Ïïjjïn 34

Müüŋŋü Ḍïïna

1 Aŋ Ḍïïna ṭul Leya yaana giide Yaagüüp ti ye, kaaccä woo atï ükcïdï ṭulgu yek baan. 2 Aŋ wääna Cakïïm minneni Hamuur mä Haaw, yätï yen baan yaanja Ḍïïna yoorreeda kä ye, i müüŋŋe. 3 Aŋ jone ṭäkcin Ḍïïna ṭul Yaagüüp. Aŋ ṭuulle ḍeerconḍe bilgene aŋ jääjgene kä ŋer kuckon. 4 Aŋ Cakïïm jaajjin wäyen Hamuur ti ogo, "Ṭuulle yaanna ḍijgaa kä wäätï a iiŋ yeeni."

5 Aŋ wääna Yaagüüp tiiŋŋee kä ogo ṭuulle yeene Ḍïïna müüŋŋïï Cakïïm ye, i merkälen yeeke a woo ke ḍigärgä yeeke, aŋ ike tïïŋjïn ïñï ke iken ḍuukene ti.

6 Aŋ Hamuur Cakïïm wäyen attä jayok ke Yaagüüp. 7 Aŋ wääna merkälen Yaagüüp äätene kä ti äätene woo aŋ tiiŋŋene kä gin’a näŋŋä ḍoŋe ye, i iken mïtcïn ñaalok aŋ piiṇdin kä yaac, kä yaana Cakïïm näŋŋee kä loon mä Icärayiil ti kä müüŋŋü ṭuulle Yaagüüp ye, aŋ a gin’a yoku batta päjjïdï naŋtä me ye.

8 Aŋ kiini Hamuur ogo, "Minneni yeeni Cakïïm jone kaaccä ṭuulle yüünü ti, kura iñjeeda dalä wäätï a iiŋe. 9 Ḍïkïn jiik dale kuuwin wäätï waadgä mä yooko ke mä yeekic ti. 10 Aŋ cääye ke ikoon waan a kupon ŋommañ yaanni ti, cääye nänṭ’a ṭäkke ye, aŋ laaye kä tettä aŋ ikee käñe wakkä yeekic jïñe ti."

11 Aŋ Cakïïm jaajjin Ḍïïna wäyen ti ke mädgen ti aŋ kiinne ogo, "Dale ika käñä ŋerrä ikee ti, aŋ ikee bi iñe wakkä muure yaaka taaja kä ye. 12 Aŋ naana daa yelgä caraŋ bata ŋa' ke iñdin ye, ika äccädä waak’a ñuye ye muure. Aŋ ṭuul iña kä a iiŋ yeeni."

13 Aŋ merkälen Yaagüüp Cakïïm ke wäyen Hamuur luugi kä maldin ŋïngïn, kä yaana Cakïïm käwen müüŋŋeeda kä ye. 14 Aŋ kiini ogo, "Ikoon batta lïïṭon nääŋkä yaakka naŋon, käwo iñon m’ana batta a ergon ye, yaanna bi wäätï a loon mooye ikoon ti. 15 Ikoon bi kaacon ḍeŋŋä jiik ti ke ikee kä gin kä keelok, dale ikee beelje bata ikoon kä iirrä ook yeekic muure. 16 Aŋ wäättan ikee bi iñge ṭulgo aŋ ikoon bi kujon ṭulgic daa a yooko, aŋ ikoon bi cäyon ke ikee aŋ ïkïïn wäätïn agïn mä keelkä. 17 Aŋ ikee naana batta gïmmede kä jiik yooko aŋ ikee batta iire ye, i käwo bi koowon aŋ ikoon bi aton."

18 Aŋ jiik yaakka Hamuur ñaappe jok ke minneni yeene Cakïïm. 19 Aŋ Cakïïm batta a kooron kä naŋŋä nääŋkä yaakka, kä yaana jone ñappee kä ṭuul Yaagüüp ye. Aŋ Cakïïm ken tïïlcïdï eemtä me kä yaac äntüke yen wäyen ti, 20 aŋ Hamuur ke minneni yeene Cakïïm äätin äntüke yen baan mooye yeenen ti, aŋ iken jaajjin mä baan mooye yeenen ti ogo,

21 "Me yaakki näŋŋä ŋïïbbïn ke ïkïïn. Dale iken cäyok baan yoono jï aŋ layok, ŋommañ gääbaŋ päjjïdï iken ti, dale ïkïïn ḍïcïn ṭulgu yeeken, aŋ iken ïñïn ṭulgo a määngen. 22 Aŋ iken bi gïmmä kä cäwdä ke ïkïïn bata mä keelkä ke ïkïïn, naana ook yooko iirgä me bata iken ye. 23 Aŋ naana yaakki naŋïn ye, i ḍigärgä yeeken muure ke wakkä yeeken bi wäätï a yooko, ääte gïmmïn kä jiik yeeken, aŋ dale iken cäyok winni ke ïkïïn."

24 Aŋ me muure yaaka attä baan mooye tük ye gïmmïn kä jiik yaaka naŋi Hamuur ke Cakïïm yaanna, aŋ ook muure iiri me. 25 Aŋ nïïnkä kä ḍäk wääna ook mor wääcene kuggu iirrä ye, merkälen Yaagüüp kä yewwe Camoon ke Laawï yaaka a Ḍïïna mädgen ye, iken gaaḍalli yeeken koowi aŋ ircin baan mooye jï i kucu me, aŋ ook muure nägi ḍugin. 26 Aŋ iken Hamuur nägi ḍok ke minneni yeene Cakïïm kä gaaḍalli, aŋ Ḍïïna äbi woo äräk ba' Cakïïm aŋ iken attä.

27 Aŋ merkä Yaagüüp äätin aŋ nääkin me, aŋ baan mooye gaani jï kä yaana käwen müügene daa me ye. 28 Aŋ ḍiik yeeken ke däk ke tüürüŋŋï yeeken koowi ke waak muure yaaka baan mooye jï ye ke yirkä. 29 Wakkä yeeken muure ke äärgä gïtken muure gaani. Iken cäänna merkälen lïcken yeeken koowi ke määngen aŋ kïïdï bata mä müükïn.

30 Aŋ Yaagüüp jaajjin Camoon ti ke Laawï ti ogo, "Ikee ika äckana ḍok tiññaŋ mä Kanaan ke mä Peeric ke me muure yek baan ika bi putkana jï. Aŋ ika batta cääygana ook kä ḍiräk, aŋ naana iken muure yoken ḍülgü aŋ ika irkana ye, i mä äntüke yeeki bi ḍüümgü gïtï."

31 Aŋ iken luukcin ogo, "Ikoon käwo daljon naŋtä bata iiŋ yaana a baal ye?"