1 फेर तू इस्राएलिहोन में से अपना भइ हारुन, अरु नादाब, अबीहू, एलीआज़ार अरु ईतामार नाम का ओका बेटाहोन खे अपना नजीक ली आनो कि वे मरा लिये याजक को काम कर्ये. 2 अरु तू अपना भइ हारुन का लिये सम्मान अरु सुन्दर का निमित्त पवित्र कपडा बनाया. 3 अरु जेत्ता दिमाग वाला कारागिर हइ, जिनखे मेने दिमाग देनआली आत्मा से परिपूर्ण कर्या हइ, उनखे तू हारुन का कपडा बनान की आज्ञा देनु कि उ मरा लिये याजक को काम करन का लिये पवित्र बन्ये. 4 अरु जो कपडा उनने बनाया हुये वे ये हइ, अर्थात् सीनाबन्द; अरु एपोद, अरु कुऱ्तो, चार खाचा को लंम्बो कोट, पुरोहित की टोपी, अरु कमरबन्द; ये ही पवित्र कपडा तरा भइ हारुन अरु ओका बेटाहोन का लिये बनायो जाये कि वे मरा लिये याजक को काम कर्ये. 5 अरु उ सोन्नो अरु नीला अरु बैंगनी अरु लाल रंग का अरु सूक्ष्म सनी का कपडा ले.

6 उ एपोद को सोन्नो, अरु नीलो, बैंगनी अरु लाल रंग का कपडा का अरु बठी हुई सूक्ष्म सनी का कपडा का बनायो, जो कि निपुण शिलइ को काम करन आला का हाथ को काम होनु. 7 अरु उ यो प्रकार से जोड्यो जाये कि ओका दोही कंधों को कोना आपस में मिल्या रिह्ये. 8 अरु एपोद पर जो निपुलता से बुनिया हुया कमर को पट्टो हुये ओकी बनावट ओका जसी होनु, अरु वे दोही बिना जोड़ का होंनु, अरु सोन्नो अरु नीलो, बैंगनी अरु लाल रंगवाला अरु बठी हुइ सूक्ष्म सनीआला कपडा का होंनु. 9 फेर दो सुलैमानी मणि लिखे उनका पर इस्राएल का बेटाहोन का नाम खोद्यो, 10 उनका नामहोन में से छे तो एक मणि पर, अरु बच्या छे नाम दूसरा मणि पर, इस्राएल का बेटाहोन को पैदाहोन का अनुसार खोदनु. 11 मणि कोरी खे काम का जसो छापा खोद्यो जास हइ, ओसो ही वे दो मणिहोन पर इस्राएल का बेटाहोन को नाम खोदनु; अरु उनका सोन्ना खे खाचा में जोडी देनु. 12 अरु दोइ मणिहोन खे एपोद का कंधों पर लगानु, वे इस्राएलिहोन खे हमेशा याद दिलान आलो मणि ठहर्ये; अर्थात् हारुन उनको नाम यहोवा का आगे अपना दोइ कंधों पर याद का लिए लगायो रेनु. 13 फेर सोन्ना को खाचो बनानु, 14 अरु रस्सीहोन का समान गूँथ्‍या हुया दो जंजीर शुद्ध सोन्ना का बनानु; अरु गूँथ्या हुया जंजीरहोन खे वे खाचा में जड़नु.

15 "फेर न्याय को सीनाबन्द को भी शिलइ को काम खे बनानु; एपोद का समान सोन्ना, अरु नीलो, बैंगनी अरु लाल रंग को अरु बठी हुइ सूक्ष्म सनी का कपडा की ओखे बनानु. 16 वा चौकोर अरु दोहरी होनु, अरु ओकी लम्बाइ अरु चौड़ाइ एक-एक बिलास की होनु. 17 किमती पत्थर का चार लइन मणि जडनो. पहली लइन में तो माणिक्य, पद्मराग अरु लालडी नाम को पत्थर होनु; 18 दूसरा लइन में मरकत, नीलमणि अरु हीरो; 19 तीसरा लइन में लशम, सूर्यकांत अरु नीलम; 20 अरु चौथी लइन में फीरोजा, सुलैमानी मणि अरु यशब होंनु; ये सब सोन्ना का खाचा में जड्या जाये. 21 अरु इस्राएल का बेटाहोन का जेत्ता नाम हइ ओत्ती मणि होंनु, अर्थात् उनको नामहोन की गिनती का अनुसार बारह नाम खोद्या, बारह कुल में से एक-एक को नाम एक-एक मणि पर असो खोदनु जसो छापा खोद्यो जास हइ. 22 फेर सीनाबन्द पर रस्सीहोन का जसो गूँथ्या हुया शुद्ध सोन्ना की जंजीर लगानु; 23 अरु सीनाबन्द में सोन्ना की दो कड़िहोन लगानु, अरु दोइ कड़िहोन खे सीनाबन्द का दोइ कोना पर लगानु. 24 अरु सोन्ना का दोइ गूँथे जंजीरहोन खे वे दोइ कड़िहोन में जो सीनाबन्द का कोना पर हुये ओखे लगानु; 25 अरु गूँथ्या हुया दोइ जंजीरहोन खे दोइ बाकी कोना का दोइ खाचा में जोडी खे एपोद का दोइ कंधहोन का गठान पर ओका सामने लगानु. 26 फेर सोन्ना की दो अरु कड़िहोन बनइखे सीनाबन्द का दो कोना पर, ओकी वा कोर पर जो एपोद का भीतर की तरप हुये लगानु. 27 फेर उनका सिवाय सोन्ना की दो अरु कड़िहोन बनइखे एपोद का दोइ कंधों का गठानहोन पर, नीच्चे से ओका सामने अरु ओका जोड़ का पास एपोद का काढ़े हुया पट्टा का उपर लगानु. 28 अरु सीनाबन्द अपनी कड़िहोन का द्वारा एपोद की कड़िहोन में नीली रस्सी से बाँधी जाए, या रीति उ एपोद का काढ़े हुया पट्टा पर बनी रिये, अरु सीनाबन्द एपोद पर से अलग नी होनु पाये." 29 अरु जब-जब हारुन पवित्रस्‍थान में प्रवेश कर्ये, तब-तब वा न्याय की सीनाबन्द पर अपना दिल का उपर इस्राएलिहोन का नामहोन खे लगाए रिये, जेकासे यहोवा का सामने ओको स्मरण नित्य रिये. 30 अरु तू न्याय का सीनाबन्द में उरीम अरु तुम्मीम* खे रखनु, अरु जब-जब हारुन यहोवा का सामने प्रवेश कर्ये, तब-तब वे ओका दिल का उपर होंनु; यो प्रकार हारुन इस्राएलिहोन का लिये यहोवा का न्याय खे अपना दिल का उपर यहोवा का सामने नित्य लगायो रिये.✝

