1 Aŋ waan yaanja ti baaddoni äätin Yeecüwa ti aŋ taaji ogo, "A ŋaani ken yäwaŋ Yätkïtïn Polloŋ jï ti?"

2 Aŋ Ike bääṭin ti minnenile, aŋ yuutte ñomgen ti. 3 Aŋ Ike jaajjin ogo, "Ikee kiine a gïtken, naana ikee batta beeljede bata merkälen ye, ikee batta bi kaace ti Yätkïtïn Polloŋ jï ti. 4 Aŋ m’ana ḍoŋe ḍuuge ïñï bata minnenile yaanni ye, ken bi a m’ana yäwaŋ Yätkïtïn Polloŋ jï ye ti.

5 "Aŋ m’ana gïmgïn minnenile bata yaanni kä yäṇtonḍi ye, i Ika gïmgana. 6 Aŋ m’ana merkälen lïcken yaakki yaaka a luggïnï kä Ika ye puge ḍuuggin kä nääŋkä yaackä ye, iiñca päjjïdï men yaanna ḍikkänä me ḍok päämḍeynä mooye aŋ yeepänä me kul koon mooye jï.

7 "Jooññu ŋommañ wic kä wakkä yaaka naŋtä me a yek yiñ ye! Bääkkan daa päjjïdï waak yaakka näŋï ḍuuggen, aŋ jooññu m’ana äätete puuccin ye ti! 8 Aŋ naana a ïṇtü ke kïyü ken ïkï pugey ḍok kä yiñ ye, iirä woo aŋ yeepci woo, iiñca päjjïdï ïkï kaacci ti üṇṇü ti ke cüle ïṇtü kä keelok ke kïyü kä keelok, kä yaana ïnkü ke kïïgü muuṭuk biltene ti, aŋ yeepini me maañ yaana ke cüle ye ti. 9 Aŋ naana a waŋü ken ïkï pugey ḍok kä yiñ ye, luulu woo aŋ yeepci woo, iiñca päjjïdï ïkï kaacci ti üṇṇü ti waŋü kä keelok, kä yaana waŋgü muuṭuk biltene ti, aŋ yeepini kä me maañ yaana ke cüle ye ti.

10 "Waŋgic tïïce ṭeṭaŋ ŋana merkälen lïcken yaakki waagde. Aŋ ikee kiine malaŋŋi yeeken polloŋ jï Wäyo daamgä waŋgin kamat polloŋ jï. 11 Nääŋka Minneni Mänbaan äätenee mäkee mä yääyin ye. 12 Aŋ ikee payde ogo ŋaaka? Naana men yaŋkalaŋ cääygene käbälgä caykä kä caay, aŋ keelok yääynä meken ti ye, ike batta bi yaaka caykä kä waŋäḍeŋ witken kä waŋäḍeŋ ye cake ïñï pääm wic, aŋ ike atï määjï yaana a yääyon ye? 13 Ikee kiine a gïtken, naana kaññe ye, ike jone bi ñapï kä yaac kä yaana kaññeeda kä yaanna, kä yaaka caykä kä waŋäḍeŋ witken kä waŋäḍeŋ batta a yääyin ye. 14 Aŋ cäänna batta a ṭäktäŋ yen Wääc yaana ñaalok polloŋ jï ye, ogo merkälen lïcken yaakki ti yaŋkalaŋ yääyo.

