Ïïjjïn 35

Yaagüüp Ḍukcin Ŋäjäk Betalï

1 Aŋ Jooŋ Yaagüüp kiinne ogo, "Atä Betalï ŋuca aŋ cääyä wïca. Aŋ bätkaa tambal wïca, Ika agä Jooŋ yaana üükïn woo ïkï ti wääna buurcinii kä woo määdic Ïïcü ti ina."

2 Aŋ Yaagüüp jaajjin mä äntüke yeene ti ke m’aka muure ke ike ye ti ogo, "Juŋku yaaka a pääken ye aŋge yokïn ikee ti, aŋ yokic laate woo aŋ ääkce buruŋgu latkä. 3 Juwe atïn Betalï aŋ ika ṭäkä Jooŋ bätkädä tambal wïca, yaana ika yüükkana ti waan tïñïdïn gïtï ina, aŋ ike ke ika nänṭä muure yaana atä kä ye ti."

4 Aŋ iken juŋku muure yaaka ke iken ye, iñi Yaagüüp ke jaljalli yaaka eŋtä gitken ti ye. Aŋ jïkke ïñï jaan mooye ŋoy, yaana cokulaŋ ti Cakïïm ye. 5 Aŋ wääna Yaagüüp ke merkä yeeke bagene kä ye, mä bänkä yaaka cokulaŋ ti nänṭ’a kaajdene kä ye, nääkki Jooŋ liin mooye, aŋ batta agene kä ñoolgin ŋätin.

6 Aŋ Yaagüüp äätin ke mä yeeke muure Lüüc yaana tiññaŋ battä me ogo Betalï ye, ŋommañ yen mä Kanaan ti. 7 Aŋ ike bättä tambal wïca aŋ äkkene yäṇtäŋ ogo, El Betalï, aŋ aŋan ogo Jooŋ yen Betalï kä yaana Jooŋ üükenee woo ike ti kä lääggï wääna ike lüüdee kä woo määden ti ye.

8 Rïpga niito yeene Dïboora tüwnü aŋ jïkï me ïñï jaan mooye ŋoy Betalï ti kä ïñï, aŋ äkki me ogo, Aluun Baküüt, aŋ aŋan ogo Jaan Ïwok.

9 Aŋ wääna Yaagüüp ḍuukee kä Padaan Araam ye, i Jooŋ üükïn woo ike ti ŋuca Betalï aŋ ike ŋüülkï. 10 Aŋ ike kiini Jooŋ ogo, "Yäṇtonḍü ogo Yaagüüp, aŋ yäṇtonḍü batta ŋuca bi battä me ogo Yaagüüp ke on. Yäṇtonḍü bi battä me ogo Icärayiil." Aŋ ike äkki Jooŋ ogo Icärayiil.

11 Aŋ ike kiini Jooŋ ogo, "Ika agä Jooŋ yaana Lïïṭït ye, giidä aŋ ḍiirä aŋ wäätci agä ṭoŋ, aŋ ṭoŋ ḍiirken bi käjä woo ïkï ti aŋ ïkï bi wäätci agä daan yuur yen yätkäni. 12 Aŋ ŋommañ yaana iññä Abrayiim ke Icaak ye bi iñenii kä cäänna ke kilkä yaaka äätä ŋäñü ti ye." 13 Aŋ Jooŋ ike dalji ïñï nänṭ’a jaaynene kä ye.

14 Aŋ Yaagüüp ḍuccin kolcan paydin nänṭ’a jaaynene ke Jooŋ ye, aŋ puukkene wic määk ke ñownä aŋ yaanna nüütï a kolcan paydin yaana tïïlcïdï ye. 15 Aŋ Yaagüüp nänṭä yaana jaaynene ke Jooŋ ye äkkene ogo Betalï.

Tüwnü yen Rahiil

16 Aŋ Yaagüüp ke mä äntüke yeeke Betalï mañji ïñï aŋ wääna mor uterene kä utar Ipiraat ye, i wuuŋ yaana giidene Rahiil ye ḍäägin aŋ bääŋ yeene pegaŋ kä yaac. 17 Aŋ wääna bääŋ yeene pekkee kä ïñï kä yaac ye, i iiŋ yaana gïtï ye ike kiini ogo, "Ŋana ïkï booju, ïkï cääygi minnenile oone menen." 18 Aŋ ike tüw aŋ wääna wääktäŋ yeene kääjedee kä woo ye i minneni äkkene ogo Benaawni aŋ aŋan ogo "Minneni bääŋ yeeni." Aŋ äkki wäyen ogo Benyamïïn aŋ aŋan ogo "Minneni yen ïntï birrä." 19 Aŋ Rahiil ṭüwnü aŋ jïkï me ïñï päy mä Ipiraat taaŋ. Aŋ cäänna Ipiraat battä me ogo Beetlaam. 20 Aŋ Yaagüüp kolcan paydin ḍoocce wïca kääl Rahiil wic aŋ daa yoottu me wïca ke tiññaŋ.

21 Aŋ Yaagüüp baŋŋä aŋ keeñ yeene ṭeljene ïñï Mekdaal Adaar taaŋŋañja.

Merkälen yek Yaagüüp

22 Aŋ wääna Yaagüüp cääye kä baan yaanja ti ye, i Robïïn Bila nïïnne, kiingon iiŋe yen wäyen, aŋ jiik yaakka tiiŋi Yaagüüp.

Aŋ yaakki a yäṇtäŋŋi yek merkälen Yaagüüp yaaka kä caay witken kä yewwe ye.

23 Aŋ merkälen Leya a Robïïn kaygon yen Yaagüüp ke Camoon ke Laawï ke Yahüüja ke Yacakïïr aŋ Jabuloon.

24 Aŋ merkälen Rahiil a Yuucip ke Benyamïïn.

25 Aŋ merkälen Bila kiingon yen Rahiil a Ḍaan ke Naptaalï.

26 Aŋ merkälen Jïlpa kiingon yen Leya a Gaat ke Acïïr.

Aŋ a merkälen Yaagüüp yaaka gitkene daa me Padaan Araam ye ikki.

Tüwnü yen Icaak

27 Aŋ Yaagüüp attä wäyen Icaak ti nänṭ’a battä me ogo Mamar ye cokulaŋ ti Gariya Arba, yaana tiññaŋ battä me ogo Hiburoon ye, nänṭ’a cääynene Abrayiim ke Icaak bata boorgu ye. 28 Aŋ Icaak cääynä ke yuunge ḍake 180. 29 Aŋ ike wääkcin woo wääktäŋ tüwnü aŋ tüwnü aŋ cooṭi me ti dänkä yurge ti, i yuunge a päjjïnï, aŋ merkä yeeke Ïïcü ke Yaagüüp ken ike jïgï.