yarsho yarshanaape aathidi,

xillonne suure ootheysa Goday dosees.

4 Iitati otoroninne ceeqetethan eretoosona;

hessi qassi nagara.

5 Mino oothiya asa halchoy dureyees;

shin eesotiya ubbay manqees.

6 Wordon dagayida shaloy pentoda dhayees;

hessa koyeysati hayqo koyoosona.

7 Iitati suureba oothanaw koyonna gisho,

enta geella oosoy enta ekidi bees.

8 Nagaranchoti geella ogen hemetoosona;

shin geeshshati suureba oothosona.

9 Doonatiya machira issi keethan daanape

kare darmachan duussi lo77o.

10 Iitati iitaba oothanaw amottoosona;

banta shoorotas qadhetokona.

11 Qelqisiya asi seeretiya wode

wozani bayna uray cincatethi tamaarees;

wozanaama uray era demmees.

12 Xillo Xoossay iitata son oosetiyaba ubbaa be7ees;

enta shiri yeggidi dhaysees.

13 Manqota waasuwa si7anaape gidi,

ba haythaa tucciya uray, ika waassana;

I waassin alliya asi dhayana.

14 Geeman immiya imoy hanqo doshisees;

qosan immida wodhaafey hanqo irxisees.

15 Suure pirdi pirdetiya wode,

xilloti ufaytoosona;

shin iita ootheyisata daganthees.

16 Akeeka ogiya haakiya uraa

hayqoy naagees.

17 Injetin daana giya uray manqees;

woynenne zayte dosiya uray duretenna.

18 Xoossa asata ashshanaw iita asati seeretosona;

ammanetona asati suure asata gisho seeretosona.

19 Doonatiyanne yilotiya machira daanape

bazzon de7oy lo77o.

20 Wozanaama uraa son mal7o quminne oysi minjettees;

shin eeya asi de7iyaba ubbaa midigees.

21 Xillotethinne siiqo koyiya uraa laythay aduqees;

he uray xillotethinne boncho demmees.

22 Wozanaama asi wolqaama olanchota katamaa olidi oykees;

enti ammanetiya mino miixaa laallees.

23 Ba doonanne ba inxarsaa

naagiya asi bana metope naagees.

24 Otoreynne ceeqetey qelqisiya asi;

I otorancho gidida gisho asas qopenna.

25 Oothanaw koyonna gisho

azalla amoy wodhees.

26 Azalla asi ubba wode darobaa demmanaw amottees;

shin xilloy baw ashshona immees.

27 Goday iitata yarshuwa ixees;

enti iyaw iita qofan shiishiya yarshuwa aathidi ixees.

28 Wordo marki dhayana;

shin tuma marki eqidi daana.

29 Iita asi bessona xaala xaalees;

shin suure asi yuushshi qopees.

30 Asi ba cincatethan, akeekaninne zoren

Godaara eqetanaw danda7enna.

31 Olas para kooranaw danda7etees;

shin xoonoy Godaaba.