1 Xiyoonen badhdhi gi uttidaytoo! Samaariya zuma bolla hirgay baynda dizaytoo! Isra7eele asay maado koyidi intteko yizaytoo! Intteno dere halaqatoo! Inttes aayye ana! 2 Ane intte gede Kalanahe katama biidi xeellite; heeppeka aadhdhidi Hamaate geetetti xeygettiza gita katamayonne duge Filisxeeme katama Geete wodhdhite; istti intte nam7u kawoteththatappe lo7izoo? Istta biittay intte biittafe aakkizee? 3 Intte qasse, «Iita gallassi elle gakkenna» giza qofan intte daannateththan gene ooso eesoseeta. 4 Intte danggarsa zaaleppe oosettida algan ichcheeta; ohala laaqqa ashonne mara asho mishe soofa bolla utti shempeeta. 5 Dawite mala yeththa miish inttes giigsidi bagananinne dumma dumma mazamure yexxizaytoo! 6 Woyne ushshu birillera gidontta otora uyizaytoo! Keehi al7o gidida shitto tiyettizaytoo! Isra7eele deraa bolla gakkida meto gishshas qadhettonttayto inttena aayye ana!

7 Hessa gishshas heera asappe

koyro intte di7ettana;

he wode intte kase ufayssan

guppiza gufaynne

badhdhi gi diza duussi attana.

8 GODAY Salo Xoossay,

«Isra7eele asa otoreteththaa

tani harassettadis;

istta miixatikka

tana shuunneettes;

hessa gishshas tani katamayonne

izin dizayta ubbaa

morkkes aaththa immana» giidi

barkka banan caaqqides.

9 Issi keeththan tammati attiko he attidaytikka hayqqana. 10 Hayqqidaytappe issaades mata dabbo gididaadeynne moogo woga polizaadey ahaza keeththafe kessi efana; he wode izaadey soon diza issi as xeygidi, «Nenara attida hara asi dizee?» giidi iza oychchana shin izaadey qasse, «Attida asi oonikka deenna» gaana. Oychchizayssika zaaridi, «GODAA nu Xoossa sunth xeyganaas bessontta gishshas co7u ga!» gaana.

11 GODAA azazon

wogga keeththati laalettana;

guuththa keeththatikka

laaletti attana.

12 Paray shuchcha bolla togettizee?

Goshshanchchay abba giddon

boora waaxi goyanaas

dandayzee?

Intte gidikko

pirda marzen laammideta;

tumakka gede camon shirdeta.

13 Intte Lodibaare katama

xoonida gishshas ufayettideta;*

«Qarnayme katamayo

nuni nu wolqqan oykkidos»

gidi ceeqetteeta.*

14 GODAY Salo Xoossay,

«Isra7eele asawu!

Tani intte bolla

hara wolqqama dere denththana;

hessika pudeha baggafe

Hamaate pengefe doommidi

dugeha baggara Arabe

shoobba gakkanaas inttena

un7eththana» gees.