1 seg buwlus dtiymuwθawus ixeddamen n yesuwε elmesiyH, yelli ettemnen elkul s yesuwε elmesiyH, elli εemren g fiylibbiy, wiδsen imesHal dimuεawnen neljemεεeθ nimumnen. 2 exenyuc esseHHeθ delxiyr seg rebbi deddaθne d seyδne yesuwε elmesiyH.

3 eHemde rebbi f elxeĎrewwem g ezzaliθiyw, 4 udiyme deεεuγewem uneč ferHan. 5 f elxaĎer nuεewnewwem g uεerfiyw selYinjiyl s eg was iglewwel elwesse 6 uγeri eθiyqeθ egwah: rebbi elli yebδe elxeδmeθ etteSSaleHθ δiwem ettikemmel elwas n yesuwε elmesiyH. 7 uselHaq eHusse s uHussiye wah etweliwwem elkul, uxenyum diyme g uliyw, welkulkum d icriyxen iyδi g enneεmeθ enrebbi, sewe kane g elHebs welle etδefaεe f elbcareθ wetYiyδe δiys. 8 urebbi eyecheδ elli neč etHenγawem elkul s elHniyn enyesuwε elmesiyH 9 utahen eyendeγ ezzalliθiyw bac e yerni exsewwem yelmeεrfeθ delfehm, 10 usinc eθexθarem ebehhay usinc eθeδwlem endaf elwas n yesuwε elmesiyH, 11 usinc eθεebbem s elγelleθ nelHeq seg yesuwε elmesiyH yumejjeδ nrebbi dweHmeδes.

12 wexse eθesnem eyewmeθniyw, elli yejrayi yεawen f wencar nelbcareθ, 13 eδefiyw yelHebs f elxaĎer n elmesiyH yiweD yelHers nelHakem delqeSres elkul. 14 welmexθer newmaθen ecejjeεθen γer erreb emnuweθiyw, erniyn g elquwweθ nubeccer selkelmeθ nrebbi menγiyr ekkaδ. 15 belHeq lebHaD etbecren s elmesiyH s elHesδ duxaSem, emme lebHaD s enniyyeθ tebhe. 16 wiyhen etδuz δiysen exse, εlexaTerhum essenen elli neč etδefaεe f ellinjiyl. 17 w iddiyn yetδuz δiysen eθHazeb, wetbecrenc yelmesiyH s elHeq, etεilaken siyn δerniyn g etteεbiyw uneč g elHebs. 18 wilekan? elmuhem elmesiyH etnaben essis s elHeq welle s elbaTel. s wah neč ferHan uδeferHe embeεδ. 19 uneč essene elli yejrayi elkul g ellexxer δeyferrej felle, f elxaĎer nezzalliθewwem dεawen nerruwH nyesuwε elmesiyH, 20 ukul elli etteθmenniγ δiys enni elfeclexc g Hette cey emme elkul quwwe welkul merre welmerreθe zade δeyekber essi elmesiyH, sewe s wedder welle s temettent. 21 εlexaTer yneč eddar eyendeγ elmesiyH utemettent δerrebH. 22 emme iδekan s leHyeθiyw ege elxeδmeθ tebhe, mat exθare? ellessinexc! 23 uneč meHSuwr jar Hejθiyn: exse edje eddunyeθe, bac e kuwne delmesiyH, uwahen xiyr. 24 emme θeqimiθiyw eddere xiyr f elxaĎrewwem. 25 w meδam γeri eθθiyqeθ g wah, essene elli δeqqiyme eεmere iyδwem elkul, f elxaĎer nweθqedmewwem g liman dwefreHewwem δiys 26 bac e θerniym eθeθfuxrem s elli yegeyiθi elmesiyH s weHDeriyw binetkum menjdiyd.

27 yemenni edreθ bac e θerniym g umejjeδ nelYinjiyl n elmesiyH. Hette iδe useδe ezriγawem welle eqqiyme δelγayeb fellawem, selle g lexberewwem wessene elli xenyum teθbeθem g erruwH iyjen. wessen zade etjehaδem s ennefes iyjen jmiyε bac leεbaδ iddiyn emnen s elli yemmeεlen g elYinjiyl. 28 weθukδemc seγ elεδuwwem g Hette cey. uwediyn δelburhan f ehlexensen ufwexleSewwem uwahen seγ rebbi 29 εlexaTer yenεem fellawem bac e θeθwejεem f elxaĎer n elmesiyH, muc eθemnem essis berk. 30 eθezriym max i θwejεe seg ejaheδ weθsellem elli eqqiyme etjehaδe. uxenyum zade jahδeθ emneč.