1 Isra7eele asawu! Intte gishshas

ta zilaliza zilas siyite.

2 «Geela7oya Isra7eeley kundadus;

nam7anththo dendanaas

dandayukku;

izo maaddi denththanay

baynda gishshas

iza barkka ba deren

kunda attana.»

3 Ubbaa Haariza GODAY,

«Isra7eele katama issineyppe

1,000 olanchchati olas baanashin

isttafe hayqqontta paxa attanay

100 asata xalla gidana;

hara katamappeka 100

ola asati olas baanashin

isttafe 10 asi xalla

simmi yaana» gides.

4 GODAY Isra7eele asaas,

«Isra7eele asawu!

Haa taakko simmite;

intte hayqqontta de7ana.

5 Intte Bersaabehe boopite;

Beeteley laalettada

mulera dhayana;

Gelgelan diza asay di7ettana;

hessa gishshas Beetele gidiin

woykko Gelgela boopite» gides.

6 Haa Xoossaako simmite;

histtiko intte shemppora

paxa de7ana;

akkay giikko Xoossi

tama mala

Isra7eele deraa maana;

Beetelen dizaytakka

tamay maana;

he tama toyssanay

isttas beettenna.

7 Intteno pirda geellasizaytoo!

Tumakka gede wordon

laammizayto

inttes aayye ana!

8 Piliyaadise geetettiza laappun

xoolinttetanne

Oryoone geetettiza

issi bolla diza

xoolintteta medhdhiday

gallassaa omarsan,

omarsa gallassan laammizay,

abba haath azazidi

biitta bolla gogissizay,✝

9 wolqqamatanne istta miixata

laalli dhayssizay iza;

izas sunththayka Xoossa.

10 Intte qasse inttena pirdason

hanqizaade ixxeeta;

tumu haasayzaadekka kadheeta.

11 Manqota un7eththeeta;

istta wolqqara kath giiriseeta;

inttes masettida shuchchafe

keeth keexxideta shin

he keeththan deekketa.

Aradda biittan woyne miththa

tokkideta shin izappe

agettida woyne ushshu uyekketa.

12 Intte qohoy ay mala darokkonne

intte nagaray ay mala deexokko

ta erays;

intte xillo asata un7eththeeta;

matta7e ekkidi pirdason

manqotas geella pirdeeta.

13 Hessa gishshas he wode

wodey iita gidida gishshas

akeekay diza asi co7u gees.

14 Intte shemppora paxa de7ana mala lo7oppe attiin iita ooththofte; intte hessaththo ooththiko intte gida mala GODAY Salo Xoossay inttenara gidana. 15 Iita miish ixxite; lo7o gididaaz dosite; pirda pirdizason tumu pirda geellasopite. GODAY Salo Xoossay attida Isra7eele asaa maaranaakko oonee erizay?

16 Hessa gishshas GODAY Salo Xoossay,

«Oge bollanne dubbushay dizason

ubbaan waasoynne yeehoy

siyettana;

goshshanchchati koyssas

zilalizayti yeehos xeygettana.

17 Woyne miththi tokettizason

ubbaan yeeho xalla gidana;

hessika wuri hananay ta intte

giddora aadhdhiza gishshassa» gees.

18 Intteno GODAA gallas naagizaytoo!

Inttes aayye ana!

He gallassay dhumappe attiin

poo7o gallas gidontta gishshas

intte ays he gallassa koyeetii?

19 He gallassay asi gaammofe attanaas

qotettishe zardora gaaggiza mala

woykko kessi ekki baso gelidi

ba kushen keeththa goda oykkiin

shooshshi dukkida mala hanana.

20 GODAY pirdiza gallassay

inttes dhumappe attiin

poo7o gidenna;

he gallassay izan

aykko poo7oykka baynda

girdi gida dhuma gidana.

21 «Tani intte layththan

layththan bonchchiza

ba7aaleza kadhayssinne ixxays;

intte goynos shiiqiza shiiqoykka

tana ufayssenna.

22 Taman xuugettiza yarshonne

kaththa yarsho

intte taas shiishshikokka

ta hessa inttefe ekkike;

dhiikettida intte mehetappe

intte taas issifeteththa

yarshos shiishshiko

ta iza ayfenka xeellike.✝

23 Intte yexxishe

ta hayththan kaccofte;

intte diiththa giiris

ta siyanaas koykke.

24 Gido attiin tumu pirday

goggiza haaththa mala;

xilloteththika miccontta

pultto mala goggo.

25 «Isra7eele asawu!

Tumappe intte oyddu tammu

layth bazzo biittan diza wode

tumu yarshonne kaththa xeera

taas shiishshidetii?✝

26 Intte inttes ooththida,

‹Kawo Zakute› geetettiza

eeqa xoossaza;

qasseka, ‹Kewene› geetettiza

intte medhdhi kessida xoolintte

misatiza eeqa xoossata tookkideta.

27 Tani inttena Damasqofe gede haassa gooddana» gees GODAY Salo Xoossay.