1 Aŋ wääna Yeecüwa ḍaŋŋee kä jiik yaakki ye, Ike Jalïïl daljene ïñï, aŋ attä baan mä Yühüdïya ti kä ñomuk wii mä Üürdün ti. 2 Aŋ ṭoŋ ḍiirken bäätcin Ike ti aŋ ṭeeññe wïca.

3 Aŋ Pïrrïcïïnnï yakkalaŋ äätin Ike ti, aŋ Ike puuci taaji ogo, "Yoku päjjïdï oon iiŋe äkke kä jiik’a bilti ye?"

4 Aŋ luugi Yeecüwa ogo, "Ikee batta age päkin Meeŋka Jiik Jooŋ jï ogo Näŋo ïïjjïn ti, iken naŋŋïï ogo oon ke iiŋ? 5 Aŋ Ike jaajjin ogo, ‘Ina ken oon wäyen ke meen daleeda buwin aŋ yore cooṭeeda ti iiŋe ti, aŋ wäätene agene gaan keellä yaanna.’ 6 Aŋ iken batta ŋuca a yew aŋŋa gaan keelok, aŋ gin’a coori yok Jooŋ ye dale ŋana piirgä gïtï mänbaan."

7 Aŋ taaji ogo, "Aŋ Müüca iccin jiik ogo men iiŋe iñje meeŋka äkkin aŋ äkkee ina?"

8 Aŋ kiini Yeecüwa ogo, "A juuggic teynen ken ina tiiŋgene kä Müüca ogo määngic dalje buw yaanna, aŋ wääna ïïjjïn ti ye batta aŋan. 9 Aŋ ikee kiine, m’ana iiŋe äkkene kä jiik yakkalaŋ batta kä balkïtïn aŋ kuññu iiŋ yaŋkalaŋ ye, i aŋan näŋit balkïtïn."

10 Aŋ kiini baaddoni yeeke ogo, "Aŋ naana a biilkä ika yek waadgä oon ke iiŋ ye, iiñca ŋana men kujit."

11 Aŋ kiinne ogo, "Yaakki batta lïïltä gïmkätä me muure, a m’aka a yüükkïnï ti kä Jooŋ ye pääken. 12 Mäkkalaŋ a giitin kä migen a lucku, aŋ mäkkalaŋ a dïkïn kä mäbaan aŋ mäkkalaŋ wäkï cäwdä bata lucku ogo Yätkïtïn Polloŋ jïñe. M’ana lïïṭït gïmgïdï yaakki ye, i dale gïmge."

13 Aŋ merkälen äbi me Ike ti ogo ïnke ḍoocce witken ti aŋ ŋüülkee. Aŋ baaddoni me geri.

14 Aŋ Yeecüwa jaajjin ogo, "Dale merkälen ätä Ika ti, aŋ ŋana ṭïïge, bata yaakki Yätkïtïn Polloŋ jïñe a yeenen." 15 Aŋ ïnke ḍoocce witken ti aŋ ŋüülkene aŋ kaaccä woo.

16 Aŋ oon yaŋkalaŋ äätin Ike ti aŋ Ike taaji ogo, "Nüüto, a nääŋkä ŋerkä yaaka wali ye, ken bi naŋä käñä üṇṇü ke cüle?"

17 Aŋ kiini Yeecüwa ogo, "Ika tajdaa kä ŋerrä ina? M’ana ŋeraŋ ye a Keelok. Aŋ naana ïkï ṭäkä kaaccin ti üṇṇü ti ye jiik ïïnïnï tïïjä."

18 Aŋ ike taaji ogo, "A jiik ïïnïnï yaaka wali ye?"

Aŋ Yeecüwa jaajjin ogo, "Ŋana ïkï nääkä me, ŋana ïkï näŋä balkïtïn, ŋana ïkï käṭä, aŋ ŋana ïkï päkä kä yelkïtïn. 19 Wääc ke miic eemdä, aŋ m’ana yiire kä ye bilgä bata yorü aŋan."

20 Aŋ kiini oon yaanna ogo, "Jiik ïïnïnï yaakka agä naŋdïnï muure, aŋ a ŋaaka ken mor buunu ika ti?"

21 Aŋ kiini Yeecüwa ogo, "Naana ïkï ṭäkä wäätci agä küümon ye, atä aŋ waak yüükü yääjjä woo muure aŋ pääggä aangï aŋ ïkï bi cääygi waak ŋerkä ñaalok polloŋ jï, aŋ wäättan äätä, baaddaa."

22 Aŋ wääna oon yaanna tiiŋŋee kä aŋan ye ike kaaccä woo i jone yaajaŋ nääŋka ike agee kä ceeggon ye.

23 Aŋ Yeecüwa baaddoni yeeke kiinne ogo, "Ikee kiine a gïtken, teyaŋ kä yaac kä kaaccin ti m’ana a ceeggon ye Yätkïtïn Polloŋ jï ti. 24 Aŋ ŋuca ikee kiine poṭulaŋ kä kaaccin woo kalman kääl lïbära ti kä yaana ceeggon kaacee kä ti Yätkïtïn Jooŋ ti ye."

25 Aŋ wääna baaddoni tiiŋŋene aŋan ye, i witken ḍiiktin kä yaac aŋ jaajjin ogo, "Aŋ a ŋaani ken bi käñï mäkkin?"

26 Aŋ Yeecüwa däämjin iken ti aŋ kiinne ogo, "Aŋ mäbaan ti yaakki batta a päyin, aŋ Jooŋ ti wakkä muure a päyin."

27 Aŋ kiini Bütürüc ogo, "Yooru, wakkä muure mañjonon aŋ ikoon bäätonon Ïkï ti. Aŋ a ŋaaka ken bi kañon?"

28 Aŋ iken kiini Yeecüwa ogo, "Ikee kiine a gïtken, waan yaana wakkä muure naŋge daa me a kïccäŋgenen ye, aŋ Minneni Mänbaan cääjjee nook yen mügdïn yen gällä yeene ti ye, i ikee yaaka Ika baaddana ye, ikee cäänna bi cääjje nooŋŋi yek mügdïn kä caay witken kä yew güte äärgä tüggen yek mä Icärayiil yaaka caay witken kä yewwe ye. 29 Aŋ m’ana äärgä yeeke daljene ïñï ke mädgen ke käwgen ke wäyen ke meen ke merkä yeeke ke yiil yeene ogo Ika ye, bi käñï ääŋke caykä kä caay a küümïn, aŋ bi yätï üṇṇü ke cüle. 30 Aŋ me ḍiirken yaaka a ïïjjïn tiññaŋ ye, ken bi wäätï a düüñïn, aŋ m’aka daamgä me a düüñïn tiññaŋ ye, ken bi wäätï a ïïjjïn.