1 Pale gova sasa o prazniko e Jevrejengo thaj o Isus đelo ano Jerusalim. 2 Ano Jerusalim paše Bakresi kapija isi banja, savi akhardol jevrejsko Vitezda thaj gothe sesa pandž učharde terase. 3 Odori pašljona but nasvale manuša, kore, banđe thaj šuće. [Von ađućarena o paj te tresil, 4 golese so o anđelo e Gospodeso uljola ano određeno vreme ani banja thaj tresila o paj. Ko angleder bi džala andre kana o paj tresila, vov bi sastola taro po nasvalipe savo sasa le.]

5 Gothe pašo paj sasa jekh manuš savo tranda thaj ohto (38) berš sasa nasvalo.

6 Kana o Isus dikhlja le sar pašljol, a sar džanglja kaj si but berša nasvalo, pučlja le: "Manđe li te ave sasto?"

7 O nasvalo phenda lese: "Gospode, naj man khoni te mućhol man ani banja kana o paj tresil. Kana me džav premalo paj, khoni aver uljol angleder mande."

8 O Isus vaćarda lese: "Ušti, le ćiro than kaj pašljiljan thaj phir!"

9 A tari jekh drom kova manuš sastilo, lija po than kaj pašlilo thaj phirda. Al gova đive sasa savato 10 golese e Jevrejska šorutne vaćarde kalese save o Isus sastarda: "Avđive si savato! Phađe o zakon, golese so inđare ćiro than kaj pašljiljan ko savato!"

11 Al vov phenda lenđe: "Kova manuš savo sastarda man, phenda manđe: ‘Le ćiro than kaj pašljiljan thaj phir!’"

12 Von pučlje le: "Ko si gova manuš savo vaćarda tuće: ‘Le ćiro than kaj pašljiljan thaj phir?’"

13 Al o sastardo ni džanglja ko si, golese so o Isus crdija pe maškare but manuša save sesa gothe.

14 Pale gova, o Isus arakhlja ane hramesi avlin kole manuše save sastarda thaj vaćarda lese: "Akh, sastiljan! Ma vadži ćer greh, te ma avol tuće pobilačhe!"

15 Tegani o manuš đelo thaj vaćarda e Jevrejskone šorutnenđe kaj si gova o Isus savo sastarda le.

16 Gija, e Jevrejska šorutne lije te progonin e Isuse golese so sastarda e manuše ko savato.

17 Al o Isus vaćarda lenđe: "Mingro Dad uvek ćerol bući. Gija i me ćerav."

18 Gola lafura sesa povod e Jevrejskone šorutnenđe te dićhen pobut te mudaren le golese so na samo so phaglja o zakon taro savato, nego so e Devle čak akharol Dade thaj gija vov ćerda pe isto sar o Dol.

19 Golese o Isus phenda lenđe: "Čače, čače vaćarav tumenđe: o Čhavo korkoro pestar našti khanči te ćerol, već samo so dićhol so ćerol o Dad. Sa so o Dad ćerol, gova ćerol i o Čhavo. 20 Golese so o Dad manđol e Čhave thaj sikavol lese sa so korkoro ćerol. A ka sikavol lese i pobare buća tare kala so sastarda akale manuše, te aven zadivime i tumen. 21 Golese so, sar so o Dad vazdol e mulen thaj dol len džuvdipe, gija i o Čhavo dol džuvdipe kase manđol. 22 Golese so, o Dad khanikase ni sudil, nego dija o pravo pe Čhavese te anol o sudo, 23 te bi savore poštujina e Čhave sar so poštujin e Dade. Ko ni poštujil e Čhave, ni poštujil ni e Dade savo bičhalda le.

24 Čače, čače vaćarav tumenđe: ko mingre lafura šunol thaj pačal kole savo man bičhalda, isi le džuvdipe bizo meripe thaj ni ka avol osudimo nego nakhlo andaro meripe ano džuvdipe. 25 Čače, čače vaćarav tumenđe: avol o sato – thaj već avilo – kana e mule ka šunen o glaso e Devlese Čhaveso thaj kola save šunen, ka aven džuvde. 26 Sar so si o Dad izvor taro džuvdipe, gija pe Čhave ćerda izvor taro džuvdipe. 27 Thaj dija le vlast te sudil golese so si Čhavo e Manušeso.

28 Ma čudin tumen kalese! Golese so avol o vreme kana sa e mule ka šunen o glaso e Devlese Čhaveso 29 thaj ka ikljen andare pumare limora – kola save ćerde šukar, ka ušten te prihvatin o džuvdipe bizo meripe, a kola save ćerde bilačhe, ka ušten te aven osudime. 30 Me korkoro mandar khanči našti ćerav. Sudiv ko temelji so šundem tare mo Dad. A mingri presuda si pravedno golese so ni rodav te ćerav mingri volja, nego i volja kolesi savo bičhalda man."

31 "Te svedočisadem korkoro mandar, gova svedočanstvo naj dovoljno. 32 Al isi jekh aver savo svedočil mandar thaj me džanav kaj si gova svedočanstvo mandar dovoljno. 33 Tumen bičhalden e manušen ko Jovane o Krstitelj thaj vov svedočisada tumenđe taro čačipe. 34 Manđe naj potrebno o manuš te svedočil mandar, al sa kava vaćarav tumenđe taro Jovane, te bi spasina tumen. 35 O Jovane sasa sar svetiljka savi phabola thaj dola svetlost, a tumen mangljen zala vreme te uživin ane leso svetlost.

36 Al man isi po baro svedočanstvo tare Jovaneso. Golese so e buća save dija man mo Dad te ćerav – gola čudesna znakura save akana ćerav, svedočin mandar thaj dokažin kaj bičhalda man o Dad. 37 Thaj o Dad, savo bičhalda man, svedočisada mandar. Tumen nikad ni šunden leso glaso niti dikhljen leso muj. 38 Leso Lafi naj džuvdo ane tumende golese so ni manđen te pačan ane Koleste savo bičhalda man. 39 Tumen šukar sikljon e Sveta lila, golese so den gođi kaj šaj araćhen ane lende džuvdipe bizo meripe, a gola Sveta lila svedočin mandar. 40 Al tumen ni manđen te aven mande te avol tumen džuvdipe bizo meripe.

41 Me ni prihvativ slava tare manuša. 42 Al me pindžarav tumen thaj džanav kaj ane tumende naj e Devleso manglipe. 43 Me aviljem ano alav mingre Dadeso, a ni manđen te prihvatin man. Te avol khoni aver ane piro alav, le bi prihvatina. 44 Sar šaj pačan, tumen, save prihvatin i slava jekh averestar, al i slava savi si taro jekh Dol ni roden?

45 Ma te den gođi kaj me ka tuživ tumen angle mingro Dad. Tumen ka tužil o Mojsije, ane kaste čhuten tumari nada. 46 Kana bi čače pačana e Mojsijase, pačana bi i manđe. Golese so o Mojsije pisisada mandar. 47 Al te ni pačajen kova so pisisada vov, sar ka pačan ane mingre lafura!"