31 "फेर एपोद खे कुर्ता खे पुरो नीलो रंग को बनानु. 32 ओकी बनावट ऐसी होनु कि ओका बीच में सिर डालन का लिये छेद होनु, अरु उ छेद की चारी तरप गुदे का छेद का जसो एक जसो हुइ कोर होनु कि वा फटनु नी पाये. 33 अरु ओका नीचेवाला घेरा में चारी तरप नीलो, बैंगनी अरु लाल रंग का कपडा को अनार बनानु, अरु उनखे बीच-बीच चारी तरप सोन्ना की घंटिहोन लगानु, 34 अर्थात् एक सोन्ना की घंटी अरु एक अनार, फेर एक सोन्ना की घंटी अरु एक अनार, या रीति बागे का नीचेवाला घेरा में चारी तरप असो ही होनु चाहे. 35 अरु हारुन उ कुर्ता की सेवा टहल करना का टेम पेहनी खे, कि जब-जब उ पवित्रस्‍थान का भीतर यहोवा का सामने जानु, या बाहर निकलनु, तब-तब ओको शब्द सुनाइ दे, नी ते उ मरी जाये." 36 फेर शुद्ध सोन्ना को एक पंट्टी बनानु, अरु जसी छापा में वसो ही ओमे ये अक्षर खोद्यो जाये, अर्थात् यहोवा का लिये पवित्र. 37 अरु ओखे नीली रस्सी से बाँधनु; अरु वा पगड़ी का सामने का हिस्सा पर रिये. 38 अरु उ हारुन का माथा पर रिये, येकालिये कि इस्राएली जो कुछ पवित्र ठहराये, अर्थात् जेत्ती पवित्र चिजहोन भेट में चढ़ाये वे पवित्र चिजहोन को दोष हारुन उठाये रिये, अरु उ नित्य ओका माथा पर रिये, जेकासे यहोवा उनकि इच्छा से संतुष्ट रिये. 39 लंम्बो कोट खे सूक्ष्म सनी का कपडा का चार खाचो बनानु, अरु एक पगड़ी भी बैंगनी सूक्ष्म सनी का कपडा की बनानु, अरु चार प्रकार का सुत से काम कर्यो हुयो एक कमरबन्द भी बनानु. 40 फेर हारुन का बेटाहोन का लिये भी लंम्बो कोट अरु कमरबन्द अरु टोपिहोन बनानु; ये कपडा भी सम्मान अरु सुदरता का लिये बन्ये. 41 अपना भाइ हारुन अरु ओका बेटाहोन खे ये ही सब कपडा पहनानु उनको अभिषेक अरु संस्कार करनु, अरु उनखे पवित्र करनु कि वे मरा लिये याजक को काम कर्ये. 42 अरु उनका लिये सनी का कपडा की हाफपँन्ट बनानु जेकासे उनको आग झाक्यो रिये; वे कंमर से जाँघ तक को होंनु; 43 अरु जब-जब हारुन या ओका बेटा मिलापवाला तम्बू में प्रवेश कर्ये, या पवित्रस्‍थान में सेवा टहल करन खे वेदी का पास जाये तब-तब वे उ हाफपँन्टहोन खे पेनीखे रिये, असो नी हुये कि वे दोषी ठहर्ये अरु मरी जाये. यो हारुन का लिये अरु ओका बाद ओका कुल का लिये भी सदा की विधि ठहर्ये.