1 "उनखे पवित्र करन खे जो काम तोखे उनसे करनु हइ कि वे मरा लिये याजक को काम कर्ये उ यो हइ: एक निर्दोष बपट्टीहोन अरु दो निर्दोष मेडा पकडनो 2 अरु अखमीरी रोटी, अरु तेल से ओसन्यो हुयो मैदा कि अखमीरी पुरी, अरु तेल से चोपड़ी हुइ अखमीरी पापड़होन भी लेनु. ये अभिषेक सब गहु को मैदा को बनानु. 3 इनखे एक टोपली में रखीखे वा टोपली खे उ बपट्टीहोन अरु वे दो मेडा का सात नजीक ली आनु."

4 फेर हारुन अरु ओका बेटाहोन खे मिलापवाला तम्बू का द्वार का नजीक ली जाइखे पाणी से आगधोलानु. 5 तब वे कपडा खे लिखे हारुन खे लंम्बो कोट अरु एपोद को कुर्तो पहनानु, अरु एपोद अरु सीनाबन्द बाधनु, अरु एपोद को बनायो हुयो पटुको भी बाधनो; 6 अरु ओका माथा पर पगड़ी खे रखनु, अरु पगड़ी पर पवित्र मुकुट खे रखनु. 7 तब अभिषेक कर्यो तेल ले ओका माथा पर डालीखे ओखे अभिषेक करनु. 8 फेर ओका बेटाहोन खे नजीक लीखे उनखे लंम्बो कोट पहनानु, 9 अरु ओका अर्थात् हारुन अरु ओका बेटाहोन का कंमर बाधनु अरु उनका माथा पर टोपिहोन रखनु; जेकासे याजक का पद पर सदा उनको हक्क रिये. यो प्रकार हारुन अरु ओका बेटाहोन खे संस्कार करनो. 10 तब बछडा खे मिलापवाला तम्बू का सामने नजीक ली आनु. अरु हारुन अरु ओका बेटा बछडा का माथा पर अपनो-अपनो हाथ रख्ये, 11 तब उ बछडा खे यहोवा का सम्मुख मिलापवालो तम्बू का द्वार पर बलिदान करनु, 12 अरु बछडा को खुन में से कुछ लिखे अपनी उगली से वेदी का सींग पर लगानु, अरु बच्यो सब खुन खे वेदी का पाए पर उल्टइ दियो, 13 अरु जो चर्बी से अंतड़िहोन झाकी रेस हइ, अरु जो पडदो कलेजा का उपर होस हइ, उनखे अरु दोइ गुर्दा खे ओका उपर की चर्बी समेत लिखे सबखे वेदी पर जलानु. 14 परन्तु बछडा को मटन, अरु चामडा, अरु लेडी, डेरा से बाहर अंगार में जलइ देनु; क्योंकि वा पापबलि हुये. 15 फेर एक मेडा लेनु, अरु हारुन अरु ओका बेटा ओका माथा पर अपनो-अपनो हाथ रखनु, 16 तब उ मेडा की बलि करनु, अरु ओको खुन लिखे वेदी पर चारी तरप छिड़कि देनु. 17 अरु उस मेडा खे टुकडा-टुकडा काटनु, अरु ओकी अंतड़िहोन अरु पाय खे धोइखे ओका टुकडा अरु माथा खे सात मे रखनु, 18 तब उ पूरा मेडा खे वेदी पर जलानु; उ तो यहोवा का लिये होमबलि हुये; उ सुखदायक सुगन्ध अरु यहोवा का लिये हवन हुये.✝29:18 इपिसियो 5:2; फिलीपियो 4:18 19 फेर दूसरा मेडा खे लेनु; अरु हारुन अरु ओका बेटा ओका माथा पर अपनो-अपनो हाथ रखनु, 20 तब उ मेडा की बलि करनु, अरु ओका खुन में से कुछ लिखे हारुन अरु ओका बेटाहोन का जवनो कान का माथा पर, अरु उनको जवनो हाथ अरु जवनो पाय का अंगूठा पर लगानु, अरु खुन खे वेदी पर चारी तरप छिड़की देनु. 21 फेर वेदी पर छिडक्यो खुन मे से, लेनु अरु अभिशेक को तेल मे से लेनु, ये दोइ में से तोडो-तोडो लिखे हारुन अरु ओका कपडा पर, अरु ओका बेटाहोन अरु उनका कपडाहोन पर भी छिड़कि देनु; तब उ अपना कपडा समेत अरु ओका बेटा भी अपना-अपना कपडाहोन समेत पवित्र हुइ जाये. 22 तब मेडाखे संस्कार आलो जनवर मे से चर्बी अरु मोटी पुस्टी को, अरु जो चर्बी से अंतड़िहोन झाकी रेस हइ ओखे, अरु कलेजा पर को चमडा खे अरु चर्बी समेत दोइ गुर्दा खे, अरु जवनी जाघ खे लेनु, 23 अरु अखमीरी रोटी की टोपली जो यहोवा का आगे धरी हुये ओमे से भी एक रोटी, अरु तेल से ओसन्यो हुए मैदा को एक पुरी, अरु एक पपड़ी लिखे, 24 ये सबखे हारुन अरु ओका बेटाहोन का हाथ में रखीखे लहरायो जान की भेट ठहर्ये यहोवा का आगे लहरायो जाये. 25 तब वे चिजहोन खे उनका हाथ से लिखे होमबलि की वेदी पर जलइ देनु, जेमेसे उ यहोवा का सामने सुखदायक सुगन्ध ठहर्ये; उ तो यहोवा का लिये हवन हुये.

