1 Aŋ nïïnnä yaanja ti Yeecüwa än daljene ïñï aŋ attä cääjjin koon mooye taaŋ. 2 Aŋ ṭoŋ ḍiirken äätin Ike ti, aŋ Ike taappä kuun jï. Aŋ cääjjin ïñï aŋ ṭoŋ nüüṇṇe, i muure a yuutin koon mooye taaŋ. 3 Aŋ pääjgene wakkä ḍiirken kä gäärräni, aŋ jaajjin ogo, "Tiiŋe, pïïto attä woo mäpï käwkä yeeke. 4 Aŋ wääna ike mäpee ye, käwkä yakkalaŋ ḍiimdin päy jï, aŋ ḍïïrgä äätin aŋ ami. 5 Aŋ käwkä yakkalaŋ ḍiimdin ŋomgu ḍaraŋ wic. Aŋ yüülïn ñaalok kä bïraŋ kä yaana ŋomgu ejgene ejok ye. 6 Aŋ wääna äŋ kääjenee kä ye, waak garkä aarre aŋ ïwnä kä yaana bïcäŋgenen baawgene kä ti ye. 7 Aŋ käwkä yakkalaŋ ḍiimdin ïñï küügü gïtï, aŋ küügü yüülïn ñaalok aŋ käwkä mäji pugin. 8 Aŋ yakkalaŋ ḍiimdin ŋommañ ŋerrä ti, aŋ gidgin käwken, yakkalaŋ ääcin ääŋken caykä kä caay, aŋ yakkalaŋ ääcin ääŋken caykä kä ḍüügük, aŋ yakkalaŋ caykä kä ḍäk. 9 Aŋ m’ana cääyge gitke ye, dale tïïŋï aŋ ooke gïtï."

10 Aŋ baaddoni äätin aŋ Ike taaji ogo, "Ïkï jaayä kä gäärräni ina?"

11 Aŋ luuŋŋe ogo, "Ŋäjjin yen jiik paangin yokïn yen Yätkïtïn Polloŋ jïñe äckene kä Jooŋ ikee. Aŋ batta agee äckïnï mäkkalaŋ. 12 Aŋ m’aka tiŋit nüüṇṇü yeeni ye, ukcin gïtï mooye bi iñge daa kä Jooŋ, aŋ iken bi cääyge ŋäjjin yaana kääṭï ye. Aŋ m’aka batta tiŋit ye, cäänna ukcin gïtï ḍeerconḍe yaana bilti iken ti ye bi koowgu Jooŋ iken ti. 13 Ken ina nüüdü daa kä gäärräni yaanna, Iken däämï aŋ batta yüṭï, aŋ tiŋit aŋ batta ookcutu gïtï. 14 Yaakki ḍääkit yaaka bari Ïcaaya ye ogo,

‘Ikee bi tiiŋe,

aŋ batta bi ooke gïtï,

aŋ ikee bi dääme,

aŋ batta bi yoodde.

15 Me yaakki juuggen üüldïn,

aŋ gitken batta tiŋit,

aŋ waŋgen mïdï,

ken ina waŋgen batta yuṭene yaanna,

aŋ gitken batta tiŋit,

aŋ juuggen batta ükcïdï gïtï,

aŋ iken batta ḍüükïdï Ika ti,

yaana ṭeeñä daa kä ye.’

16 "Aŋ ñaaynä a waŋgic ti, kä yaana waŋgic yuṭene kä ye, ke gitkic ti, kä yaana gitkic tiŋdene kä ye. 17 Ikee kiine a gïtken, bäṭoni ḍiirken ke mä wotku iken ṭäkï ogo iken yuṭo waak’a yoorree ye, aŋ batta agene yoorgin, aŋ iken ṭäkï ogo iken tiiŋo jiik yaaka tiiŋŋee ye, aŋ batta agene tiiŋgin.

