निर्गमन 32

सोन्ना को बच्चो

1 जब दुनियाहोन ने देख्यो कि मूसा खे पहाड से उतरना में देर हुइ रि हइ, तब वे हारुन का पास जमा हुइके बोलन लग्या, "अब हमारा लिये देवता बना, जो हमारा आगे-आगे चल्ये; क्योंकि उ अदमी मूसा खे जो हमखे मिस्र देश से निकाली ली आयो हइ, हम नी जाना कि ओखे का हुयो?"✝32:1 प्रेरित 7:40 2 हारुन ने उनसे बोल्यो, "तुम्हारी बइहोन अरु बेटा बेटिहोन का कान में सोन्ना को जो कानको उतारीखे, अरु मरा पास लीखे आ." 3 तब सब दुनियाहोन ने उनका कान से सोन्ना को कानको उतारी, अरु हारुन का पास ली आया. 4 अरु हारुन ने बाली खे ओका हाथ से लियो, अरु एक साचा मे डाल्यो, अरु एक बच्चा कि मुर्ति बनय, तब दुनिया बोलन लग्या "हे इस्राएल तरो परमेश्वर जो तोखे मिस्र देश से छुडइ लायो हइ उ योही हइ."✝32:4 1 राजे 12:28; प्रेरित 7:41 5 यो देखीखे हारुन ने ओका आगे एक वेदी बनइ; अरु यो प्रचार कर्यो, "कल यहोवा का लिये पर्व हुये." 6 अरु दूसरा दिन दुनियाहोन ने सुबह उठीखे होमबलि चढइ, अरु मेलबलि ली आया; अरु बठीखे खायो पियो, अरु उठीखे मोज-मसती करना लग्या.✝32:6 1 कुरिन्थिहोन 10:7 7 तब यहोवा ने मूसा से बोल्यो, "नीचे उतरी जा, क्योंकि तरी प्रजा का दुनिया, जिनखे तू मिस्र देश से निकाली ली आयो हइ, वे बिगडी गया हइ; 8 अरु जो रस्ता पर चलन की आज्ञा मेने उनखे दी थी ओखे जल्दी छोडीखे उन्हने एक बच्चा छोडी खे बनइ लियो, फिर ओखे दण्डवत् कर्यो, अरु ओका लिये बलिदान भी चढ़ायो, अरु यो बोल्यो हइ, ‘हे इस्राएलिहोन तुम्हारो परमेश्वर जो तुमखे मिस्र देश से छुडइ ली आयो हइ उ योही हइ’." 9 फेर यहोवा ने मूसा से बोल्यो, "मेने ये दुनियाहोन खे देख्या, अरु सुन, वे हठीलो हइ. 10 अब मेखे मत रोख, मेरो उन पर घुस्सा अइ रो हइ जेकासे मि उनखे भस्म कर्यु; परन्तु तरा से एक बडो राष्ट्र बनायु." 11 तब मूसा अपना परमेश्वर यहोवा खे यो बोलीखे बिनती करन लग्या, "हे यहोवा, तरी घुस्सा अपनी प्रजा पर क्यों भड़क्यो हइ, जेखे तू बडो सामर्थ्य अरु बलवन्त हाथ का वजेसे मिस्र देश से निकाली लायो हइ? 12 मिस्री दुनिया यो क्यों बोलन लग्या, ‘उ उनखे बुरो उद्देश से, अर्थात् पहाड में मारी खे धरती पर से मिटाइ डालन की मनसा से निकाली ली गयो?’ तू अपनो भड़क्यो हुयो गुस्सा खे शान्त कर, अरु अपनी प्रजा खे नाश मत कर. 13 अपना दास अब्राहम, इसहाक, अरु इस्राएल याकुब खे याद कर, जेकासे तोने अपनी ही कसम खाइखे यो बोल्यो थो, ‘मी तुम्हारो कुल खे आकाश का ताराहोन का जसो बहुत कर्यु, अरु यो पुरो देश जोकी मेने चर्चा करी हइ तुम्हारा कुल खे दियु, कि उ ओको अधिकारी हमेशा बन्यो रिये’."✝32:13 उत्पत्ति 22:16-17; 17:8 14 तब यहोवा अपनी प्रजा को नाश करना से जो ओने मन बदली दियो. 15 तब मूसा फिरिखे साक्षी की दोइ पट्टिहोन खे हाथ में लियो हुयो पहाड से उतरी गयो, वे पट्टिहोन का दोइ तरप लिखो हुयो थो. 16 अरु वे पट्टिहोन परमेश्वर की बनाइ हुइ थीं, अरु ओका पर जो खोदिखे लिखो हुयो थो वा परमेश्वर की लिखी हुइ थी. 