1 wiδe yelle eθcejjeε g elmesiyH, seg elhne d elmHebbeθ, ducarex g erruwH delHnan dwesxaf, 2 rahu eθkemlem elferHiyw max eykuwn γerwem erray iyjen wexse icθ, ennefs icθ welfekr iyjen. 3 elyetkuwnc jerawem eθHazeb detfuwxiyr elfareγ, ukul iyjen essiywem eyeHseb elγires xires, 4 welilehhiyc kan s elmesleHθes emme s elmeslHeθ nelγires zade. 5 w elfekrewwem eykuwn emelfekr n yesuwε elmesiyH. 6 nette g kul cey emeTTebiyεeθ n erreb yemenni elyeHsibc ekunwnes iyjen drebbi δelheqq eykebbec δiys. 7 yerni yedje elli γers elkul yawi eTTebiyεeθ n elεebδ max i yeδwel emijen essiyne. 8 yeθwaDeε iĎaweε elθemettent, θemettent f eSSeliyb. 9 heδake εlac ysuliyθ rebbi, yuces zade ellesm emeqqar g ellesami elkul. 10 bac e yesjeδ eyyesuwε kul iyjen yedder g esme welle g elqeεεeθ welle seddu elqeεεeθ, 11 usinc eyesθeεref kul iyles elli yesuwε elmesiyH δerreb usinc emejδen rebbi deddaθne.

12 eyendeγ eyewmeθniyw elli exsexθen, diyme etĎawεem diyye uneč iδwem. zaδe muhem exθer eyeθĎawεem g elγyebiyw. usahen tegem ywemneεwwem s elxuwf derrehbeθ, 13 εlexaTer rebbi yθeg δiywem bac e xenyuwc enniyeθ δelquδreθ bac e tsefrHem. 14 tegem kul cey menγir exernen ula δelεrax, 15 bac e θkuwnem endaf weHebbac e lluwm fellawem emidrari nrebbi g eljiyl deDDayeε delfaseδ, etDewwam δiys m elkwakeb g elkuwn, 16 ceddiyn eSHiyH g *elkelimeθ n weddar, bac e θfuxre g was n elmesiyH essiywem δelli ellegixc welletεibexc g elbaTel. 17 Hette eδuwce iδemniyw δeDHiyyeθ f elxaĎer nelimenewwem delxeδmtes, eferHe iyδwem elkul, 18 xenyum zade efrHeθ iyδi.

19 wetteθmenniγ g seyyedne yesuwε eδazne tweliwwem tiymuwθawus qriyb bac e sne leHwelewwem usinc eyeĎman uliyw. 20 εlexaTer leγriyc δ wiyn m nette eyelhe essiywem belgde. 21 ukul iyjen essyiwem ixeddem yimenes muc iyesuwε elmesiyH, 22 uxenyum tessenem ettejrebθes umax i yexδem elbcareθ iyδi emelxeδmeθ enwenglus ydaddes. 23 eθmenniγ eθazne etweliwwem max eyeθbeyyen elmeSiriyw, 24 uγeri eθθiyqeθ g rebbi elli neč δerejεe tweliwwem beεδ lewse.

25 wezriyγ elli lazem eδazne tweliwwem ebfruwdiytus, yewwe wimuεewniyw werfiqiyw g ujaheδ welli θuznemti tweliyw bac e yyexδem, 26 unette yecθeHcawem elkul uδimeθqelleq εlexaTer nette yessen elli xenyum tesliym s weTTenes. 27 ykan δmaDuwn egget elqriyb δeyemmuwθ, yemenni rebbi yerHemti nette enneč zade, bac e rrennixc eHzan f weHzan. 28 uwahen elli yedjayi ezerbe g wezenes tweliwwem bac max ettezrem eyerjeε elferH tweliwwem usinc eyenqez eHzeniyw. 29 θeqblemti g erreb s elferH θkermem elli m nette, 30 εlexaTer qriyb eyemmuwθ g elxeδmeθ n elmesiyH ixaTer s imenes bac e ykemmel elli δennaqeS g elxeδmtewwem ineč.