Ïïjjïn 48

Yaagüüp Merkä Yuucip Ŋüülkede

1 Aŋ ääŋkalaŋ ti Yuucip nüütkï me ogo, "Wääc yore cäärin woo." Aŋ merkä yeeke yaaka kä yewwe yaakka koowne, Manacca ke Ipiraayim. 2 Aŋ Yaagüüp nüütkï me ogo, "Minneni yüünü Yuucip ḍäägin." Aŋ Yaagüüp yore riijene ñaalok aŋ cääjjin bür wic.

3 Aŋ Yaagüüp Yuucip kiinne ogo, "Jooŋ yaana Lïïṭït ye üükïn woo ika ti Lüüc ŋommañ mä Kanaan ti, aŋ ika ŋüülkana, 4 aŋ ika kiinna ogo, ‘Ïkï bi iñeni merkä kä ḍiräk. Aŋ kilkä yüükü bi wäätï a ṭoŋ ḍiirken, aŋ ŋommañ yaanni bi iñä kilkä yüükü aŋ bi wäätï a yeenen ke cüle.’

5 "Aŋ tiññaŋ merkä yüükü yaaka giiṇṇi ŋommañ mä Macïr ti i batta mor ika äätä ïkï ti Macïr ye, a yeeki, Ipiraayim ke Manacca bi wäätï a yeeki bata Robïïn ke Camoon. 6 Aŋ merkä yaaka bi ŋocci giidä ŋätken ti ye ken bi a yüükü, aŋ yäṇṇäni yeeken bi kañgä kä waan yen Ipiraayim ke Manacca.

7 "Wääna äätä kä Padaan Araam ye Rahiil tüwnü päy jï ŋommañ mä Kanaan ti, aŋ ika anjänä ïñï kä yaac, i ikoon aton ti Ipiraat. Aŋ jïkkä ïñï päy jï Ipiraat," aŋ Ipiraat cäänna battä me ogo Beetlaam.

8 Aŋ wääna Yaagüüp merkä Yuucip yoorreeda kä ye, i ike jaajjin ogo, "A ŋaannä ikki?"

9 Aŋ Yuucip wäyen luuŋŋe ogo, "A merkälen oogen yeeki yaaka iñana kä Jooŋ Macïr winni ye."

Aŋ Yaagüüp jaajjin ogo, "Äbä ika ti winni dalä ŋüülkü."

10 Aŋ Yaagüüp waŋge tüŋïlïn kä dänkïtene, aŋ batta ŋuca yuṭï ṭeṭaŋ. Aŋ Yuucip merkälen ickeneeda ti kä cokal aŋ kuunene ti jone ti, aŋ muckene gimgin. 11 Aŋ Yaagüüp Yuucip kiinne ogo, "Ika ḍuucu ogo ïkï batta bi yoorjïda ŋuca, aŋ Jooŋ tiññaŋ ika daljana ke cäänna kaaynä yüükü yoorru daa."

12 Aŋ merkälen äbi woo Yuucip daan wäyen ñome ti, aŋ ike ñome teekke ïñï ŋommañ jï. 13 Aŋ Yuucip iken koowi muuṭuk aŋ Ipiraayim kä ïṇte birrä ti üüŋjene buŋ aam yen Yaagüüp ti aŋ Manacca kä ïṇte aam ti aŋ üüŋjene buŋ birrä yen Yaagüüp ti, aŋ äbene ti kä cokal. 14 Aŋ Yaagüüp bugge büülle gïtï aŋ ïnke lajjene woo, aŋ ḍoocce merkälen witken ti, aŋ ïṇte birrä ḍoocce Ipiraayim yaana ḍeeraŋ ye wiñe ti, aŋ ïṇte aam ḍoocce Manacca yaana a kaygon ye wiñe ti. 15 Aŋ Yuucip ŋüülkene aŋ jaajjin ogo,

"Jooŋ yaana baaddi wäygo Abrayiim ke Icaak ye,

a Jooŋ yaana ika kaayna üṇṇü yeeni ti muure ke nïnnä yaanni ti ye.

16 Aŋ malak yaana ika maŋŋa kä pilläni muure ye,

dalä merkälen ŋüülke.

Aŋ dale yäṇtonḍi paytä me kä merkälen yaakki ke wäygo Abrayiim ke Icaak,

aŋ iken daljänä ḍirä ŋommañ wic kä yaac."

17 Aŋ wääna Yuucip wäyen yoorreeda ïṇte birrä äcceeda Ipiraayim wiñe ti ye, yoorre yaajaŋ ike ti, aŋ Yuucip wäyen ïṇte müŋŋe aŋ ṭäkke aŋgede yok Ipiraayim wiñe ti aŋ ḍooccede Manacca wiñe ti. 18 Aŋ Yuucip wäyen kiinne ogo, "Batta aŋan wäyo, yaanni ken a kaygon yeeni, ïntü bïrrä ḍoocci wiñe ti."

19 Aŋ wäyen yaakkä aŋ jaajjin ogo, "Ŋäjjä minneni yeeni, ŋäjjä. Ike cäänna bi mä yeeke ḍirä aŋ ike cäänna bi yäwaŋ, aŋ määden ḍeerconḍe ken bi yäwaŋ kä ike aŋ kilkä yeeke bi ḍirä kä yaac aŋ wäätï a ṭoŋ ḍiirken."

20 Aŋ ŋüülkene nïïnnä yaanja ti aŋ jaajjin ogo, "Mä Icärayiil yäṇtäŋginic bi battä yokïn naana iken ŋüülkïdï mäŋkalaŋ ye, aŋ iken bi jayok ogo, ‘Dalä Jooŋ ïkï naŋey bata Ipiraayim ke Manacca.’" Aŋ ike Ipiraayim ḍoocce Manacca ñome ti.

21 Aŋ Yaagüüp Yuucip kiinne ogo, "Ika ḍaŋŋa tüwü, aŋ Jooŋ bi ke ikee aŋ ikee bi ḍuuke ŋommañ dänkä yurgic ti. 22 Aŋ baan yaana iñdä mädgic ye ti, ïkï iñdene baan taaŋŋe mooye yen mä Cakïïm kä mädgic, a yaana ärrä mä Amoor ti kä gaaḍal yeeni ke kaay yeeni ye."