1 Anyandʉgʉ ane, anga mʉmʉone mʉntʉ watenda mʉlandʉ, ʉʉgwa ʉnyenye nɨmʉtongilwe nʉ Ng’wahʉ Ng’welʉ mʉhʉgʉlyi kʉ ʉpolo waleke ɨmɨlandʉ. Ingɨ nʉ nyenye ga mʉhʉgʉke mʉleke kingɨla mʉ mɨlandʉ. 2 Mʉziaɨɨlya ʉnyenye, anga mʉtende itɨ mʉkʉtimɨlyi ilagɨɨlyo lang’wa Kilisito. 3 Anga mʉntʉ waʉkiona kɨna mʉza kʉkɨla nɨang’wɨ, mʉntʉ nʉwanso ʉkikonga ʉng’wenso. 4 Ingɨ mʉntʉ wɨhi nʉwikolenkeelye ʉng’wenso. Anga waone kɨna mʉza papo ʉhumile kikʉlya, shanga ʉkimpyania nʉ mʉntʉ nʉmʉngɨza. 5 Ndogoelyo, mʉntʉ wɨhi ʉkʉlamʉlwa anga mʉtendee.

6 Itɨ gwa, mʉntʉ wɨhi nʉkʉmanyisigwa ʉlʉkani lang’wi Itunda wamomoele ʉmʉmanyisi wakwe maintʉ nɨ maza nʉkete.

7 Leki kʉkongwi, Itunda shanga wɨonwa ʉpʉngʉ, kʉnsoko ʉmʉntʉ wɨogola ɨko nʉlɨmile. 8 Mʉntʉ nʉkʉlɨma maintʉ a mʉʉnkumbigʉlʉ walɨnge kɨna ɨola, ingɨ mʉntʉ nʉkitʉma makani namʉloeeye Ng’wahʉ Ng’welʉ ʉkʉlija ʉpanga nʉwa kalɨ na kalɨ kʉpuma kʉ Ng’wahʉ Ng’welʉ. 9 Kʉlʉlo kʉleke kʉkatapa kitʉma makani nɨmaza, kʉnsoko anga kʉleke kʉkatapa maogola anga apike kʉʉogola. 10 Kʉlʉlo, nɨkʉkɨlɨ kʉkete ɨlyoma, kʉzeaaɨɨlya antʉ ɨhi makani nɨ maza, niikʉlʉ nangalʉ antʉ nɨamʉhʉɨɨe ʉ Kilisito.

11 Balʉa ɨyɨ nʉmʉandɨkɨe nene kʉ mʉkono wane, kolwi makanɨ nɨ nɨmabonkoe. 12 Antʉ nɨaloilwe kʉonwa kɨna aza kɨmʉɨlɨ aloilwe amʉsinje kʉtalwa kigada kʉnsoko akʉtyata malagɨɨlyo ang’wa Mʉsa. Akʉtenda itɨ shanga aloilwe kagigwa kʉnsoko akʉtanantya nkani niya ɨnsha ang’wa Kilisito mʉ mʉsalaba. 13 Antʉ nɨatawe kiganda shanga atyatile ɨmalagɨɨlyo ang’wa Mʉsa, aloilwe ʉnyenye mʉtalwe kiganda kʉnsoko akʉtyata malagɨɨlyo ang’wa Mʉsa, ingɨ nɨanso ikʉlye kʉnsoko akʉtalwa kɨganda mʉ mʉɨlɨ wanyʉ. 14 Ingɨ ʉnene gwa, shanga kikʉlya kʉnsoko a kɨntʉ kɨhi, nɨkikʉɨlya ingɨ kʉnsoko nsha ang’wi Isekʉlʉ witʉ Yesʉ Kilisito mʉmʉsalaba, kʉkɨɨla nsha akwe makani ɨhi na mʉnkumbigʉlʉ shanga kɨntʉ kʉng’wane, likalo lane nʉla kalɨ lakule nʉ Kilisito mʉ mʉsalaba. 15 Kʉnsoko kʉtalwa kiganda nʉ kʉleka kʉtalwa kiganda shanga kɨntʉ kʉng’wane, kɨntʉ nɨkɨza ingɨ kʉʉmbwa ʉpya ni Itunda kʉkɨɨla Kilisito. 16 Antʉ nɨatyatile malagɨɨlyo aya, nɨatule nɨ matiliga nɨ kɨaisa, matiliga nɨ kɨaisa palʉng’wɨ nɨ Aisiaeli, antʉ ang’wi Itunda. 17 Kandɨɨlya ino, mʉntʉ wɨhi nʉwaleke kʉnyoma, kʉnsoko nkete mabasa mʉ mʉɨlɨ wane nakʉmitʉmɨla Yesʉ. 18 Anyandʉgʉ ane, kʉlomple ʉkende wang’wi Isekʉlʉ witʉ ʉ Yesʉ Kilisito mʉtule nʉ nyenye. Tai.