1 Intteno yeellay baynda deretoo!

Ane issi bolla shiiqite!

2 Bashsha gallassay

gakkanaappe kasetidi,

he gallassay suulla mala denththi

dhayssontta dishin,

GODAAPPE mino hanqoy

intte bolla yontta dishin

GODAAPPE bashsha gallassi

intte bolla gakkontta

dishin shiiqite.

3 Intteno biitta bolla diza ashketoo;

iza azazokka polizaytoo!

GODAA koyite;

Xilloteththinne ashketeth koyite;

GODAA hanqo gallassafe

intte attanaakko

oonee erizay!

4 Gaazay bula biitta gidana;

Asqeloonaykka laaletta attana.

Azaxooney seeta gallas kayzana.

Aqarooney shodettana.

5 Intteno abba achchan dizaytoo!

Kelite dere asatoo,

inttes aayye ana!*

Filisxeeme dere asay diza

Kanaane biittayee!

ne bolla yootettida

GODAA qaalay

hayssafe kaallizayssa;

«Ta nena mulera dhayssana;

nenan diza asappe

attana asi deenna.

6 Kaalite asay diza

abba achcha biittay

heenththanchchata duussasonne

dorsa yire gidana.

7 Hessika Yuhudappe casha

attidaytas gidana;

isttika heen baas

aqota demmana;

Gadey qammishin

Asqeloona kataman diza

keeththatan aqana;

GODAY istta Xoossay

istta naagana;

isttafe di7ettidayssaka

isttas zaarana.»

8 GODAY,

«Mo7aabe asay cayizayssanne

Amoone asay qidhizayssa

ta siyadis.

Ta deraa cayida;

istti ta deraa bollaka

mandida» gees.✝

9 Hessa gishshas GODAY Ubbaafe

Wolqqama Isra7eele Xoossay,

«Tani ta de7o

Xoossateththan caaqqays;

Mo7aabey Sodoome mala

Amooney Gamoora mala,

sharafay may7idaso malanne

maxine bookki ekkida olla mala

mernaas bula gidana.

Ta asaappe casha attidayti

istta haaro bonqqananne

istta biittaa laattana» gees.✝

10 Bantta otoroteththafe dendidayssan

istti Ubbaafe Wolqqama

Xoossa deraa cayida

gishshassinne

qidhida gishshas

hessi istta bolla gakkana.

11 GODAY he biitta eeqa xoossata

ubbaa dhayssiza wode

izi istta yashissizayssa gidana;

Abba achchan diza dereti ubbay

issoy issoy ba dizason dishe

izas goynnana.

12 «Intteno Tophphiya asatoo!

Intte ta mashshan siifettana.»✝

13 Izi ba kushe pudeha baggan diza

dereta bolla denththana;

Asoore dhayssana.

Nannawekka bulasana;

bazzo biitta mala melissana.

14 Dorsa wudeynne mehe wudey,

medheteththaafe ubbaa qommoy

heen shempana.

Guttoynne Quxarsi

izi gimbetan aqana.

Istta waasoy maskootetara

seetettana.

Gimbeza laaleththi issaa

issaa pengen doorettana;

keeththata tookki eqqida

ziga godati kallottana.

15 Kase ufayssan diza

katamaya hanno;

izakka ba wozinan,

«Ta xalla days;

taappe haray

oonikka deenna» gidaara

histtiin ha7i waanada

wora do7ati guurizaso

bazzo biitta gida attadee?

Izi achchara aadhdhi biza ubbay

izo qidhishe ba kushe wuxxees.✝