1 Chǝka mǝnakan thlǝ mbahǝnchǝ shenuˈtǝ tǝ wan shenuˈti nafcha tǝ yi fǝ thlǝnchi Farta, paɗ maa yahwi nafcha wa, nechi kǝɗ pǝndǝra ndu thlǝbira thla thlǝ ɗakcha nawaktǝ nafuˈyansi. 2 Ndu thlǝ mbahǝnchǝ mbuˈ ǝnɗi mbuˈtǝ Farta nech sǝɓta. Paɗ thlǝ sǝnchǝ ichiɗi nech ǝ wuɓta kaɗ nat, paɗ sǝn ǝninchǝsi kaˈan, ndu fǝr kit inchǝs kaˈan, thla nati mbahǝn ndandǝ ɗakwan chawa thlaˈu mǝɗa kǝmɗi chikan paɗ. Maa yahwi nafcha wa, kǝɗu, ngga ǝn nakiwa. 3 Chǝka mǝ kǝ ndǝ fee wa ni mbahǝn fǝr ichiɗi nech inchǝs nat kǝmɗi fǝ ɓahcha, paɗ ni fǝr fatǝnchi kǝ njanfee kaɗi, kǝɗu, maa yahwi nafcha wa, chok wa kǝ mbǝs ǝn har kǝmɗinchi wa.

4 Yahraˈan thlǝ ɗǝfchan nef kǝ chok tǝ kǝrǝs ǝna tǝ kaakǝta. Yahraˈan sǝkwa sǝraˈta wa, chǝ wa maan inda wa. 5 Chǝ wa thlaˈ inda wa, kweˈ wa ha kǝ ɓǝra ǝnɗi yahtǝ wanɗǝkaɗatˈyan wa, yah wa inda wa, pata wa fata wa, kǝs wa nef har hur wanɗǝ kaɗata wa. 6 Yahraˈan sǝk wa mbǝndǝf maa chǝ nafchǝ ǝnɗi kǝmwakchǝs wa. Paɗ thlǝ tǝranchǝ hwirha maa chǝ fee ǝnɗi kǝmchǝsi. 7 Yahraˈan thlǝ ɗǝfchan kǝrǝsa ǝ hur chika mǝ nat, fǝr kit kǝ ichi nat, ɗǝf wanɗikaɗata kǝ ichi nat, tǝ paɗ kǝrǝs ǝna hur chika yen mbenna.

8 Yahraˈan tǝɓawa wa kǝ kwekǝɗan. Thlǝt thlǝnda mǝɗi Farta, nan thlar tǝ ha. Ndiktǝ tǝ wanshenuˈ chǝɗi sǝnwak tǝ fee, nan thlar tǝ ha. Hur inda paɗ, nan tǝɓata. 9 Kit taˈan, hur indiyamǝn, ngga ndiyiɗan wa. Thlǝnɗi thlǝ thlǝt mǝn mǝɗi Farta ngga ndaˈan nech kǝ ndukwaɗan wa. 10 Fartǝɗi ɓa thla nech kǝ ndiyiɗan, thla nawakchǝ kǝ ndiyiɗan nan thlǝrit tǝ kaɗi. 11 Fartǝɗi nati kǝ waa, thlǝ ndikchi kǝɗ waa, thlǝ kaɗǝchi kǝɗ waa, thlǝ nechi icha tǝ wenitǝ wankǝta. Kǝ manki kaɗ paɗ, malanki tar wankǝta. 12 Kǝthlǝm nakanya ichiɗi thlǝ nat mǝn nakanya kǝ nden wa hur shishingngǝn ema thlǝ nat mǝn nata thliweɗ thliweɗ. Fartaˈan ɓata namǝn nata wenitǝ tǝ wenita. Nakanya sǝndǝnchi ngga ndiyiɗan wa. Fartǝ inni, sǝndǝnchi nan choktǝ kǝ ndiyiɗan. Nan choktǝ kǝ ndiyiɗan kǝɗ thla sǝndǝ Farta nenchi ndiyiɗan.

13 Kǝɗu, nakanya ichiɗi mahkanya chok ndǝ kǝɗu kǝ kweˈkǝɗan. Fennech kǝ, fǝr kit kǝmɗi Farta, ɗǝf wandǝkaɗata, tǝ yahraˈan. Thla nech manchan hur nandǝ nat, ndaˈan nech kǝ yahraˈan.