1 हम जो परमेश्वर कामआला हइ यो भी समझस हइ, अरु परमेश्वर को अनुग्रह जो तुम पर हुयो का बेकार नी र्‍हेन दे. 2 क्युकि उ तो बोलस हइ,

"अपनी प्रसन्नता का टेम मेने तरी सुनी ली, अरु उध्दार का

दिन मेने तरी मदत करी."

देखनु, अभी प्रसन्नता को टेम हइ.

देखनु, अभी उध्दारको दिन हइ.✝

3 हम कोय बात मे ठोकर खान खे कोय भी अवसर नी दे, कि हमारी सेवा पर कोय इलजाम नी आह्ये. 4 पर हर बात मे परमेश्‍वर को सेवकहोन का जसा अपना सदगुनहोन खे प्रगट करस हइ, बडो हिम्मत से, दुखहोन से, दरिद्रता से, संकटहोन से, 5 कोडा खाना से, बन्दीगृह होना से, जादा से, मेनत से, जागता र्‍हेन से, उपास करणा से. 6 नीष्कपट से, ज्ञान से, धीरज से, कृपालुता से, पवित्र आत्मा से. 7 सच्चा प्रेम से, सच्ची को वचन से, परमेश्वर को सामर्थ्य से. धार्मीकता का हथियारहोन से जो जवनो, डाखोर्यो हइ, 8 सम्मान अरु अपमान से, दुर्नाम अरु सुनाम से, अगर भरमानआला, असा मालूम होस हइ ते भी सच्ची हइ. 9 अनजानहोन को सदृश्य हइ. ते भी प्रसिद्ध हइ. मरता हुया, असा हइ अरु देखनु जिन्दो हइ. मार खानआला का सदृश हइ पर जान से मार्या नी जाय. 10 दुख करणआला, जसा हइ, पर सर्वदा आनन्द करस हइ, कंगालहोन खे असा हइ, पर भोतजन खे धनवान बनैइ देस हइ. असा हइ जसा हमारा पास कुछ नी फिर भी सब कुछ रखस हइ.

11 हे कुरिन्थवासी हमने खुली खे तुम से बातहोन करी हइ, हमारो दिल तुमारा तरफ खुल्यो हुयो हइ. 12 तुमारा लिये हमारा मन मे कुछ संका नी, पर तुमारा ही मनहोन मे संका हइ 13 पर अपना बच्चाहोन जानीखे तुम से बोलुस हइ, कि तुम भी ओका बदला मे अपनो दिल खोली दे.

14 अविश्वासीहोन नी रखनआला का साथ असमान जुवाडो मे नी जोतनु क्युकि धार्मीकता अरु अधर्म को का मेल जेल? या उजालो अरु अंधारा की का संगत? 15 अरु मसीह को बलियाल का साथ का लगाव?अरु विश्वासी का साथ अविश्वासी नी रखनआला को कोनतो नातो? 16 अरु मूर्ती का साथ परमेश्वर कि मन्‍दिर को नातो? क्युकि हम तो जीन्दो परमेश्वर कि मन्‍दिर हइ.

जसो परमेश्वर ने बोल्यो हइ

"मी उनमे बस्यु अरु उनमे चल्यो फिर्या कर्यु.

अरु मी उन को परमेश्वर हूयु,

अरु वे मरा दुन्या हुये."✝

17 येका लिये प्रभु बोलस हइ,

उनका बीच मे से नीकलनु

अरु अलग र्‍हेनु.

अरु अशुध्द चिज खे मत छिनु,

ते मी तुमखे ग्रहण कर्यु.

18 अरु तुमारो बाप हूयु,

अरु तुम मरा बेटा अरु बेटिहोन हुये.

सेनाधिश* परमेश्वर असो बोलस हइ.✝