1 Nabe Imbaaqoy yeththan shiishshida woossa.

2 Abeet GODAWU!

Ta ne goobateththa

gishshas siyadis.

GODAWU ne oosoykka

tana yashissides;

neni ne ooso

nu woden ooraththa;

ne oosoti nu wodenkka

erettana mala ooththarkkii!

Hanqo wodekka

maaroteth qopparkkii!

3 Xoossi Temaaneppe Geeshshayka

Paaraane zuma bollafe yides;

Iza bonchchoy

salo kammi oykkides;

Iza galataykka

biitta bolla kumides.

4 Iza poo7oy awa arshe poo7o mala;

awa xalqqey

iza kusheppe kezides;

iza wolqqayka heen qotettides.

5 Iita hargey

izappe sinththara bides;

hada hayqoykka

iza geedo kaallides.

6 Izi eqqiin biittay qaaxxides;

izi xeellidi asaa kokkorisides;

Mernaas diza zumati

laaleteth piski gida;

Beniisofe diza

zumatikka woddida;

Iza ogey mernaassa.

7 Tophphiya dunkaaneti

metotettishin,

Midiyaameta duussasoy

bul7akettishin ta beyadis.*

8 GODAWU! Ne haaththata bolla

hanqettadii?

Ne hanqoy haaththa

pulttota bolla dizee?

Neni ne paratanne

xooniza para-gaareta toggada

kaaleththida wode abba bolla

hanqettadii?

9 Neni ne wondafe giigsadasa;

yiishshay nees yaana mala

azazadasa;

biitta phalqada haath kessadasa.

10 Zumati nena be7idi mannida;

Haaththaa dambalay

aadhdhi bides;

abbay ceeqettides;

abbaa dambalakka

pude denththides.

11 Ne pirisa yeddida

ne yiishshatappenne

xolqettiza ne toora poo7oppe

dendidayssan arsheynne

aginay ba dizason eqqi attida.

12 Neni biitta bolla

hanqon simerettadasa;

deretakka hanqon yedhdhadasa.

13 Neni ne dere ashshanaasinne

ne tiydaade ashshanaas kezadasa,

iita dere kaaleththizaade

liiqisadasa,

hu7eppe toho xugunth gakkanaas

kallo ashshadasa.

14 Gote carko mala

nuna laallanaas yidayssa,

aykkoy baynda manqoza

geemara mittanaas amottizayssa,

olanchchata halaqa gididayssa

iza tooran

iza zaara caddadasa.

15 Neni abba ne paratan

yedhisiza woden

ciimma abbay qaaxxees.

16 Tani siyadis;

ta wozinaykka dagammides;

Iza giirssafe dendidayssan

ta metershay kokkorides.

Babon taas maracey qaaxxides.

Taas gulbatey kokkorides;

gidikkoka nu bolla

worajjiza dereza bolla

metoy yaana gallas

ta gencca naagays.

17 Balase geetettiza miththay

ayfontta aggikokka

woyne miththafe

ayfey beettontta aggiko

wogara miththika ayfontta aggiko

goshsha gadey

kath immontta aggiko

Dorsi yiren dontta aggikokka

Miizi zedhen dontta aggikokka

18 Tani ta GODAAN ufayettana;

ta izan attida

Xoossan ufayettana.

19 GODA Ta Xoossay taas wolqqa;

ta tohota izi

genessa toho mala minththo;

izi tana dhoqqasohora hemeththana.

Yexxizayta kaaleththizaades

yeththa miishshan yexettida mazamure.✝