15 "Aŋ naana määdic ke käwic näŋŋä yiñ ïkï ti ye, atä aŋ nüütkü yiñ yeene waan yüünü ke ike pare. Aŋ naana ïkï tiiŋgeney ye, i ïkï käññi määdic. 16 Aŋ naana ïkï batta agä tïïŋgïnï ye kuju mäŋkalaŋ kä keelok ke yew aŋ ḍukce kä ke ïkï ŋuca nuŋko jiik’a jaayne ye yuute daa, kä biltin ti mä yuṭin kä yew ke ḍäk ye. 17 Aŋ naana ike yaakkä kä tiiŋgin iken ye, i nüütkü äntüke Macii, aŋ naana ike yaakkä cäänna kä tiiŋgin äntüke Macii ye, dalä ike wäätï ïkï ti bata waanjï ke ḍüṭoni yaacken. 18 Ikee kiine a gïtken, gin’a ḍeŋŋe ŋommañ wic ye, i cäänna daa bi a ḍekon polloŋ jï, aŋ gin’a gütkene ŋommañ wic ye, i cäänna daa bi a gütkïnï polloŋ jï. 19 Aŋ ikee kiine a gïtken ŋuca, naana mäkkalaŋ kä yewwe ikee ti gïmmïn ŋommañ wic kä gin’a tääccene ye, i bi näŋgene daa Wäyo yaana ñaalok polloŋ jï ye. 20 Aŋ naana mäkkalaŋ kä yewwe ke ḍäk yoken ḍülï nänṭä keellä kä yäṇtonḍi ye, i wïca Ika agä waadgen ti."

21 Aŋ Bütürüc äätin Yeecüwa ti aŋ taaññe ogo, "Mügdo, naana määdo ïïñjïdï ika näŋgada nääŋkä yaackä ye kulku ääŋki kä ŋïṭṭä? Ääŋki kä ŋaṭükel?"

22 Aŋ kiini Yeecüwa ogo, "Ïkï batta kiinneni ogo ääŋke ko ŋaṭükel, a caykä kä ŋaṭükel ääŋke kä ŋaṭükel.

23 "Aŋ aŋŋi ina ken Yätkïtïn Polloŋ jïñe iircete daa me ke yätkä yaana ṭäkï ḍuccïdï ïñï ñuuguloni yeeke yaaka ike cääyge mïïngä iken ti ye. 24 Aŋ wääna ïïjjene cäjjin ïñï ye, i äcki me men kä keelok yaana a kujon mïïngä ike ti ye, 10,000 yek tiil. 25 Aŋ batta cääyge gin’a wänee kä mïïngä ye, aŋ men mooye yeene iinjin jiik ogo ike yääjjïï me woo ke iiŋe ke merkälen yeeke ke wakkä yeeke yaaka bilto ti ye muure ken wänje ko mïïngä.

26 "Aŋ ñuugulo yeene ḍüŋjïn ïñï ñome ti, aŋ ike ñujgi yok ogo, ‘Yuudu por aŋ waak yüükü bi wängenii kä muure.’ 27 Aŋ ike ängi ŋïngïn men mooye yeene aŋ kulkene kä mïïngä aŋ äkkene attä.

28 "Aŋ wääna ñuugulo yaanna kaaccee kä woo ye i pärjin ke muukonḍe yaana agene kä ñuuguloni ye, a kujon tiil ike ti caykä kä caay, aŋ müŋŋe maaññe pok aŋ kiiṇde ogo, ‘Wängaa mïïngä yeeki yaaka agii kä koowgin ika.’

29 "Aŋ menen yaana agene kä ñuuguloni ye ḍüŋjïn ïñï aŋ ike ñujgi yok ogo, ‘Yuudu por aŋ waak yüükü bi wängenii.’ 30 Aŋ ike yaakkä aŋ koowne aŋ äññe äcce gaŋgar ke mïïngä wanjeeda ko.

31 "Aŋ wääna ñuuguloni yakkalaŋ yuṭṭene gin’a näŋŋä ḍoŋe ye, iken juuggen yejgin kä yaac, aŋ iken attä men mooye yeenen nüütkï kä wakkä yaaka näŋŋä ḍuuggen yaakka. 32 Aŋ bärki men mooye aŋ kiinne ogo, ‘Ïkï ñuugulo yaajgonḍe ïkï kulkeneni kä mïïngä yüükü muure kä yaana ñujganaa kä yok ye. 33 Aŋ ïkï menic batta ängä ŋïngïn bata yaana ängenenii ŋïngïn ye?’ 34 Aŋ men mooye pennä kä yaac, aŋ müükkene ḍujoni ogo ḍooyjï, ke mïïngä wanjeeda ko muure.

35 "Aŋ cäänna Wäyo yaana polloŋ jï ye, ikee bi naŋde kä nääŋkä keelkä aŋan naana m’ana määden ke käwen batta kulkede jone ti ye."