1 Amoxe naa Iyosiyaasi Yuhudan kawotida wode Hizqiyaasa naa, Amaariya naa, Godoliyaasa naa, Kuushe naa Sofonaasakko yida GODAA qaalay hayssafe kaallizayssa.✝

2 GODAY, «Tani biitta bolla

dizaaz ubbaa dhayssana» gees.

3 GODAY, «Asenne medosata dhayssana;

salo kafotanne abba giddon diza

moleta ta dhayssana;

ta asa zereth biitta bollafe

dhayssiza wode

iitati laalettida buura doore mala

gidana» gees.

4 GODAY, «Tani Yuhudaninne

Yerusalaamen diza

as ubbaa qaxxayana;

qasseka Ba7aale,

istta eeqa xoossatanne

laymatiza qeeseta hayssafe ta

milxi histta dhayssana.✝

5 Fooqe bolla kezidi

salo medheteththatas

goynnizayta,

GODAAS goynnishenne

iza sunththan caaqqishe

simmi wodhidi qasse

Milkkoome sunththan

caaqqizayta,

6 GODAA kaallanaappe guye

simmizayta,

GODAA koyonttayta,

izi istta maaddana mala

oychchonttayta

ta dhayssana» gees.

7 GODAA gallassay matida gishshas

Ubbaa haariza GODAA sinththan

co7u giite;

GODAY yarsho giigsides;

ba xeygidayta baas dummasides.

8 «GODAA yarsho gallas

daannatanne kawoza nayta,

imaththa may7o may7izayta

ubbaa ta qaxxayana.

9 He wode allaga xoossata

pengen guppizayta,

bantta godata keeththaa

makkallateththaninne

baleththon kunththizayta

ta qaxxayana» gees GODAY.

10 GODAY, «He wode

mole penge baggara waasoy,

katamaas nam7anththo

dubbushan yeehoy,

zumbullata bolla

gita shiroy siyettana.

11 Intteno Makitesha giyan

dizaytoo! Waassite;

gaasoykka izan zal7iza

zal7anchchati

ubbay wurana;

biran zal7izaytikka

ubbay hayqqana.

12 He wode ta Yerusalaame giddoza

xomppera koyana;

aykko hirgay baynda

badhdhi gi uttidayta,

woyne ushshu gacci ekkichchiin

orcco bolla attida

woyne ushsha mala gididayta,

‹Iita gidiin woykko lo7o gidiin

GODAY aykkoka ooththenna›

gizayta ta qaxxayana.

13 Istti haarida haaroy bonqqettana;

istta keeththay laalettana;

istti keeth keexxanashin

ba keexxida keeththan deettenna;

woyne mith tokkanashin

ba tokkida woynezappe oosettida

ushshaa uyettenna» gees.

14 «GODAAPPE yaana

gita gallassay matides;

hessika eeson yaana;

GODAA gallassan siyettana

yeehoy camo;

heen olanchchati

camo waaso waassana.

15 He gallassay bashsha gallas,

metonne ceece gallas,

shironne dhayssa gallas,

dhuma gallassinne tulala gallas,

Shaaranne girdi gida dhuma

gallas gidana.

16 He gallassay

gimbettida katamata bollanne

adussa gimbeta bolla

ola zayeynne

ola waasoy

siyettiza gallas gidana.

17 Asay qooqeththo hemettana mala

asaa bolla tani ceece yeddana;

asay GODAA bolla nagara

ooththida gishshas

istta suuththi di7o mala gukkana;

istta ahaykka

buura mala olettana.

18 GODAA bashsha gallas

istta biraynne worqqay

istta ashshanaas dandayenna.

Biittay kumeth

iza hanqon dhayana;

iza zil7eteththa suulen

biitta ubbay xuugettana;

biitta bolla diza ubbaa bolla

qoppontta dishin wurseth ehana»

gees GODAY.