17 जब यहोशु खे दुनियाहोन को कलकल होनु सुनाई पड्यो, तब ओने मूसा से बोल्यो, "ढेरा से लड़इ का जसो आवाज सुनइ दि रो हइ." 18 ओने बोल्यो, "उ जो आवाज हइ उ नी ते जीतनआला को हइ, अरु नी हारनआला को, मेखे तो गाना को आवाज सुनइ पड्यो हइ." 19 ढेरा का पास आते ही मूसा खे उ बपट्टीहोन अरु नाचनो देखइ पड्यो, तब मूसा खे उनका पर गुस्सा आयो, अरु ओने पट्टिहोन खे अपना हाथ से पहाड का नीच्चे पटकीखे तोडी डाली. 20 तब ओने ओको बनायो हुयो बच्चा खे लिखे अंगार में डालीखे जलइ दियो. अरु पीसीखे चूर-चूर करी डाल्यो, अरु पाणी मे डाली दियो, अरु इस्राएलिहोन खे पिलइ दियो. 21 तब मूसा हारुन से बोलन लग्यो, "वे दुनियाहोन ने तरा साथ का कर्यो हइ कि तोने उनखे येतो बडा पाप में फसाया?" 22 हारुन ने उत्तर दियो, "हे मरा स्वामी मरा पर गुस्सा नी करनु; तू तो वे दुनियाहोन खे जानस ही हइ कि वे बुराइ में मन लगायो रेस हइ. 23 अरु उनने मरासे बोल्यो, ‘हमारा लिये देवता बनानु जो हमारा आगे-आगे चल्ये; क्योंकि उ अदमी मूसा खे, जो हमखे मिस्र देश से छड्य लायो हइ, हम नी जाना कि ओखे का हुयो?’✝32:23 प्रेरित 7:40 24 तब मेने उनसे बोल्यो, ‘जेका-जेका पास सोन्ना को बर्तन हुये, वे उनखे उतारीखे लिआ;’ अरु जब उनने मेखे दियो, मेने उनखे अंगार में डाली दिया, येमेसे बपट्टीहोन बनी गयो." 25 हारुन ने वे दुनियाहोन खे असो खुल्यो करी दिया था कि वे अपना विरोधिहोन का बीच मे हसी मजाक का पात्र बनी गयो, 26 उनखे खुल्यो देखीखे मूसा ने डेरा का दरवाजा पर खडो हुइखे बोल्यो, "जो कोई यहोवा का तरप हुयो हुये उ मरा पास आये" तब सब लेवी कुल का दुनिया ओका पास जमा हुया. 27 ओने उनका से बोल्यो, "इस्राएल को परमेश्वर यहोवा यो बोलस हइ, कि अपनी-अपनी जाँघ पर तलवार लटकइखे डेरा से एक दरवाजा से दूसरा दरवाजा तक घूमी-घूमीखे अपना-अपना भाइहोन, संगआला, अरु पड़ोसिहोन खे मारी डालनु." 28 मूसा को यो वचन का अनुसार लेवी ने कर्यो अरु उ दिन तीन हजार का लगभग दुनिया मार्या गया. 29 तब मूसा ने बोल्यो, "तुम आज यहोवा का लिये याजक पद का लिये अलग कर्या गया हइ, क्योकी तुम अपना संगा बेटा अरु भाइहोन का विअरुध्द था, अरु ओने आज का दिन तुम खे आशिष दियो हइ." 30 दूसरा दिन मूसा ने दुनियाहोन से बोल्यो, "तुमने बडो पाप कर्यो हइ. अब मि यहोवा का पास चढी जायु; सम्भव हइ कि मि तुम्हारो पाप को प्रायश्चित करी सक्यु." 31 तब मूसा यहोवा का पास जाइखे बोलन लग्यो, "हा वे दुनियाहोन ने सोन्ना को देव बनइखे बडो ही पाप कर्यो हइ. 32 ते भी अब तू उनको पाप क्षमा कर नी ते अपनी लिखी हुइ किताब में से मरा नाम खे काटी दे."✝32:32 भजन संहिता 69:28; प्रकाशन 3:5 33 यहोवा ने मूसा से बोल्यो, "जेने मरा विअरुद्ध पाप कर्यो हइ ओको का नाम मी अपनी किताब में से काटी दियु. 34 अब तू जाइखे वे दुनियाहोन खे वा जगह में ली चल जोकी चर्चा मेने तरा से करी थी; देख मेरो स्वर्ग दूत तरा आगे-आगे चल्ये. परन्तु जो दिन मी मिल्यु उ दिन मी उनखे पाप को दण्ड दूयु." 35 अन्त यहोवा ने वे दुनीयाहोन पर विपत्ति भेजी, क्युकि हारुन को बनायो हुयो बच्चा खे उन्हे बनायो थो.