26 "फेर हारुन को संस्कार को जो मेडो हुये ओकी छाती खे लिखे ओखे विशेष भेट का अरुप मे यहोवा का आगे हलानु. उ तरो भाग तुमारो हुये."

27 अरु हारुन अरु ओका बेटाहोन का संस्कार को जो मेडो हुये, ओमे से हलायो जान की भेट आली छाती जो हलइ जाये, अरु उठइ जान की भेट आलो पुट्टो जो उठायो जाये, ये दोइ खे पवित्र ठैरानु 28 अरु या हमेशा की विधि का रीति से इस्राएलिहोन का तरप से ओको अरु ओका बेटाहोन को भाग ठैर्ये, क्योंकि या उठायो जान की भेट ठहरी हइ; अरु या इस्राएलिहोन का तरप से उनका बलिदान होन*29:28 यहोवा से मेल करने खे लिये में से यहोवा का लिये उठायो जान की भेट हुये. 29 हारुन का जो पवित्र कपडा हुये वे ओका बाद ओका बेटा अरु नाती इन सब खे मिलता रिये, जेमेसे उन खे पेन्या हुये उनखे चुननो अरु उन का अभिषेक अरु नियुत्त किर्यो जाये. 30 ओका बेटाहोन जो ओका जगह पर याजक हुये, उ जब पवित्रस्‍थान में सेवा कार्य करन खे मिलापआलो तम्बू में पहले आये, तब वे कपडाहोन खे सात दिन तक पेन्यो रेनु. 31 फेर याजक को संस्कार को जो मेडो हुये ओखे लिखे ओको गोस कोइ पवित्र जगह में बनानु; 32 तब हारुन अपना बेटाहोन का सात उ मेडा कि गोस अरु टोपली की रोटी, दोइ खे मिलापआला तम्बू का दरवाजा पर खानु. 33 जो समान से उनको संस्कार अरु उनखे पवित्र करन का लिये प्रायश्चित किर्यो जाये उनखे वे ही खाये, परन्तु दुसरा कुल का दुनियाहोन मे से कोई नी खानु पाये, क्योंकि वे पवित्र हुये. 34 अगर संस्कार आलो गोस या रोटी में से कुछ फजर तक बची जाये, ते ओखे अंगार मे जलइ देनु, उ खायो नी जाये; क्योंकि उ पवित्र हुये. 35 "मेने तोखे जो आज्ञा दी हइ, वे सभी का अनुसार तू हारुन अरु ओका बेटाहोन से व्यवहार करनु; अरु सात दिन तक उनको अभिषेक करतो रेनु, 36 अर्थात् पापबलि को एक बकरी को बच्चो प्रायश्चित का लिये रोज चढ़ानु. अरु वेदी खे भी प्रायश्चित करन का टेम पर शुद्ध करनु, अरु ओखे पवित्र करन का लिये ओको अभिषेक करनु. 37 तुम सात दिन तक वेदी खे प्रायश्चित अरु पवित्र करनु, वा टेम मे वेधी परम पवित्र हुये; अरु वेदी खे छुन आली कोइ भी चिज पवित्र हुइ जाये.

38 "जो तोखे वेदी पर हमेशा चढ़ानु हुये उ यो हइ; अर्थात् रोज एक-एक साल का दो मेडा का बच्चा चडानु. 39 एक मेडा का बच्चा खे फजर का टेम, अरु दूसरो मेडा का बच्चा खे संजा का टेम मे चढ़ानु. 40 अरु एक मेडा का बच्चा का सात मे दो लिटर तेल से ओसन्यो हुयो एक किलो मैदो अरु बली का लिये दो लिटर अंगुर को दाखमधु चडानु. 41 अरु दूसरो मेडा का बच्चा खे श्याम का टेम मे चडानु, अरु ओका सात फजर का जसो अन्नबलि अरु पिय-अर्पण ये दोइ चडानु, जेमेसे वा सुखदायक सुगन्ध अरु यहोवा का लिये हवन ठर्ये. 42 तुम्हारी पीढी-पीढी में यहोवा का आगे मिलापआलो तम्बू का दरवाजा पर हमेशा असी ही होमबलि चडइ जाये; या वा जगहा आय जेमे मी तुम दुनियाहोन से मिलीखे बात कर्यु. 43 मि इस्राएलिहोन से वहीं मिल्यो कर्यु, अरु वा तम्बू मरा तेज से पवित्र कर्यो जाये. 44 अरु मी मिलापवाले तम्बू अरु वेदी को पवित्र करुगा, अरु हारुन अरु ओका बेटो को भी पवित्र करुगा कि वे मरा लिये याजक का काम करें. 45 अरु मी इस्राएलिहोन का बिच निवास कर्यु, अरु उनको परमेश्वर ठैर्यु. 46 तब वे जानी लिये कि मी यहोवा उनको परमेश्वर हइ, जो उनखे मिस्र देश से येकालिये निकाली ली आयो, कि उनका बिच रि सकु; मि ही उनको परमेश्वर यहोवा हइ.