1 eyemmeθniyw, meδam ettemnem s errebbenne yesuwε elmesiyH eyemmejjeδ, eθHayelem f Hette Hed. 2 max eyaδef yelmejmeεwwem eryaz δemuγni yireD tixuθam nuwreγ dedbac bhan, usiyn eyaδef eryaz δeqelliyl yireD edbac uHecen, 3 kan telham s elli yireD edbac bhan tenmas: «eqqiym dahen, uggemmas.» tennem yuqelliyl: «bed diyn.» ziyγ: «eqqiym dahen yeθwali ikreεnenne.», 4 eθkuwnem tbejlem iyjen essisen f wissen, teδwlem delHukkam s uxemmem δelfaseδ? 5 esseγδeθ, emmeθniyw elli exesγawem egget: elyexθarc rebbi iqelliylen neddunyeθe bac e δuwlen dimuγniyyen seliman urθen elmemlxeθ elli yuεeδ essis ihelli exsent? 6 emme xenyum tHeqrem iqelliylen. muc δimuγniyyen Delmen diywem, wettawyen diywem y elmHakem? 7 muc ennihnin elli DeSSen f ellesm ebehhay elli yemmucawem? 8 kan texδemem s ecceriyεeθ teεellayθ elli g elxθab, «exs eljirenex emmax i θexseδ imenex.» eθegem elHajeθ tebhe. 9 emme kan tHaylem f Hed, δeθegem elγeldeθ, teHkum fellawem ecceriyεeθ emihelli γelden. 10 εlexaTer elli eyexδem s ecceriyεeθ elkulhe yedj icθ eyeδwel emmax yedjiyt elkulhe. 11 εlexaTer elli yenne: «eθezniyc.» yenne zaδe: «eθenγec.» iδekan eltezniyc emme θenγiyδ, eθeδwleδ dimxalef yecceriyεeθ. 12 emmale uθlayeθ texδmem emihelli δemHakmen s ecceriyεeθ nelHurriyyeθ. 13 εlexaTer eHakem lireHHemc ihelli erreHmenc, erHam eyeγleb eHakem.

14 emmeθniyw, s mette δeyesθenfeε elεebδ elli yeqqar γers emman weleγrec lxeδmeθ? eyged emmenes eθimenneε? 15 θSewreθ enjeθwem ziyγ weltmeθwem δiεeryanen welγersenc δmette δečen, 16 s mette δesθenefεen max esentennem: «berraθ s eslam, eddeffaθ tecbεem.» menγiyr esentuwcem elli ettesθHeqqen δiys? 17 eliman sahen, menγiyr elxeδmeθ nette biyδe ijaf. 18 iyjen essiywem iged eyen: «γerex eliman uγeri elxeδmeθ. essexniyδ elimenex menγiyr elxeδmeθ, uneč ture exessexne s elxeδmeθiyw elimeniyw.» 19 cex ettemneδ elli rebbi iyjen, tegiyδ elHajeθ tebhe. Hette δecyaĎen ettemnen ureglen s elxuwf. 20 texseδ exessexne ey ejjahel elli menγiyr elxeδmeθ eliman Hette cey? 21 muc daddeθne ibrahiym yucayes rebbi elHeq s elxeδmtes max i yyuwce memmis isHaq f elmeδbeH? 22 tezriyδ elli elimenes yban s elxeδmtes, welli elimenes yeδwel delkamel s elxeδmtes, 23 yekmel edwi nelxθab: «yemmen ibrahiym s rebbi, yeHsebθ f elHeq.» yemsemme eSSaHeb nrebbi. 24 tzerrem elli elεebδ yetban f elHeq s elxeδmeθ muc s wemman berk. 25 usahen zade, raHab θezzaniyθ yucayes rebbi elHeq s elxeδmtes max i θeεreD imersal tezenten eggubriδ xlaf bac e ntmenneε? 26 εlexaTer emmax elbδen menγiyr erruwH ijaf, emman zade menγiyr elxeδmeθ etjaf.