1 Aŋ waan yaanja ti Yeecüwa attä kaaññä kä yirkä gïtï Äŋ jïñe Wääktäŋ ti, aŋ baaddoni yeeke näkki käñ aŋ iken uccin kä liŋŋä päk witken amgä. 2 Aŋ wääna yoorene daa Pïrrïcïïnnï ye, i Yeecüwa kiini ogo, "Yooru, Baaddoni yüükü nääŋä gin’a batta gïmkätä jiik ḍoocin Äŋ jïñe Wääktäŋ ti ye."

3 Aŋ luugi Yeecüwa ogo, "Ikee batta age päkin nääŋk’a naŋi Daawüüt wääna näke daa käñ, ke m’aka ke ike ina? 4 Aŋ kaaccä än jï ba' Jooŋ aŋ ämmä bïggï latkä yaaka batta gïmkätä jiik ḍoocin ame ike, ke m’aka ke ike ye, a mä däŋkä pääken ken ämï. 5 Halla ikee batta age päkin jiik ḍoocin yek Müüca ti ogo mä däŋkä yaaka ñuugulo änlaṇṇä jï ye, Äŋ jïñe Wääktäŋ ḍääldïï yok aŋ daa ḍuuggen ladolat? 6 Ikee kiine, mäŋkalaŋ bilti winni yäwaŋ kä änlaṇṇä yen Jooŋ. 7 Jiik Meeŋka bäṭo jayok ogo, ‘Ika ṭäkä me ängede ŋïngïn, batta a iirrä wäämmä yok Ika ti.’ Aŋ naana jiik yaakki ookke gïtï ogo ŋaaka ye, i ikee batta bi juce m’aka ḍuuggen ladaŋ ye. 8 Aŋ Minneni Mänbaan a Mügdo yen Äŋ jïñe Wääktäŋ."

9 Aŋ Yeecüwa wïca daljene ïñï aŋ attä daaŋmallä yen Yühüüṇṇï ti, 10 nänṭ’a Ike yuṭṭee kä oon yaŋkalaŋ ïṇte agee kä tüwon ye. Aŋ Yeecüwa taaji Pïrrïcïïnnï ogo, "Jiik ḍoocin gïmgïdï yoku men ṭïïñï Äŋ jïñe Wääktäŋ ti?" Aŋ iken ṭäkï ogo Ike gïmmo ogo ee, nuŋko wäättan cïŋjïda ko.

11 Aŋ tääcki ti Yeecüwa ogo, "Ikee ti m’ana cääyge kabal aŋ ḍimjin käälok Äŋ jïñe Wääktäŋ ti ye, batta yoku müge aŋ äbe woo? 12 Aŋ ogoo büṭa mänbaan batta kääṭï kä yaac kä kabal! Päjjïdï jiik ḍoocin ti me näŋï nääŋkä ŋerkä Äŋ jïñe Wääktäŋ ti."

13 Aŋ oon kiini Yeecüwa ogo, "Ïṇtü lajjä woo." Aŋ oon ïṇte lajjene woo, aŋ ḍukcin bata menen. 14 Aŋ Pïrrïcïïnnï kaaccä woo läälä pugin ogo, Yeecüwa bi nägjï ḍok ogoo.

15 Aŋ Yeecüwa, jiik yaakka ookke gïtï, aŋ kaaccä woo wïca. Aŋ me ḍiirken bäätcin Ike ti, aŋ ṭeeññe muure. 16 Aŋ kolle ogo ŋana nüüto ko Ike. 17 Aŋ yaakki ḍääkit yaaka jaayi bäṭo Ïcaaya ye ogo,

18 "A ñuugulo yeeni yaana waŋŋä ye inni,

aŋ Ike a m’ana bilgä ñapeñap joni ye.

Aŋ Wääktäŋ yeeni bi ḍoocu Ike ti,

aŋ Ike bi bäṭï kä iirjin ṭoŋ ti muure.

19 Aŋ Ike batta bi lel aŋ batta bi yaaw,

aŋ baati m’ana bi tïïŋï yääwe pääygä gïtï ye.

20 Aŋ biiruŋ* gääŋon batta bi lige gïtï,

aŋ ṭenṭel yaana käl ḍüüŋ jiinä ye batta cäänna üüljede,

ke ääce iirjin kä yuctuŋ.

21 Aŋ ṭoŋ muure näkä

guy yäṇtonḍe."

22 Aŋ mäkkalaŋ ääcin oon a uyku aŋ batta jaay cääygene meŋkeeke, aŋ ṭeeñi Yeecüwa, aŋ oon jääyin woo aŋ yuṭṭu. 23 Aŋ me muure witken ḍiiktin, aŋ iken jaajjin ogo, "Oon yaanni bi a Macii kaaynä yätkä Daawüüt yaana keeyïn ye inni?"

24 Aŋ wääna Pïrrïcïïnnï tiiŋŋene kä yaakki ye, i iken jaajjin ogo, "Ike batta lïïṭït ñoollu meŋkeekeni pare aŋan. A yaana teynä yeene kañdeeda kä Baljabüül ti, mügdo yen meŋkeekeni ti ye."

