1 Wanmanchina, fartǝɗi nati tǝ wunchi, ndikowun wisi kǝɗ fee naa shemeti Farta fiyanda wa. Ndikowun chisi kǝɗ ǝnɗi thlǝ ndikti tǝ nafchiɗi nech hur fata. Nafchiɗi nech kǝ wan waaˈyaarchi hur Kǝristi. 2 Sǝmowunchi ǝn tǝ yinja, ngga tǝ ɗǝsǝmǝnɗi nech lǝklǝk wa, kǝthlǝm chaˈwowun mǝɗ ka ndǝ ɗǝsǝmǝnɗi nech lǝklǝk wa. Paˈ kǝ nakanya nowun mbahǝn mǝɗ kanchi wa. 3 Kǝthlǝm chika kǝ nakanya pǝˈchowun wiˈtǝ hur fata. Ma tana kun sǝraˈ raˈan, kun yandǝ tǝ raˈan, pǝn wa hach yuwa peˈchowun wiˈtǝ hur fata wa? Thleya pǝn wa wa, thlǝ nechowun thlǝ nandǝ ichǝ kaɗ kǝɗ fee nech hur fata ndak wa? 4 Kǝthlǝm ma ndiyowun wa, "Nggǝt yi Bulus," yowun paɗ wa, "Nggǝt yi Apolos," awi, pǝn wa wa, nechowun keˈke tǝ takǝɗ nafchi heshiɗiya wa?

5 Wun nech kǝ Apolos? Wun nech kǝ Bulus paɗi? Awi ngga mafechǝ Farta ndak wa, fee fǝrtǝ wun kit tǝmɗiyanda. Chikawun hurnanda fǝran Farta ǝnɗi natǝn chita. 6 Nggǝt chehcha, Apolos pǝnchǝ ˈyaman, paɗ Farta ɗǝfchǝsi kǝ tifa, mangkan. 7 Kǝthlǝm ndaˈan ndu thlǝ chehtaˈan, tǝ thlǝ pǝnˈyaman, ngga meˈi ǝn nakanɗa wa, Fartaˈan ndak mǝthlan tǝɗi ɗǝfchǝ ichǝs kǝ tifnda, paɗ mangkan. 8 Thlǝ chehtaˈan, tǝ thlǝ pǝnˈyaman, kaɗatˈyandǝ kǝ ɓǝra ǝn arta, chikawuni nan mɓǝs kǝnau ter ˈyan. 9 Kǝthlǝm nggǝmǝn fǝ tarchi Farta fee nech chǝt ter mǝt arta. Kun kǝɗ hǝngngǝ Farta, kǝɗ tǝnndi Farta paɗ.

10 Tǝmɗi kafaɗi fǝritǝ Farta, ndaˈan ɗǝfti fǝl tǝnan kǝɗ thlǝ mɓǝ r tǝnnda. Yowun paɗ tǝndǝ kǝ ɗaran. Kǝthlǝm ndaˈan, chikawun nech tǝnan kǝ mbǝrsi tǝ weˈtǝ tǝnɗi natǝn chǝt kǝ ɗaran. 11 Kǝthlǝm yowunsi nech mbahǝn ɗǝf fǝl tǝnan samǝn mǝ thla tapaɗ fee ɗǝfta wa. Fǝl tǝn ini ndaˈan nech kǝ Yesu Kǝristi. 12 Maa chi yowun tertǝ, ndu tǝ rathlata, ndu tipesha, ndu tǝ ɗakwan pǝlaarcha, ndu tǝ ɗǝfcha, ndu tǝ chilɓǝrcha, ndu tǝ kwafcha, 13 fartǝ chak mee, nwaat nan pǝn weˈtǝ tarɗi chit chikawun thlǝ tǝnnda. Waɗan nan kaɗa ndǝ ndǝɗ tarɗi chit chikawuni. 14 Ma ǝ hǝraˈ tǝnndi tǝndǝ fee ǝ ɗar fǝl tǝnan ewu wa kaɗ wa, naa thlǝ tǝnan mbǝs kǝnau tǝndǝyan. 15 Ma ǝ en wat tǝnan kaɗi, chok chan wa thlǝ tǝnan chǝt asar, chika nakan mǝthlan tǝ indiyan nan hǝraˈta, paɗ chok chan kǝɗ hǝraˈchan kesh tǝ hur wata.

16 Awi, sǝnwowun wa Wiri Farta nakowun wa, paɗ Shemeti Farta nechan ɗas hwǝrˈyowun wa? 17 Nat thla sǝbanchi wiri Farta ini kaɗi, naa Farta sǝɓandǝ kaɗi. Kǝthlǝm wiri Farta nechan chǝɗchǝɗ, paɗ kun nech kǝ wiri Fartaˈan.

18 Mǝ lǝmwun indiyowun wa. Ma tǝr yowun indiyan wa thlǝ mbǝrˈin nakan, tǝmɗi mbǝrˈǝni yuwa heshiɗi nakan ya, chok kan kǝɗ ɓema. Kǝthlǝm kǝ mbǝstǝ chokta kǝ thlǝ mbǝrˈǝna. 19 Kǝthlǝm mbǝrˈini heshiɗiya nechan kǝ ɓamkǝta ǝ pangngǝn Farta. Kǝthlǝm nechan kǝ yaraɗan, ndat wa "Thlǝ kǝsanchan fǝ mbǝrˈicha tǝmɗi ɗathlǝ yanda." 20 Yaranchi fee ha paɗ, hur laulawati Farta, ndat wa "Chinmǝn ǝ shin wa kaɗati fǝ mbǝrˈicha nechan kǝ kohaɗan." 21 Kǝthlǝm ndaˈan mǝ thlaˈan yowun inda kǝ ɓǝra yowun pangnda wa. Kǝthlǝm chika mǝ nat yuwun, 22 Ndu Bulus, ndu Apolos, ndu Kefas, ndu hurheshi, ndu shishingnda, ndu mǝrta, ndu ichiɗi nakanya, ndu ichiɗi nech ɓat pangnga. Chikamǝ nat yuwun. 23 Kun yi Kǝristi, Kǝristi paɗ yi Farta.