1 s meniys elmecakel delεrax mabinetkum? muc seg eTmeε elli ettemεerexneθ uggemmesennum? 2 eθecθham wettewyemc, usahen eθeδwlem HaDriyn ywenγe. eθeHsδem weltgeddemc eθawyem, usahen eθegem elmecakel temεarxem temHarbem. elγerwemc εlexaTer eltĎelbemc. 3 umax eθeDelbem ettawyemc εlexaTer teDelbem s enniyyeθ tuwHec, bac e tteSerfem f eccehweθennum. 4 eyelxuyyan! eltessinemc elli eSaHeb neddunyeθ nette δelεerx drebbi? elli yexs essiywem eySaHeb eddunyeθ eyemεarex drebbi. 5 ziyγ etεilakem elli yemmari g elxθab delγaled, «elγiyreθ tεebbe erruwH elli yegiyt rebbi δiyne.»? 6 urebbi yettuč enneεmeθ ekber, usahen yeqqar: «rebbi yetrejjeε g imeθkebren wineεεem f imeθwaDεen.» 7 Hutteθ imanennum seddu rebbi tqewmem ecciyĎan, uture eyerwel fellawem. 8 eqrbeθ yrebbi, uture eyeqreb yetwelinnum. neDfeθ ifesnennum eyelli θγelĎem, tneDfem ulewnennum eyelli elγerwemc erray iyjen. 9 eHzneθ tεeyĎem. edjeθ teSSennum eθeδwel δeεeyyeĎ welferHennum δelγem. 10 eθwaDεeθ ezzaθ nrebbi uture exeniqam.

11 emmeθniyw, eθeqrDemc beεDkum. elli eyeqreD unjes ziyγ eθyethem eyeqreD ecceriyεeθ yethemt. umax eθethmem ecceriyεeθ, mekumc δixeddamen essis emme δelHukkam felles. 12 iyjen berk yečerreε wiHekkem, unette elli yged eymenneε yehlex. δ wiyn cex bac e θethmeδ elli yeqrebex?

13 esδeθ ture, xenyum elli θeqqarem: «esse ziyγ eječe δenexDem iθemuwrθe ziyγ θeδint enεedde esukkes diyn nezzenz nerbeH.» 14 xenyum eltessinem Hette cey uffeječe, dmette netteθ elHyaθennum? xenyum ettelmuyθ eθban qiqqi usiyn eθexDem. 15 yelzem eθennem: «kan rebbi yexs, ture enedder neg wahen ziyγ wediyn.» 16 emme xenyum ture etteθbaham s uθkebrennum, weθbahiye elkulle δeccer. 17 elli yessen elxiyr weθyettegc, yeγleĎ.