1 Ngga nwaat kǝ yarowunchisi kǝ ɗar kǝsandǝ fee si nech chiɗ chiɗ wa. 2 Kǝthlǝm sǝninchi kweˈtǝ yowun ha kǝ kǝsanwun fee si nech chiɗ chiɗ. Kǝthlǝm ndaˈan nggǝt chǝt thlaˈ kirsha tǝ kun ǝ mǝɗi nafchi Makidoniya. Nggǝt mbuˈandǝ tanda wa, kun nafchi Akaya tahǝs wun fa ǝ huraɗi mbǝrchǝ ha yu, kǝthlǝm chǝt kǝɗu. Weˈtǝ kweˈtǝɗi ha nessowun, ndaˈan chicha tertǝ nafchiɗa thlaˈ tǝ ndǝ kit. 3 Nakan paɗ ya, nggǝt thlǝn wanmanchǝmǝn, kǝthlǝm kǝ chok thlaˈkǝrshaˈan thla thlǝ chǝtˈǝn kǝ kun ǝ hur tar ɗiya, kǝ chok kǝ ndiktǝ pafǝn kǝt tǝ kwahoɗan wa. Paɗ yah chi kǝ chokwun tǝ tahǝs fa, kǝɗ thla mbuˈti. 4 Kǝthlǝm maa ɓinchi ɓukwa tǝ fowun fǝ fǝr kit cha thlaˈ tǝ Makiɗoniya, yah wisi kǝ ɓandǝ mbǝsandǝ tahsawowun kǝnau pafǝn ˈyowun ha wa. Maa shiɓ kǝɗu, ni sǝk hartǝ fata kǝthlǝm tertǝ thlaˈ kǝrǝsɗi chǝti tǝ kun, ngga nggǝt ichǝt na nech sǝk hartǝ fata wa, hartǝ faɗi natˈwun sǝkta sǝrtaˈansi wa. 5 Kǝthlǝm ndaˈan, ndǝpani ndiˈchansi kǝ shiyani wanmanchǝmǝn kǝ ɓandǝ kwaɗǝn kǝni ɓata, kǝ tǝɓandǝ nggomandǝ ichiɗi ɗǝftuwun miyan wa nowun fǝrta, kǝthlǝm kǝ mbǝsan fee tandǝ ɗǝktǝr. Theya nech pǝnda wa, tǝ yahti wanɗǝkaɗechˈyowun fǝrtuwun, ngga tǝ kweˈ fee wunchi wa.

6 Kuɗukama, nafɗi hǝfcha weˈtǝ ngguɗyeh, nechan mbǝs ɗǝsǝmndǝ ngguɗyeh. Paɗaa nafɗi hǝfchǝ weˈtǝ manchan, nan mbǝs ɗǝsǝmndǝ manchan. 7 Chǝka wuni kǝ fǝr kǝɗ ǝnɗi tahsandǝ ha hur wanɗǝkadatˈyan, ngga tǝ sǝɓtǝ hwira ndu nwaat wa. Kǝthlǝm Farta thlǝ sǝkchan mbǝn nafɗi fa thlǝ fǝrchǝ tǝ wanɗǝkaɗat arta. 8 Thlǝ mbahanchǝ Farta fǝrowun mbǝsˈǝn har, kǝ mbǝrantǝ thla ha yahtuwun. Kǝthlǝm chǝka kwati thlǝ mbǝs chowun ǝnɗi thlǝ yahtuwun. Kǝ mbǝrantǝ ǝnɗi ha kaɗatwun. Kǝ mbahan wun fǝrtǝ her chaˈ. 9 Kǝɗ ǝnɗi natin kǝ ˈyaradan hur ndikti Farta wa,

"Thlǝ fǝranchan fǝ ɓahcha her chaˈ.

Kaakǝtˈyan wathlandech ha kǝ kweˈkǝchi."

10 Fartǝ thlǝ fǝranchǝ thlǝ chehtǝ weˈta kǝ hǝfa, paɗ kǝ fǝranchǝ ɗǝsǝmnda. Nan fǝrowun weˈtǝɗi natwun hǝfta, mathlan paɗ nech ɗǝf weˈtaˈan kǝ tasǝr ha. Tǝ kǝɗu, natǝn ɗǝf fǝr kǝnau pafǝn tǝɗi ˈyowun yi yahti wanɗǝkaɗata kǝ chekowunchi mbǝsˈǝn har yi tarchowun tǝ kaakǝta. 11 Chǝkakwati nan kǝ sowunɗǝsi hur chǝka mii, kǝthlǝm kǝ chok wun kǝ fǝ fǝr pafǝn tǝ yahti wanɗǝkaɗata ween mǝta. Tǝ kǝɗu, naa nafchǝ terchan chit usoko kǝmɗi Farata kǝthlǝm pafǝnchǝɗi natwun thlǝnandata tǝmɗi yaˈan.

12 Kǝthlǝm tar kaakǝtɗi thlǝ chit wunya, ngga ti ɗakchi fǝ chiɗ chiɗ kǝɗ ndak thlǝ chǝtǝn wa, paɗ thlǝ ɗǝfchan usoko tǝɗi thlǝ chandǝ fee Farta kǝ cheka. 13 Kǝthlǝm tar kaakǝtɗi thlǝ chǝtwun ndaˈan pǝnchǝ fǝr kit ˈyowun. Fowun nafchǝ paɗ nandǝ maanandǝ Farta kǝthlǝm nggǝmawun kwastǝ ndikta thla mbinchan yi sǝkta yi Kǝristi. Paɗ kǝthlǝm kǝnau pafǝn tǝɗi chǝtwun her chaˈ kǝmɗi takǝɗ nafchǝ nat. 14 Fen paɗ nandǝ naa shiyowundǝsi, kǝ nandǝ kuɗuktǝ tǝ wunchi ǝ wanɗǝkaɗechˈyanda. Kǝthlǝm kaafaɗi fǝrowundǝ Farta thla nawaktǝ sǝrtaˈan si. 15 Chaman usoko Farta, kǝthlǝm kǝnau pafǝn tǝɗi fǝramǝn ndǝn ya. Kǝnau pafǝntǝɗi nawaktǝ fee kaaɗa nda.