Ïïjjïn 33

Yaagüüp Pärjin ke Ïïcü

1 Aŋ Yaagüüp däämjin aŋ Ïïcü yooṭṭe äätä ke ook 400. Aŋ ike merkä kiibgene gïtï Leya ke Rahiil ke kiinkä määngen yaaka kä yewwe ye. 2 Aŋ ike kiinkä määngen ḍoocce ke merkälen yeeken ñomuk, aŋ Leya ke merkälen yeeke ŋäñe ti, aŋ Rahiil ke Yuucip ken a düüñïn meken muure. 3 Aŋ ike kä ḍoŋe ïïjjïn attä ñomgen ti, aŋ ike ḍüŋjïn ïñï aŋ ñome düücce ïñï ŋommañ jï ääŋke kä ŋaṭükel ke ḍake ti määden ti kä cokal. 4 Aŋ Ïïcü yïŋŋä pärjin ke määden aŋ yoken käägi aŋ ŋïïbbïn kä ḍuuggen, aŋ muckene yok, aŋ weggin muuṭuk.

5 Aŋ wääna Ïïcü yuṭṭee kä määngä ke merkälen ye, ike tääccin ogo, "A ŋaannä ika ke ïkï yaakka?"

Aŋ luugi Yaagüüp ogo, "A merkä yeeki yaaka iñi Jooŋ kiingon yüünü kä ŋerrä ye." 6 Aŋ kiinkä määngen wüükïn ti ke merkä yeeken aŋ ḍüŋjïn ïñï. 7 Aŋ Leya cäänna daa wüükïn ti ke merkä yeeke aŋ ḍüŋjïn ïñï. Aŋ düüñïn meken Yuucip ke Rahiil wüükïn ti aŋ ḍüŋjïn ïñï.

8 Aŋ Ïïcü jaajjin ogo, "Yaakka muure nüütï ŋaaka ḍigärgä yaaka pärjonon kä yaakka?"

Aŋ luugi Yaagüüp ogo, "Ogo ika käñjo ŋerrä mügdo yeeni ti."

9 Aŋ Ïïcü jaajjin ogo, "Ika cääygana kä ḍiräk määdo, yaaka bilti yaakka tïïcïï kä ḍoŋü."

10 Aŋ Yaagüüp jaajjin ogo, "Ba’ay, naana ika käññä ŋerrä ïkï ti ye, i iñdin yeeni gïmgä. Waŋgü yaaka yoorru ye beeljin bata gin’a ika yuṭṭu Jooŋ ye, kä yaana gïmganaa kä, kä ŋerrä ye. 11 Kura iñdin yeeni gïmgä yaana äbi me ïkï ti yaanja, Jooŋ ŋerräŋer ke ika aŋ ika iñña wakkä kä ḍiräk." Aŋ wina Ïïcü ïïrï Yaagüüp ke gïmme.

12 Aŋ Ïïcü jaajjin ogo, "Juwe atïn, aŋ ika bi ïïjjä atä ñomü ti."

13 Aŋ Yaagüüp ike kiini ogo, "Mügdo yeeni ŋäjjä merkä lïjgaŋ aŋ ḍiik ke däk yaaka nïïtï ye ṭulgen lïjaŋ. Naana äddi me kä yaac äŋ jïñe kä keelok ye, i ḍigärgä muure bi tüwok. 14 Mügdo yeeni kura ïïjjä kiingon yüünü ñome ti, aŋ ikoon bi bääton kä ḍeeraŋ, waan yaana a yïïkon ḍigärgä ti ke merkälen ti ye, ke miikenii Cïïr."

15 Aŋ Ïïcü jaajjin ogo, "Dalä ook yakkalaŋ mäñgenii kä ïñï yaaka ke ika ye."

Aŋ Yaagüüp luukcin ogo, "Ina? Ñuynu yeeni muure ogo ika käñjo ŋerrä mügdo yeeni ti."

16 Aŋ nïïnnä yaanja ti Ïïcü ḍukcin attä Cïïr. 17 Aŋ Yaagüüp baŋŋä Caküüt, aŋ kuṭṭu än, aŋ ḍigärgä yeeke näŋgene däŋkä. Ina ken nänṭä yaanna batte daa me ogo Caküüt yaanna.

18 Aŋ Yaagüüp wääna äätee kä Padaan Araam ye, ḍäägin ti kä ŋer baan mooye yen mä Cakïïm ti ŋommañ yen mä Kanaan ti, aŋ keeññi yeeke ṭeljene ïñï baan mooye ñome ti. 19 Aŋ kiññä ŋommañ yaana kurcenee kä keeñ yeene ye, minneni Hamuur Cakïïm wäyen ti tiilgä gälkä waŋgen 100. 20 Aŋ näŋŋä tambal wïca aŋ äkkene ogo El Eloohe Icärayiil. Aŋ aŋan ogo Jooŋ yen mä Icärayiil.