दानिय्येल 1

नाक हारोदोर नबूकदनेस्सर उन राजसभा दा

1 यहूदा प्रदेश इन राजा यहोयाकीम उन राज्यकाल इन तिसरा वर्ष दा बेबीलोन द्याश इन राजा नबूकदनेस्सर यहूदा अन राजधानी यरूशलेम मा आक्रमण माळ बुटुन, अदिक अदरी घेर्स बुटुन.*1:1 2 राजा 24:1; 2 इतिहास 36:5-7 2 आग प्रभु परमेश्वर यहूदा अन राजा यहोयाकीम अदिक आऊन नगर इक नबूकदनेस्सर उन कय दा सौप्स बु़ट्टुन. नबूकदनेस्सर परमेश्वर उन मंदिर इन थ्वाळासा पवित्र बरतनगोळ मा भी अधिकार माळ कोंडुन, अदिक आव आ बरतनगोळ इक शिनार द्याश दा तान द्याव उन मंदिर दा ओतकु, तान द्याव उन भंडारग्रह दा ईट्ट बुट्टुन.*1:2 2 राजा 20:17,18; 24:10-16; 2 इतिहास 36:10; यशायाह 39:7,8

3 राजा नबूकदनेस्सर तान मुख्य खोजा अशपनज उक आदेश कोट्टुन, होगी अदिक इस्त्राएली कौम इन आ बंदीगोळी तरी जो राजपरिवार अदिक कुलीन वंश इन आर. 4 आंदुर हारोदोर ईर पायजे अदिक आंदुर्दा यातोदु प्रकार इन शारीरिक दोष ईरबाळुल. आंदुर नोळदुर दा सुंदर ईरूल अदिक सप्पा प्रकार देल बुद्धिमान ईरूल. आंदुर ग्यान देल परिपूर्ण अदिक विद्वान ईरूल. आंदुर राजभवन दा स्यावा माळोर योग्य ईरूल. याग आंदुर बेबीलोन दा होट्ट बरूल आग आंदरी कसदी कौम इन साहित्‍य अदिक भाषा कलसेतीर.

मुख्‍य खोजा अशपनज राजा नबूकदनेस्सर उन आदेश उन पालन माळदुन.*1:4 2 राजा 20:17,18; 24:10-16; 2 इतिहास 36:10; यशायाह 39:7,8

5 राजा आदेश कोट्टुन कि इस्राएली कौम इन आ हारोदोर पारगोळ इक अदा राजकीय भोजन कोटकु आगुल जो आंदुर खुद तिनतान; अदा सारा आंदरी कुळ्सकु आगुल जो आंदुर खुद कुडुतार. इदुर अलावा आंदरी मुर वर्ष ताका आंदुर्द पालन पोषण माळकु आगुल. ई अवधि इन बाद्दा आंदुर राजा नबूकदनेस्सर उन स्यावा दा उपस्‍थित ईरूल.

6 ई इस्राएली हारोदोर पारगोळ दा टु यहूदा कुल इंदुर नाक हारोदोर इंदुर ईरोर: दानिएल, हनन्याह, मीशाएल अदिक अजर्याह.