1 "Me sem čačukano čokot thaj mingro Dad si vinogradari. 2 Vov čhinol dži jekh loza pe mande savi ni anol bijanipe. Thaj rezil dži jekh savi anol bijanipe, te bi anola pobut bijanipe. 3 Tumen sen već rezime thaj thode lafesa savo me vaćardem tumenđe. 4 Ačhen tumen ane mande thaj me ka ačhav ane tumende! Sar so i loza našti anol bijanipe korkori pestar te ni ačhili po čokot, gija i tumen našti aven kola save šaj anen bijanipe te ni ačhiljen ane mande.

5 Me sem o čokot, a tumen loze. Ko ačhol ane mande thaj me ane leste, anol but bijanipe, golese so bize mande khanči našti te ćeren. 6 Ko ane mande ni ačhol, ka čhudol pe avri sar i čhindi loza thaj ka šućhol. Tegani ka ćiden gasave loze thaj ka čhuden len ani jag kaj ka phabaren len. 7 Te ačhiljen ane mande thaj mingre lafura ane tumende, roden sa so manđen thaj ka dol pe tumenđe. 8 Mingro Dad ka proslavil pe gija so ka anol but bijanipe thaj so ka aven mingre sikade.

9 Sar so o Dad manglja man, gija i me mangljem tumen. Ačhen ane mingro manglipe! 10 Te ićarden tumen pe mingre zapovestura, ka ačhen ane mingro manglipe, sar so i me ićardem ma ke zapovestura mingre Dadese thaj ačhav ane leso manglipe.

11 Gova vaćardem tumenđe te avol mingro radujipe ane tumende thaj tumaro radujipe te avol pherdo. 12 Kava si mingro zapovest: manđen jekh avere sar so me mangljem tumen. 13 Po baro manglipe naj tare kava nego kana khoni dol piro džuvdipe pe amalenđe. 14 Tumen sen mingre amala te ćerden kova so zapovediv tumenđe. 15 Ni akharav tumen više sluge golese so o sluga ni džanol so ćerol leso gospodari. Akana akharav tumen mingre amala golese so vaćardem tumenđe sa so phenda manđe mingro Dad. 16 Ni birisaden tumen man, nego me birisadem tumen thaj čhutem tumen te džan thaj te anen bijanipe savo ka ačhol thaj te dol tumen mingro Dad sa so ka roden ane mingro alav. 17 Kava zapovediv tumenđe: manđen jekh avere!"

18 "Te mrzil tumen o sveto, džanen kaj man mrzisada angleder tumende. 19 Kana bi preperena e svetose, o sveto bi manđola tumen. Al, golese so ni preperen kale svetose, nego me birisadem tumen taro sveto, golese o sveto mrzil tumen. 20 Den tumen gođi so vaćardem tumenđe: ‘O sluga naj po baro taro piro gospodari.’ Te man progonisade, ka progonin i tumen. Te ićarde pe ke mingro lafi, ka ićaren pe i ke tumaro. 21 A sa gova von ka ćeren tumenđe baše mande, golese so ni džanen Kole savo bičhalda man. 22 Te ni aviljem thaj ni vaćardem lenđe, ne bi avena banđe. Al akana naj len so te vaćaren baše pe grehura. 23 Ko man mrzil, mrzil i mingre Dade. 24 Te ma ćerava maškar lende buća save khoni aver ni ćerda, ne bi avena banđe. Al von dikhlje buća save ćerdem a palem mrzisade i man thaj mingre Dade. 25 Al trubul te pherdol o lafi savo si pisimo ane lengo Zakon: ‘Mrzisade man nisose.’

26 A kana ka avol o Zastupniko, save ka bičhalav tumenđe taro mingro Dad – o Duxo e čačimaso savo ikljol taro Dad – vov ka svedočil mandar. 27 Thaj i tumen ka svedočin mandar, golese so taro anglunipe sen mancar."