1 meδemkum δ idrari elli yexsiyn rebbi, egeθ emmax yθeg nette, 2 tuyuwrem g exse teyuwriθ n elmesiyH elli f elxeDrenne yDeHHe s imenes yuc imenes δ eDHiyyeθ δ temebruxθ y rebbi. 3 yemenni ezne δ elfsaδ d eTmeε s lenweεesen elkul liθeffeγc f leεbaδ n rebbi Hette δenezγen ellesmes. 4 la δ elqbaHeθ w la δ esfaheθ w la δ etfyisix wah elkul liθeffeγc fellawem, yemenni kan δ esebbeH d ecxar n rebbi. 5 tesnem xenyum elli ezzani d elfaseδ d eĎemmaε welγres Hette elwerθ g elmelx n elmesiyH d rebbi. elli δ eδemmeε iεebbeδ g leSnam. 6 weθedjemc Hette Hed exenyexδeε s edwi n elbaTel εlexater weδiyn eyγeccec rebbi f idrari n elmeεSyeθ. 7 wenčerxemc. 8 qebl θkanem g eθsellesθ w ture θeδwelem θefuθ s rebbi. heδake εlac yelzemkum eθuyuwrem teyuwriθ n idrari n tefuθ, 9 εlexaTer eθθemreθ n elxiyr eθkuwn g elxiyr d eSlaH d elHeq. 10 teθεelmem elli eyserDe rebbi, 11 w eθcerxemc g age n eccer elli eddiyc elfeyδeθ yemenni ekcfemt, 12 w elli θegenti besserqe, eneθHeccem Hette δeθnenzeγ. 13 yemenni kul elli eyemmekcef eyeffeγ y θefuθ, 14 w kul elli eyemsuwfeγ yeδwel ettefuθ. heδake εlac yenne elxθab: "sθaqeĎ ya elnaεes! tekreδ seg jar inemmutte, eyDewwe fellax elmesiyH" 15 terrem elbelewwem eSbiyH max eθuyuwrem muc teyuwriθ n ejjuhhal, emme teyuwriθ n elli s leεqulensen. 16 elli essenen esθfaδen s elfurSeθ elli yedjeyesenteθ rebbi εlexaTer liyyam wHecneθ. 17 emmale eθkunemc δ ejjuhhal tefhmem mat iyyexs rebbi. 18 w eθeswemc ecrab εlexaTer δis decciyxaθ, yemenni εebbaθ imenewwem s erruwH elqudus, 19 tuθlayem d beεDkum s edwi n esebbeH d eδkar d eHmaδ. retleθ tsebHem y rebbi seg elleγ n ulewnewwem 20 tecxrem rebbi deddaθne diyme f kul ciy, s ellesm n seyyeδne yesuwε elmesiyH.

21 Dewεeθ beεDkum s elxuwf g rebbi. 22 a elwacun, Deweεmeθ iryezennexmeθ emmax i tDaweεmeθ g rebbi, 23 εlexaTer eryaz nette iyxef n teθmeTTuθ emmax elmesiyH nette iyxef n elkeniyseθ, netteθ elbeδnes w nette elli yessemneεt. 24 w max i tDaweε elkeniyseθ elmesiyH, eDeweεneθ elwacun iryezennesneθ g kul ciy.

25 a iryazen exseθ elwecunewwem emmax i yyexse elmesiyH elkeniyseθ yDeHHe s imenes f elxeDres, 26 bac e ttiqeddes yTehhert s eγessel n amen d elkelmeθ, 27 w bac e ttiHeDDer y imenes δ elkeniyseθ δ timmejjet w eddis Hette elεiyb, yemenni δ timqeddesθ w eddis Hette elεiyb. 28 w heδake εlac yelzem iryazen exsen elwacunensen emmax exsen elbeδnensen. w elli ayexs liweces yexse imenes. 29 w eHebbe Hette iyjen eyebγeD elbeδnes, yemenni eyettelhe essis emmax i ylehhe elmesiyH s elkeniyseθ. 30 εlexaTer nečin δ leĎraf n elbδen n elmesiyH. 31 heδake εlac yemmeri g elxθab, "ayedj eryaz yemmes d daddes usinc eyeδwel nette d temeTTuθes elbδen iyjen." 32 esserre wah δ emeqqar w elqeSδiyw s essere, edwi elli ennixθi f elmesiyH d elkeniyseθ. 33 exennenne elmerreθ xlaf. edj ayexs kul iyjen essiywem liweces emmax ayexs imenes, w edj eθqedder temeTTuθ eryazes.