25 Aŋ paydinni yeeken ŋäjji Yeecüwa aŋ kiinne ogo, "Yätkïtïn yaana ḍoŋe ŋüüle gïtï ye, i yaac. Aŋ baan mooye ke äntükele yaana ḍoŋe ŋüüle gïtï ye, i batta bi yudit. 26 Aŋ naana Wiñ yen Meŋkeekeni ñüülcïdï woo Wiñ yen Meŋkeekeni menen ye, aŋan ḍoŋe ŋüülle gïtï. Aŋ yätkïtïn yeene bi yudit ogoo? 27 Aŋ naana Ika ñuulcudu woo meŋkeekeni kä teynä Baljabüül a gïtken ye, i aŋan baaddoni yeekic ñüülcïdï woo meŋkeekeni kä ŋaani? Aŋ aŋan iken bi wäätï a gütoni yeekic. 28 Aŋ naana a teynä Wääktäŋ Jooŋ ken ñuuṭu kä meŋkeekeni ye, i aŋan Yätkïtïn Jooŋ äätin ikee ti. 29 Yoku a ŋaani ken lïïṭï kaacï äräk ba' oon yaana teyaŋ bata booŋïn ye, aŋ waak yeeke peeje? A naana men teyaŋ kä ike aŋ por ike ḍiikä ye, aŋ wäättan nuŋko waak yeeke peejeeda kä ye.

30 "M’ana batta ke Ika ye, i a ädäŋ yeeni, aŋ m’ana batta ḍüṭon ye, i piirä gïtï.

31 "Aŋ ikee kiine, nääŋkä yaackä ke aammin yok, bi kulkunu Jooŋ, aŋ m’ana aammä yok Wääktäŋ Laṇṇä ye, batta bi kulkunu Jooŋ. 32 Aŋ m’ana jaay jiik yaackä Minneni Mänbaan ti ye, bi kulkunu Jooŋ, aŋ m’ana jaay jiik yaackä Wääktäŋ Laṇṇä yen Jooŋ ti ye batta bi kulkunu Jooŋ, yuungu yaakki ti ke yuungu yaaka äätä ye ti.

33 "Jaan ŋäjjänä me kä ṭulge. Naana jaan ŋeraŋ ye, i daa ṭulge ŋeraŋ. Aŋ naana jaan yaajaŋ ye, i daa ṭulge yejgaŋ. 34 Aŋ ikee merkä käggä! Yoku ikee jaaye jiik ŋerkä ogoo, i ina ikee age mä yaackä yaanna? Aŋ lemmä jaay wakkä yaaka jon agee kä küümgïnï ye. 35 Män ŋerrä tuññu yeene ŋerconḍe jï ääcïdï woo wakkä ŋerkä, aŋ män yaaññä tuññu yeene yaajgonḍe jï ääcïdï woo yiñ. 36 Ikee kiine, nïïnnä jooññu ti mäŋkalaŋ daa bi taacä Jooŋ kä jiik’a jaayne a waanjï ye. 37 Kä jiik yüükü ïkï bi teetci woo, aŋ kä jiik yüükü ïkï bi jooci Jooŋ."

38 Aŋ nüütoni yakkalaŋ yek jiik ḍoocin yek Jooŋ ke Pïrrïcïïnnï äätin Yeecüwa ti aŋ jaajjin ogo, "Nüüto, ikoon ṭäkon yurton gin’a nüütï yäwaŋ Ïkï ti ye."

39 Aŋ luugi Yeecüwa ogo, "Kil yaackä ke yaana batta cääyge luggin ye, ñüjï gin’a nüütï yäwaŋ ye, aŋ baati gin yäwnä yaana iñtedaa me ye, a gin yäwnä yen bäṭo Yünaan pare. 40 Bata yaana Yünaan nääkenee nïïnkä kä ḍäk yakcan mooye jï ye, i cäänna daa Minneni Mänbaan bi nääkä nïïnkä kä ḍäk ŋommañ jï.

41 "Aŋ mä Nïnawa bi juwu ñaalok nïïnnä jooññu ti ke kil yaanni aŋ bi joocu, nääŋka iken ḍaŋŋene kä nääŋkä yaackä yeeken kä paŋŋä yen Yünaan ye. Aŋ mäŋkalaŋ bilti winni tiññaŋ yäwaŋ kä Yünaan. 42 Aŋ yätkä iiŋe yen mä ïñïnä bi juwu ñaalok nïïnnä jooññu ti kä yiñ kil yaanni ti, aŋ bi jooje, kä yaana ike äätee kä ŋommañ ŋoy, tiŋdee kä ŋäjjin Cïlïmaan ye, aŋ mäŋkalaŋ bilti winni tiññaŋ yäwaŋ kä Cïlïmaan.

43 "Aŋ naana wääktäŋ yaaññä kääjin woo men ti ye, i atï woo teettälaŋ määjï yïïktäŋ. Aŋ naana batta a käñon ye, 44 i jaajjï ogo, ‘Ika ḍukcu än yeeni yaana äätä kä ina ti.’ Aŋ naana ike ḍuukin aŋ än kaññe jïñe elaŋ aŋ a weecon aŋ a tooton ye, 45 i ike ḍukcï aŋ äcä wääktäŋŋi yaackä meken kä ŋaṭükel yaaka yejgaŋ kä yaac kä ike ye, aŋ iken kaacï aŋ cäyok wïca. Aŋ düüñïn cäwdä yeene üüttït kä yiñ kä cäwdä mä ïïjjïn tinä. Aŋ cäänna bi wäätï kil yaaññä yaanni ti."

46 Wääna Yeecüwa jaayee kä ṭoŋ ti ye, i meen ke mädgen yudok üṇtük iken ṭäkï jaajjïdï Ike ti. 47 Aŋ nüütkï mäŋkalaŋ ogo, "Miic ke mädgic yudok üṇtük ṭäkï jayok ke Ïkï."

48 Aŋ men luukke ogo, "A ŋaani ken a miyo? Aŋ a ŋaannä ken a mädgo?" 49 Aŋ ïṇte nüütte baaddoni yeeke ti, aŋ kiinne ogo, "A miyo ke mädgo ikki. 50 Aŋ m’aka nääŋä ṭäktäŋ Wäyo yaana polloŋ jï ye, ken a mädgo ke käwgo ke migo."