18 "Tiiŋe ŋüüllü gïtï gäärrä yen pïïto yaana mäpï käwkä ye. 19 Aŋ m’ana tiiŋŋä jiik Yätkïtïn aŋ batta agee kä ookon gïtï ye, i booŋïn ätä aŋ gin’a a pïïton jone ti ye oote woo. Yaakka a käwkä yaaka ḍiimdin ïñï päy jï ye. 20 Käwkä yaaka ḍiimdin ŋomgu ḍaraŋ wic ye, nüütï m’ana tiŋit jiik aŋ koowde kä bïraŋ kä jon ñamme ye. 21 Aŋ ike batta cääyge bïcäŋgä, ike wääcï kä ḍeeraŋ, aŋ naana tïñïdïn ke putkin jï ätä ogo jiik ye, i kä ḍeeraŋ aŋŋi ike koojjï woo. 22 Aŋ käwkä yaaka ḍiimdin ïñï küügü gïtï ye, nüütï m’ana tiŋit jiik ye, aŋ miillä kä cekkïtïn yen ŋommañ wiñe jiik maace pugin ñaalok, aŋ ike dalcätä batta ääcïdï käwkä. 23 Käwkä yaaka ḍiimdin ŋommañ ŋerrä ti ye, nüütï m’ana tiŋit jiik aŋ ookcede gïtï ye. Aŋ a m’ana ääcïdï käwkä, aŋ giit, caykä kä caay ke caykä kä ḍüügük ke caykä kä ḍäk ye."

24 Aŋ iken nüütkï Yeecüwa gäärrä yaŋkalaŋ, aŋ kiinne ogo, "Yätkïtïn Polloŋ jïñe beel bata oon yaana mäppä käwkä ŋerkä yiil jï baanne ye, 25 Aŋ wääna me oodene daa ye, i ädäŋ yeene äätin aŋ mäpcin baaygä waadgä päk aŋ attä. 26 Aŋ wääna päk yüülene ñaalok ye, i cäänna daa baaygä üükïn woo. 27 Aŋ ñuuguloni yek men mooye äätin ike ti, aŋ taaji ogo, ‘Men mooye, batta a käwkä ŋerkä ken mämmi yiil jï baannü! Aŋ baaygä ätä wa?’ 28 Aŋ luuŋŋe ogo, ‘A ädäŋ ken nääŋkä yaakka naŋŋe.’ Aŋ taaji ñuuguloni yeeke ogo, ‘Ïkï ṭäkä ikoon aton aŋ puudon woo?’ 29 Aŋ ike luukcin ogo, ‘Ba’ay naana ikee ate puude woo ye, nuŋko päk yakkalaŋ putcede ti. 30 Dale yül nänṭä keellä ke nïïnnä errä ti, aŋ iṭoni bi kiinä nïïnnä errä ti baaygä ïïjgänä ergä aŋ ḍiikä yokïn a ḍïïggï, aŋ nääkkänä maañ, aŋ päk ken ḍüljünü tuññu jï.’"

31 Aŋ iken nüütkï Yeecüwa gäärrä yaŋkalaŋ, aŋ kiinne ogo, "Yätkïtïn Polloŋ jïñe beel bata käwcan jallä*13.31 jallä a jaan yaŋkalaŋ meeŋka laṇṇä jï ken äälä ke jallä. yaana koowi oon aŋ iññe pïïtte ïñï yiil jï baanne ye. 32 Aŋ a käwcan yaana ḍeeraŋ meken ti muure ye, ken ṭääkcin wääna yüülene ñaalok ye, meken borre yokïn muure yaaka yiil jï ye, aŋ wäättä a jaan mooye, yaana äätete ḍïïrgä aŋ näŋene kurken kimke ti ye."

33 Aŋ nüütkï Yeecüwa gäärrä yaŋkalaŋ, aŋ kiinne ogo, "Yätkïtïn Polloŋ jïñe beel bata ŋimin yaaka koowi iiŋ kä ḍeewaŋ aŋ wäccee kä ḍon gïtke kä ḍäk yek kakin ke püüwene muure ye."

34 Aŋ waak yaakka muure kiinnene Yeecüwa ṭoŋ kä gäärrä. Baati gin’a batta agee kä jaaygon kä gäärrä ye. 35 Yaakki ḍääkit yaaka jaayi Jooŋ kä bäṭo ye ogo,

"Ika poŋi bi kupku kä gäärräni,

aŋ Ika bi nüütü woo waak’a a paangin yokïn kä ïïjjïn ti naŋŋä ŋommañ ye ti."

36 Aŋ Ike ṭoŋ daljene ïñï, aŋ attä äräk. Aŋ baaddoni yeeke äätin Ike ti, aŋ jaajjin ogo, "Ŋüülgoon gïtï gäärrä baaygä yiil jïñe."

