1 Aŋ Pïrrïcïïnnï ke Cüddügïïnnï äätin Yeecüwa ti, aŋ Ike puuci aŋ ñujgi ŋïngïn ogo iken nüütkïï woo gin yäwnä polloŋ jï.

2 Aŋ Ike luukcin ogo, "Naana äŋ lütcïdï ye, i ikee jaaye ogo, ‘Jommu bi ŋeroŋer, kä tïṇṇä polloŋ jïñe.’ 3 Aŋ kä tïṇṇäŋänä aŋŋi, ikee jaaye ogo, ‘Ñaal bi määdo ko polloŋ jïñe tïṇṇe ke üllü curuŋgu.’ Ikee yaacene yokïn kä ŋüüllü gïtï biilkä polloŋ, aŋ ikee batta lïïlte ŋüüllü gïtï waak’a nüütï waadgä yuungu ti ye. 4 Mä yiñ ke kil baale määjï gin yäwnä, aŋ baati gin yäwnä yaana bi iñge daa me ye, a gin yäwnä yen Yünaan pare." Aŋ dalji ïñï Yeecüwa aŋ Ike attä.

5 Aŋ wääna baaddoni ircene woo koon mooye taaŋŋañja ye, bïggï wiiṭi iken batta a ääcïnï. 6 Aŋ kiini Yeecüwa ogo, "Dääme aŋ waŋgic tïïce kä ŋimin yek Pïrrïcïïnnï ke Cüddügïïnnï."

7 Aŋ iken uccin kä jiik pääken ogo, "Ike jaay aŋŋi nääŋka batta agïn ääcïnï kä bïggï ye."

8 Aŋ ooki gïtï Yeecüwa, aŋ kiinne ogo, "Ikee yaaka luggin yeenic ḍeeraŋ ye, ikee luuge pääkic ogo ikee batta cääygeda ko bïggï ina? 9 Aŋ batta mor ooke gïtï? Aŋ batta payde wääna äämmä 5,000 kä bïggï kä duuc, aŋ arwalli kä ŋïṭṭä yaaka ḍülle ye? 10 Aŋ bïggï kä ŋaṭükel äämmä 4,000, aŋ arwalli kä ŋïṭṭä yaaka buuccu ye? 11 Aŋ ikee yoññe ogoo kä ookcin gïtï, i Ika batta jaayä ogo bïggï aŋan? Waŋgic tïïce kä ŋimin Pïrrïcïïnnï ke Cüddügïïnnï." 12 Aŋ wäättan ooki gïtï baaddoni ogo batta jaayo ogo waŋgen tïïccï ko ŋimin bïggï, ko nüüṇṇü kärgit yen Pïrrïcïïnnï ke Cüddügïïnnï.

13 Aŋ wääna Yeecüwa äätenee kä baan mä Kaacarïya Pïlïbbï ye, i baaddoni yeeke taaññe ogo, "Mäbaan jayok ogo Minneni Mänbaan ogo ŋaani?"

14 Aŋ iken jaajjin ogo, "Mäkkalaŋ jayok ogo Büüṭo Yaaya, aŋ yakkalaŋ jayok ogo bäṭo Ïlïya, aŋ yakkalaŋ jayok ogo Ïrmïya, aŋ yakkalaŋ jayok ogo bäṭo yaŋkalaŋ."

15 Aŋ taaji Yeecüwa ogo, "Aŋ ikee jaaye ogo Ika agjo ŋaani?"

16 Aŋ Camaan yaana battä me ogo Bütürüc ina luukcin ogo, "Ïkï agä Macii, Minneni Jooŋ yaana a üdon ye."

17 Aŋ Yeecüwa ike luugi ogo, "Ñaaynä ïkï ti, Camaan minneni Yuhanna! Batta a mänbaan ken ïkï nüütkeney yaakka, a Wäyo yaana ñaalok polloŋ jï ye. 18 Aŋ ïkï kiineni, ïkï agä Bütürüc, aŋ aŋan ogo karkar, äntüke yeeni bi badä karkar yaanni ti, aŋ teynäni yek tüwnü ike batta bi lïïlgä. 19 Aŋ ïkï bi iñeni kuponi yek Yätkïtïn Polloŋ jïñe, aŋ gin’a ḍeŋŋi ŋommañ wic ye, i bi a ḍekon ke ñaalok polloŋ jï, aŋ gin’a gütkïnï ŋommañ wic ye, i bi a gütkïnï ke ñaalok polloŋ jï." 20 Aŋ baaddoni yeeke kolle ogo mäŋkalaŋ ŋana nüütkïdïï ogo Ike agje Macii.

21 Aŋ waan yaanja ti Yeecüwa uccin kä nüütkïn baaddoni yeeke ogo Ike bääkkan daa atce Oorcalïïm, aŋ Ike bi wääcce wakkä ḍiirken yätïnï ti, ke ḍuuŋku däŋkä ti, ke nüütoni jiik ḍoocin yek Jooŋ ti. Aŋ Ike bi nägjï me ḍok, aŋ nïïnnä ḍäk ti Ike bi juwee ñaalok tüwnü ti.

22 Aŋ koowi Bütürüc wüükke woo aŋ gerre, aŋ kiinne ogo, "Yoku ŋana iccätä Jooŋ, Mügdo! Aŋ yaanna ŋana yoku wäätcïdï a Ïkï ti!"

23 Aŋ Bütürüc ṭukki Yeecüwa ñome aŋ kiinne ogo, "Wükcü woo Ika ti, Wiñ yen Meŋkeekeni! Ïkï agä wïïṇṇan Ika ti, paydinni yüükü batta ḍooju waak Jooŋ ti, a waak mänbaan ti."

24 Aŋ wäättan Yeecüwa baaddoni yeeke kiinne ogo, "M’ana ṭäkï bäätïdï Ika ti ye, dale ḍoŋe wiire aŋ kaakkon yeene ḍürde aŋ bätä Ika ti. 25 Aŋ m’ana üṇṇü yeene tïïje ye, i bi yääye, aŋ m’ana üṇṇü yeene yääyne ogo Ika ye, i bi kañe. 26 Aŋ a ŋaaka ken kañtä men naana wakkä ŋommañ wiñe koowne muure aŋ üṇṇü yeene yääyne ye? Aŋ a ŋaaka ken äccätä men ḍuukcedee üṇṇü yeene? 27 Aŋ Minneni Mänbaan bi ätä ke malaŋŋi yeeke kä gällä yen Wäyen, aŋ mäŋkalaŋ daa bi ḍuukke nääŋkä yeeke yaaka naŋŋe ye. 28 Ikee kiine a gïtken, mäkkalaŋ bilti winni batta bi näkkä tüwnü, ke yuṭene Minneni Mänbaan äätee kä yätkïtïn yeene."