1 seg buwlus, emersal n yesuwε elmesiyH s elmeciyYeθ n rebbi, y elli δimqedsen w θemnen s yesuwε elmesiyH, (w εemren g efesus.) 2 enneεmeθ d eslam fellawem seg seyyedne yesuwε elmesiyH.

3 tbark elleh erreb elli nette δ deddes n seyyedne yesuwε elmesiyH zade elli iberxane s kul elberxeθ n erruwH g esme. 4 qebl n exlaq n eddunyeθ, yexθerane rebbi g elmesiyH bac e nkuwn δ iqeddiysen g elmesiyH usinc enebδe ndaf w δ eTTaher jar ifesnes, 5 rebbi yexθerane seg qebl g elmHebθes bac e nkuwn δ idreriys seg yesuwε elmesiyH w θeδin eyendeγ elmeciYθes teSSaleHθ, 6 bac e θnemdeH necxerθi f enneεmtes timmejjet elli yenεem fellane essis g memmis emeHbuwb. 7 εlexaTer yesuwε elmesiyH yefδyanes iδemnes, eγfaren leδnubenne, w θahen enneεmeθ temeqqerθ elli yuceyenext, 8 w elli ysuggezt fellane s eδke d elHekmeθ elli δis elkul. 9 yessexnane esser n elmeciYθes teSSaleHθ elli tesserĎaθi welli yeqsetteθ s elmesiyH, 10 bac rebbi eykmal elbernemajes max eδuqan luqaθ, usinc eylemmeδ elli g esme d elqeεεeθ elkul seddu elHukm n elmesiyH. 11 wegelmesiyH yexθrane erreb bac e nkuwn inette emmax i xenyqedder seg qebl. εlexaTer yeg emmax eyexs eyqerer, 12 bac e nsebbeH s elmejδes nečin elli nemmen iglewlen s elmesiyH. 13 w δis xenyum zade max i θeslim edwi n elHeq θemnem essis, edwi n elHeq nette ellinjiyl elli δis emneεewwem. w s elmesiyH zade yHuT rebbi ellemerθes fellawem max exenyuwc erruwH elqudus elli yuεeδ essis. 14 w nette eyendeγ elεerbuwn n ewreθenne, elmeyefδe rebbi elli qbelen elweεδ. w sahen rebbi yemsebH yemmejjeδ.

15 heδake εlac max i sliγ elli xenyum ettemnem s yesuwε w texsem imumnen elkul, 16 elbeTlexc seg eHmaδ n rebbi f elxĎrewwem, eδεuγawem g ezzelliθiyw. 17 eDelbe seg rebbi elli nette δdeddeθna immejjed, rebbis n seyyedne yesuwε elmesiyH, bac e xenyuc erruwH n elHikmeθ usinc ettesnem belgde, 18 usinc eynewwer elbSiyreθ n ulewnewwem bac e θesnem elxiyr elli yeHrzewemti max yxeninabe, delberxaθ ttiγziyrin elli yedjiyneθ y leεbeδes imumnen. 19 usinc eθesnem elqiymeθ n elquwweθ temeqqerθ elli yegeyenext y nečin imumnen w netteθ elquδreθ n rebbi 20 elli iHuTTiθ g elmesiyH max i θyessikker seg jar inemmutte, yesqiymi f elymines g esmaweθ 21 denni kul ejjah d eSSulTan, denni kul elquδreθ d esyaδeθ, denni kul ellesm δeyemsemme, muc kan g elweqθe wah berk yemenni g elli jeyyin zade, 22 yedj kul ciy seddu ifesnes yerri emeqqar n kul ciy g elkeniyseθ 23 elli netteθ elbeδnes. w elkeniyseθ eθkemmel elmesiyH elli nette eykemmel kul ciy.