37 Aŋ Ike luukcin ogo, "M’ana mäppä käwkä ŋerkä yaanna a Minneni Mänbaan. 38 Yiil a ŋommañ wiñe, aŋ käwkä ŋerkä a mäbaan yek Yätkïtïn Polloŋ jïñe. Aŋ baaygä a mäbaan yek booŋïn. 39 Ädäŋ yaana mäppä yaanna ken a booŋïn. Errä a düüñïn yuungu, aŋ iṭoni a malaŋŋi. 40 Aŋ bata yaana baaygä ḍülge daa me yokïn aŋ nääkkene daa me maañ ye, bi beeljï bata düüñïn yuungu. 41 Minneni Mänbaan malaŋŋi yeeke bi tuce, aŋ m’aka läpï nääŋkä yaackä ke m’aka liigä gïtï jiik ḍoocin ye muure bi aŋgänä yokïn Yätkïtïn yeene ti. 42 Aŋ yibjänä kääl maañ jï, nänṭä ba' ïwok ke nänṭä ba' ŋeeynä me leken. 43 Aŋ mä wotku bi dïkcï woo bata äŋ Yätkïtïn yen Wäyen ti. Aŋ m’ana cääyge gitke ye, dale tïïŋï aŋ ooke gïtï.

44 "Yätkïtïn Polloŋ jïñe beel bata waak ŋerkä yek paangin yokïn yiil jï, yaaka kañi oon aŋ kümme wic ye. Aŋ kä jone ñamme ike attä aŋ waak yeeke yääjjene woo muure aŋ kiññee yiil yaanna.

45 "Aŋ Yätkïtïn Polloŋ jïñe ŋuca beel bata oon yaana määjï tiilgä ye. 46 Aŋ wääna käññee kä yaana yäwaŋ aŋ päjjïdï ye, i ike attä aŋ waak yeeke yääjjene woo muure aŋ kiññee kä tiilñan yaanna.

47 "Aŋ Yätkïtïn Polloŋ jïñe ŋuca, beel bata ääŋ yaana yeepi me koon jï, aŋ müügïn yak yakkalaŋ daa kä biilken ye. 48 Aŋ wääna küümmee ye, wuuji me woo wii taaŋŋe ti, aŋ me cääjjin ïñï yak ŋerkä waki arwalli gïtï, aŋ yek yaackä yibji woo. 49 Aŋ a gin’a bi wäätï düüñïn yuungu ti ye inni. Aŋ malaŋŋi bi ätä aŋ mä yaackä bi kibbänä woo mä wotku gïtï 50 aŋ yibjänä kääl maañ jï. Nänṭä ba' ïwok ke nänṭä ba' ŋeeynä me leken."

51 Aŋ Yeecüwa baaddoni yeeke taaññe ogo, "Wakkä yaakka ookke gïtï muure?"

Aŋ luuki ogo, "Ee."

52 Aŋ kiinne ogo, "Nüüto jiik ḍoocin yaana a baaddo yen Yätkïtïn Polloŋ jïñe ye, beel bata män än yaana ääcïdï woo waak dänken ke waak kïccäŋgenen tuññu yeene jï ye."

53 Aŋ wääna Yeecüwa gäärräni yaakka ḍaaŋŋeeda kä ye, Ike kaaccä woo wïca, 54 Aŋ Ike attä baan yeene ti nüütï daaŋmallä yen Yühüüṇṇï ti, aŋ me witken ḍiiktin. Aŋ tääcï ogo, "Oon yaanni ŋäjjin ke teynä nääŋkä yäwkä yaakki kañe wa? 55 Batta a minneni ḍuŋo ina? Aŋ batta meen ina battä me ogo Märïyam ina? Aŋ mädgen batta a Yaagüüp ke Yuucip ke Camaan ke Yahüüja? 56 Aŋ batta a käwgen muure ikki ke ïkïïn yaakki? Aŋ oon yaanni waak yaakka kañe wa muure aŋan?" 57 Aŋ Ike tuuji yok, aŋ batta agene gïmgïnï.

Aŋ kiini Yeecüwa ogo, "Bäṭo eemtä me nänkä muure daa a baan yeene jï ke mä än yeeke ti pääken." 58 Aŋ Ike batta a näŋon wakkä yäwkä kä ḍiräk wïca kä luggin yeenen bäwen Ike ti.