1 Daro wode seeretidi simmonna asi

hassayonna meqana;

he uraas paxoy baawa.

2 Xillo asati shuumetiya wode asay ufaytees;

shin iitati biitta haariya wode asay un7etees.

3 Cincatethi dosiya asi ba aawa ufaysees;

shin layma maccasa heeran yuuyiya asi ba miishiya wursees.

4 Tuma pirdan kawoy ba kawotethaa wopu oothees;

shin wodhaafe ekiya kawoy ba kawotethaa dhaysees.

5 Ba shooruwa cimon sabbiya asi,

ba tohos xihe yeggees.

6 Iita asi ba nagaran oyketees;

shin xillo asi ufaytees; yexees.

7 Xillo asi manqotas suure pirdees;

shin iita asati hessa erokona.

8 Cayiya asati kataman ooshshu denthoosona;

shin cinca asati hanqo irxisoosona.

9 Cinca asi eeya asa pirda keethi efiko,

eeyay hanqetees; qidhees; iyaw saroy baawa.

10 Suuthu gussanaw saamotiya asati suure asi ixoosona;

xillo asaa wodhanaw koyoosona.

11 Eeya asi ba hanquwa yeddi bessees;

shin cinca asi bana haarees.

12 Shuumay wordo oda si7iyaba gidiko,

iya moorinnati ubbay iita gidoosona.

13 Manqoynne ase naaqiya asi issiba koxoosona;

enta nam7aas ayfe immiday Godaa.

14 Kawoy manqotas suure pirdiko,

I ba araatan gam7ana.

15 Pircon seeri naytas cincatethi immees;

shin yedan diccida na7i ba aayiw kawushshees.

16 Iita asati dariya wode nagari darees;

shin xilloti enta kundethaa be7ana.

17 Ne na7aa seera;

I new saro immana;

I nena ufaysana.

18 Qoncethi bayna ixiko derey yeda gidees;

shin higge naagiya asi anjetidaysa.

19 Aylley coo oda xalaalan seeretenna;

iyaw geliyakoka I kiitetenna.

20 Eeson haasaya asi be7a eray?

Iyape eeya asas ufaysi de7ees.

21 Ne aylliya na7a yeda dichiko,

iya wursethay azzano gidana.

22 Hanqetiya asi ooshshu denthethees;

elle yilotiya asi daro nagara oothees.

23 Otoroy ase kawushshees;

shin ashke ayyaani de7iya asi bonchetees.

24 Kaysora laggetiya asi bana ixiya asi;

I dabaaban tuma odiko seeretees;

I tumaa odonna ixiko Godan baadetana.

25 Asas yashshi he uraas xihe gidees;

shin Godan ammanetiya asi saro de7ees.

26 Daroti maati de7iya asape made koyoosona;

shin suure pirdi Godaape bentees.

27 Xilloti nagaranchota shaatettoosona;

iitati suure asaa ixoosona.