Mateus 2

Ukcodoni Ätä Ñomuk

1 Aŋ wääna Yeecüwa giidene daa me Beetlaam baan Yühüdïya ye, a nïïnkä yätkä Ïïrüüdüc ti. Aŋ ook yakkalaŋ a ŋäjjoni ätä ñomuk äätin baan mooye Oorcalïïm ti, 2 aