1 Ʉnene Paʉlo, mitʉmi wang'wa Kilisito Yesʉ, anga mʉloewe Itunda.

Kʉmʉandɨkɨla balʉa ɨyɨ ʉnyenye antʉ ang'wi Itunda nɨmʉkolɨ kʉ Epeso, nɨmɨahʉɨɨli mʉngwa Kilisito Yesʉ.

2 Kʉlompile mʉkembetwe mʉtule nɨ matiliga kʉpuma kʉng'wa Tata witʉ Itunda nʉ kʉpuma kʉng'wi Isekʉlʉ witʉ Kilisito.

3 Wakʉligwe Itunda Tata wang'wi Isekʉlʉ witʉ Yesʉ kilisito, kʉnsoko kʉʉkamɨnkani nʉ Kilisito ʉkʉkembetile ʉsese ʉkembetwa wɨhi nʉwa Ngwahʉ Ng'welʉ kʉpuma kigʉlʉ. 4 Kʉnsoko ʉnkumbigʉlʉ naɨʉkɨlɨ kʉtundwa, Itunda aɨʉkʉhoile ʉsese kʉkɨɨla Kilisito kʉhume kʉgombeka pang'wakwe nɨagila magazo. Kʉnsoko aɨʉkʉloilwe.

5 Ʉnkumbigʉlʉ naɨʉkɨlɨ kʉtundwa Itunda aɨʉlamʉe kʉʉhola kʉtule kɨana akwe kʉkɨɨla Yesʉ Kilisito, aɨʉlamʉe kitʉma itɨ kʉnsoko aɨyʉmʉloile. 6 Kʉlʉlo kʉʉmʉkʉlya Itunda kʉkɨaisa kakwe kɨkʉlʉ naɨʉkʉpee ʉsese nakanda kʉkɨɨla Ng'waakwe nʉmʉloilwe. 7 Kʉkomowe kipolyo nɨla sakami ang'wa Kilisito. Kʉhegeigwe mɨlandʉ kʉnsoko aʉkende wɨdʉ nʉwang'wi Itunda. 8 Itunda aɨʉkʉkembetile ʉkende ʉwʉ nʉkʉkɨlɨnkɨɨla.

Kʉmahala nʉ ʉlɨngi wakwe wɨhi. 9 Itunda ʉkʉhumilye kʉlɨnge nkani yakwe niya ʉnkunku, naɨʉsɨgɨe kitʉma ikani ɨlɨ kʉkɨɨla Kilisito. 10 Isɨgo lang'wi Itunda aɨkʉpikɨɨla itungo lakwe wɨkatenda ikani naɨʉloilwe Kilisito wɨkatema intʉ yɨhi ni intʉ yɨhi kigʉlʉ nʉ mʉʉnkumbigʉlʉ.

11 Mʉ ʉkamɨnkani nʉ Kilisito ʉsese kahoilwe kʉtule kɨantʉ ang'wi Itunda anga mʉng'wenso ʉloewe. Itunda witʉmile makani ɨhi anga mʉloewe. 12 Itunda aɨʉtendile itɨ, kʉnsoko ʉsese nɨ Kɨayahudi naɨkʉtongee kʉmʉhʉɨɨla Kilisito, kʉmʉkʉlye Itunda kʉ ʉkʉlʉ wakwe.

13 Nʉnyenye antʉ nɨshanga mɨ Ayahudi, aɨmigulye lʉkani latai, nɨɨza Nkani Nza naɨyɨmʉletee ʉgunwi. Mɨkamʉhʉɨla ʉ Kilisito, nʉyo Itunda kʉlagiɨla kɨna ʉnyenye mɨantʉ akwe, kʉʉkamɨnkani nʉ Kilisito mɨkaɨkɨlwa kɨlɨngasɨɨlyo ka lʉkao lakwe, wɨkamʉpa Ng'wahʉ Ng'welʉ naɨʉlɨɨye ʉkʉmʉpa. 14 Ng'wahʉ Ng'welʉ nʉwanso wɨkʉsasha kʉsɨngɨɨlye makani ɨhi Itunda naɨʉatambʉɨe ʉkʉapa antʉ akwe, ikani ɨlɨ lɨkʉʉkamɨnkɨɨlya kɨna Itunda ʉkʉakomola antʉ akwe. Ʉsese kʉkʉlye ʉkʉlʉ wang'wi Itunda.

15 Kʉpuma naɨnigulye mʉmʉhʉɨɨe Isekʉlʉ Yesʉ nʉʉlowa wanyu kʉ antʉ ɨhi nɨang'wi Itunda, 16 kwe shanga ndekile kʉmʉlʉmba Itunda kʉnsoko anyu. Nʉmʉkɨmbʉkile nɨkʉmʉlompa Itunda. 17 Nongolekile kʉmʉlompa Itunda wang'wi Isekʉlʉ witʉ Yesʉ Kilisito, Tata nʉwi kʉlyo, wamʉpe Ng'wahʉ Ng'welʉ nʉwɨkamʉsasha mʉgombeke kʉng'wakwe nʉ kʉmʉkʉnʉkʉɨla mʉhume kʉmʉlɨnga Itunda. 18 Nɨmʉlompa Itunda walʉgʉle nkolo yanyu mʉsɨngɨɨlye nzelya mʉhume kʉlɨnga isʉmbɨlyo naɨʉaɨkɨɨye nɨsʉmbɨɨlyo naɨʉaɨkɨɨye antʉ akwe. 19 Kʉmʉlompa Itunda mʉmanya ʉhumi wakwe nʉʉkʉlʉ nangalʉ kʉnsoko itʉ ʉsese nɨkʉmʉhʉɨɨe ʉ Kilisito. Ʉhumi nʉwanso nʉwitʉma mɨlɨmo mʉng'witʉ, yimpyani nɨ ngulu nɨnkʉlʉ, 20 naɨʉmiʉkɨɨye ʉ Kilisito, wamikalɨnsha ipande lakwe nɨla kɨgoha nɨla ʉkʉlʉ. 21 Ʉmʉɨkile ʉ Kilisito wateme ʉtemi wɨhi nɨ ʉhumi wɨhi nʉ ngulu yɨhi ʉkʉlʉ wɨhi. Ʉmʉpee kʉtema ʉkʉlʉ wɨhi nʉ ʉkolɨ mʉʉnkumbigʉlʉ ʉwʉ nʉ mʉʉnkumbigʉlʉ nʉ ʉpembilye. 22 Itunda ʉiɨkile intʉ yɨhi yiteng'we nʉ Kilisito hangɨ wamʉtenda watule mʉtongeeli mʉ maintʉ ɨhi kʉnsoko a antʉ nɨamʉhʉɨɨe ʉ Kilisito. 23 Antʉ nɨamʉhʉɨɨe ʉ Kilisito ingɨ mʉɨlɨ wakwe, nʉ kilisito ng'wenso wɨkondanɨlya intʉ yɨhi.