1 Ʉnyenye ang'enya, kʉnsoko mʉkamɨnkanile Isekʉlʉ tuli nʉ lwijo kʉ aleli anyu, kʉnsoko ikani ɨlɨ ɨngɨ iza. 2 Ilagɨɨlyo nɨla ng'wandyo nɨlɨkete ilago lɨlagɨɨye "Mʉkʉlye tataako nʉ iyaako, 3 ingɨ ʉkendepwe, nʉkishiɨ mahikʉ dʉ mʉnʉ mihɨɨ."

4 Nʉ nyenye nɨ mɨatata, mʉleke kʉatendeela ʉbɨ ɨana anyu, ingɨ mʉalele mʉmahala nʉ ʉmanyisi nʉ ʉlangi naɨmʉsɨngɨɨye kʉpuma kʉng'wi Isekʉlʉ.

5 Ʉnyenye atʉʉng'wa, tuli nʉ lwijo ni kʉlyo kʉ akʉlʉ anyu nɨamʉnʉ mʉʉnkumbigʉlʉ. Hangɨ tendi itɨ kʉnkolo ɨng'wɨ, anga nɨmʉkete lwijo kʉng'wa Kilisito. 6 Tendi itɨ shanga kʉ aloeelya ʉdu akʉlʉ anyu apo nɨakʉmʉona mʉhume kʉmʉkʉɨɨlwa, ingɨ matungo ɨhi. Kʉnsoko ʉnyenye ingɨ mɨatʉʉng'wa ang'wa Kilisito, mitʉme kʉnkolo yanyu makani Itunda nʉmaloilwe. 7 Itʉmi mɨlɨmo anyu, hangɨ mʉlowe kitʉma. Itʉmi anga mʉkʉmitʉmɨla Isekʉlʉ, shanga kʉ antʉ ʉdu. 8 Kɨmbʉki kɨna Isekʉlʉ ʉkʉmʉpa mʉntʉ wɨhi kɨpegwa nʉtendile makani nɨmaza watule mʉtʉʉng'wa ang'wɨ mʉntʉ nʉwidesile.

9 Nʉ nyenye akʉlʉ, atendeliʉ atʉʉng'wa anyu, leki kʉatambʉɨla makani akʉatumba, kʉnsoko mʉlɨngile kɨna Isekʉlʉ wanyu nʉyʉ nʉ wao ingɨ ʉng'wɨ du hangɨ ʉkolɨ kigʉlʉ, hangɨ shanga wɨkʉɨɨla mʉntʉ ɨhi.

10 Kʉmaɨɨlya kʉtambʉla itɨ, ndoilwe mʉkamatɨke mʉʉkamɨnkani ni Isekʉlʉ nʉ mʉʉhumi nʉwa ngulu yakwe. 11 Tugali yɨgɨ yɨhi nɨmʉpewe ni Itunda ingɨ mʉhume kʉgilya ʉhʉgu wɨhi nʉwang'wa Shetani. 12 Kʉnsoko ɨmbita itʉ shanga kʉikʉa nɨ antʉ ingɨ kʉikʉa nɨ anyambita nɨabɨ mʉʉnkumbigʉlʉ nʉwa kɨnkolo. Ʉsese kʉikʉa nʉ ʉtemi nʉ ʉhumi ningulu niya kiti nɨ ahɨng'wɨ nɨakolɨ mʉʉnkumbigʉlʉ nɨshanga wigela. 13 Kʉlʉlo tugali yɨgɨ yɨhi Itunda nʉmʉpee ingɨ mʉhume kikʉɨla mʉ matungo aʉbɨ, anga mʉkondye kikʉa mʉkʉlongoleka kʉtula mɨakamatɨku.

14 Itɨ gwa, ihambi kʉnʉ taɨ ɨze ɨhanga mɨsipi mʉilɨno yanyu, ni ntendo niigombekile kʉng'wi Itunda yitule anga ngʉla kʉkɨngɨla ikua yanyu. 15 Ʉwihambi nʉwa kʉtanantya Nkani Nza niya matiliga ʉtule anga ilatʉ mʉ mɨgʉlʉ anyu. 16 Palʉng'wɨ nɨ itɨ ʉhʉɨɨli ʉtule anga ngʉla mʉ mɨkono anyu, ɨmʉaɨɨlye kʉkɨngɨla mɨyɨ ɨhi nɨkete moto nang'wa Shetani. 17 Sɨngɨɨlyi ʉgunwi wang'wi Itunda ʉtule anga nkompila ashʉma, nʉ lʉkani lang'wi Itunda lʉtule anga nyalahanda nɨmɨpegwa nʉ Ng'wahʉ Ng'welʉ. 18 Mʉmʉlompe mahikʉ ɨhi anga Ng'wahʉ Ng'welʉ nʉmʉtongee, mʉ ʉlompi nɨ malompi. Matungo ɨhi mihambe kʉalompeela antʉ ɨhi nɨang'wi Itunda. 19 Nompeeli nʉnene ga, ɨngɨ nɨkʉligitya Itunda wanzaɨɨlye kɨntʉ nɨkakʉligitya, ndeke kogopa kʉtanantya tai Itunda nʉɨkile kɨhenga kʉkɨɨla Nkani Nza. 20 Itunda ʉndagɨɨye ntanantye Nkani Nza, palʉng'wɨ nʉ kʉtula nkolɨ mʉkɨtungo. Kʉlʉlo mʉnompeele nihume kʉtanantya kʉʉkamatɨku anga niitakɨwe.

21 Tikiko nɨ mʉnyandʉgʉ witʉ nɨkʉmuloilwe hangɨ mitʉmi nɨ mʉhʉɨɨli mʉʉkamɨnkani ni Isekʉlʉ, ʉkʉmʉɨla makani ɨhi mʉhume kʉlɨnga nongolekiʉlɨ hangɨ kitʉma ntʉni. 22 Nʉmʉlagɨɨye ng'wenso waze wamʉganʉɨle ɨmpola yitʉ, nʉyo wamʉkomelye nkolo.

23 Kʉlʉlo anyandʉgʉ ane kʉmʉlompa Itunda Tata ni Isekʉlʉ witʉ Yesʉ Kilisito amʉpe matiliga nʉ ʉlowa nʉ ʉhʉɨɨli. 24 Kʉmʉlompa Itunda wamʉkembete ʉnyenye nɨ antʉ ɨhi nɨmʉmʉloilwe Isekʉlʉ witʉ Yesʉ Kilisito kʉ ʉlowa wɨhi nʉʉgila mpelo.