1 a idrari, Dawεeθ elweldinewwem, wah eyendeγ elHeq. 2 kermeθ deddeθwem d yemmeθwem w θah eyendeγ elwSaweθ tiglewwelt s elweεδ: 3 "bac e θnewleδ elxiyr usinc eTwelneθ liyyemex g elqeεεeθ". 4 w xenyum eyelweldin, eθγececemc idreriwwem yemenni rebbemten emmax i xeniweSSe rebbi.

5 a ixδiymen Dewεeθ lesyeδewwem s elxuwf d errehbeθ d uwl δ undif emmax i tDewaεem g elmesiyH, 6 muc m wiyn yexs eyserDe leεbaδ, yemenni txedmem y rebbi, 7 w edj eθkuwn elxeδmtewwem y nihnin enniyyeθ etteSafiθ tgulec εliykum θxedmem y rabbi w muc y leεbaδ, 8 w esneθ elli rebbi yetjaze kul iyjen eyexδem elxeδmeθ δ teSSaleHθ δ exδiym uneγ δ Hurri. 9 w xenyum zade a lesyad, εamleθ ixδimnewwem belgde, entheδeδemc tesnem elli siδinsen d siδiθwem g esme nette iyjen w elyetjamil Hed.

10 w gellexxer exennenne θqewwaθ g rebbi d elquδerθes θemeqqarθ. 11 tewyem eslaH n rebbi elkamel bac e θqewmem elHiylaθ n ecciyĎan, 12 εlexaTer nečin netHeribc g elεδu s exsum d iδemmen yemenni g iθbab n essulTaθ d erriyaseθ g elεalem, elεalem elli elkulle δ θsellesθ d lerwaH n eccer esseylelneθ g esme. 13 heδake εlac yelzemkum eθqamem eslaH n rebbi bac e θgeddem eθqewmem as n eccer w eltuciym eθgeddem eθHerbem beεδ eθegem kul ciy belgde. 14 θebθeθ imenewwem tegem elHeq m elHzem g emmesewwem, w elεeδl m edderε f elbeδnewwem, 15 θeTfem eSHiH g encar n elbcareθ n esselm m eSSebbaĎ g ikreεnewwem. 16 eθεebbem ulewnewwem s eliman elmeδuwlen m etturs eθesbeddem essis esehm elεefyeθ n eccer. 17 tegem emneε m elkeskeθ y iyxef, w elkelmeθ n rebbi m essiyf n erruwH. 18 ezzelleθ g erruwH luqaθ elkul, terrem elbelewwem, eθwaDbem f eδεe y imumnen elkul. 19 teδεumiδ y neč zade bac e yweffeq rebbi g ebeccer n ellinjiyl s ecjaεeθ 20 elli neč δ essefires elli yemmeqqen s eslasel. eδεuwmiδ bac e nabiγ essis s ecjaεeθ emmax yelzem age.

21 emme leHweliyw d leεmeliyw ture exenixebber fellasen yeweθne emeHbuwb yewwe tiyxiykus w nette imuεewniyw g elxeδmeθ n rebbi. 22 uzenγewemti beδδemme bac e xenixebber f leHwelenne usinc eySebber ulewnewem. 23 eslam f ewmeθnenne elkul d eliman d exse seg rebbi deddaθne d seyyedne yesuwε elmesiyH. 24 elneεmeθ eθkuwn f elli exsen seyysdne yesuwε elkul w exsenti exse etmettic.