1 "अगर कोई इनसान बैल, या मेडो, या बकरी चोरी खे ओको खुन कर्ये या बेची डाल्ये, ते उ बैल का बदला पाँच बैल, अरु मेडो-बकरी का बदला चार मेडो-बकरी भरनो पड्ये. 2 अगर चोर चोरी करते हुये पकड्यो जाए, अरु ओका पर ऐसी मार पड्ये कि उ मरी जाए, ते ओको खून को दोष नी लग्ये 3 अरु सुरज निकलना से पहले ओखे नी मार्ये ते ओको खून को दोष लग्ये; अगर उ चोर नुसकान भरपाइ नी देस ते चोर खे बेची देनु. 4 अगर चोर्यो हुयो बैल, या गधा होन, या मेडा होन या बकरी ओका हात में जिन्दी हुये, ते उ ओको दो गुना भरीखे दिये.

5 "अगर कोई अपना जनवर खे कोइ को खेत या अंगुर की बाडी चराए, अर्थात् अपनो जनवर खे खुल्लो छोडी दिये या उ दुसरा का खेत खे चरातो हुये, ते उ अपना खेत की अरु अपनी अंगुर की बाडी की उत्तम से उत्तम उपज में से वा हानि खे भरी दिये.

6 "अगर कोई अंगार जलाए, अरु वा काँटोंहोन में लगी जाए अरु फूलहोन का ढेर या अनाज या खडो खेत पुरो जली जाए, ते जेने अंगार जलाई उये उ हानि खे निश्चय भरी देये.

7 "अगर कोई दूसरा खे पैसा या सामान की धरोहर धरिये, अरु उ ओका घर से चुरई लये, ते अरु चोर पकड्यो जास, ते दो गुना ओखे ही भरनु पड्ये 8 अगर चोर पकड्यो नी जाए, ते घर को मालीक परमेश्वर का पास लायो जाए कि बात पक्की हुइ जाए कि ओने अपना भई-बन्धु की सम्पत्ति पर हाथ लगायो हइ या नी. 9 चाहे बैल, चाहे गधो, चाहे मेडो या बकरी, चाहे कपडा, चाहे कोइ प्रकार की असी गमी हुई वस्तु का विषय अपराध क्यों नी लगायो जाए, जेखे दो जन अपनी-अपनी समप्ती बोलता हये, ते दोनों को मुकद्दमो परमेश्वर खे पास लायो जाय; अरु जेखे परमेश्वर दोषी ठहराए उ दूसरा खे दो गुना भरी खे दिये

10 "अगर कोई दूसरा को गधा या बैल या मेडो-बकरी या कोई अरु घर का बाजू वाला का पास जनवर रखन का लिये दिये, अरु कोइ का बिना दिखे उ मरी जाए, या चोट खाए, या भगइ दियो जाए, 11 ते वे दोहि का बीच यहोवा की कसम खिलाई जाए, ‘मेने ओका धन पर हाथ नी लगायो;’ तब धन को मालीक ओखे सच मान्ये, अरु दूसरा खे उ कुछ भी भरी देनु नी होनको. 12 अगर उ सचमुच ओका यहा से चुरायो गयो हुये, ते उ ओका मालीक खे नास भरी देनू✝. 13 अरु अगर जनवर जगली जनवरहोन द्वारा मार्यो डाल्यो गयो हुये, ते उ मार्यो जानवर का प्रमाण खे लि लेनु, तब ओने उ भी ओखे भरीखे देनु नी पडीये.

14 "फेर अगर कोई दूसरा से जनवर मागी खे लाये, अरु ओका मालिक का संग नी रेतो ओखे चोट लगी जाये या मरी जाए, ते उ निश्चय ओकी हानि कि भरपाइ भरी दे. 15 अगर ओको मालीक का संग हुये, ते दूसरा खे ओकी हानि भरनू नी पडको; अरु अगर उ भाडा को हुये ते ओकी हानि ओका भाडा में अई गई.

16 "अगर कोइ अदमी कोइ कुवारी पोर्यइ खे जेको ब्याह की बात नी हुइ हुये अरु ओखे फुसल्यखे ओका संग कुकर्म कर्ये, ते उ निश्चय ओखो मोल दि खे ओका से ब्याह करी लेनु. 17 परन्तु अगर ओको बाप ओखे देन खे बिल्कुल इन्कार करे, ते कुकर्म करनवालो कुवारी पोर्यइ का मोल की रीति का अनुसार पैसा दि देनु.

18 "तुम जादू-टोना करनआली बइ खे जरुर मारी देनु✝.

19 "जो कोई जनवर का सात कुकर्म करे ते उ निश्चय मार्यो जाए.✝

20 "जो कोई यहोवा खे छोडी खे कोइ अरु देवता का लिये बलिचडाये ओको सत्यानाश कर्यो जाए.✝

21 "तुम परदेशीहोन खे नी सतानो अरु न उनका पर अन्यान करनु क्योंकि मिस्र देश में तुम भी परदेशी था✝. 22 कोइ विधवा या अनाथ बच्चा खे दुःख नी देनू. 23 अगर तुम असा कोइ प्रकार दुनियाहोन खे दुःख दियु, अरु वे कुछ भी मेरी दुहाई दें, तो मी निश्चय उनकी दुहाई सुनीव; 24 तब मरो क्रोध भड़क्ये, अरु मी तुम खे तलवार से मारियु, अरु तुम्हारी लुगेन विधवा अरु तुम्हारा बच्चा अनाथ हुइ जाये.

25 "अगर तू मरा दुनियाहोन में से कोइ गरिब अदमी खे जो तरा पास रेतो हुये ओके पैसा को ब्याज दे, ते ओकासे महाजन का जसो समान ब्याज नी लेनु. 26 अगर तू कभी अपना भई-बन्धु का कपडा खे गिरवो रखस हइ ते, तु सुरज खे अस्त होना से पहले ओखे लौटा देना; 27 क्योंकि उ ओको एक ही ओढ़न को हइ, ओका आग को उ ऐखेलो अपडा हये; फेर उ कोखे ओढिखे सोये? अरु जब उ मरी दुहाइ दिये तब मी ओकी सुन्यो, क्योंकि मी तो करुणामय हइ.

28 "यहोवा खे दोस मत सदेनू, अरु नी अपना दुनियाहोन का प्रधान खे श्राप देनु.

29 "अपना खेत की उपज अरु फल का रस में से भेट मेखे देना में विलम्ब नी करनो. अपना बेटा में से पहला खे मेखे देनु. 30 वसो ही अपना गाय अरु मेडा-बकरिहोन का पहिलो भी देनु; सात दिन तक बच्चो अपना माय का संग रिहे अरु आठवा दिन तू ओखे मेखे दि देसनु.

31 "तुम मरा लिये पवित्र इन्सान बननो; यो कारण जो जनवर मैदान में फड्यो हुयो पड्यो मिल्ये ओको गोस नी खानो, ओखे कुत्तो का समने फेंकी देनु.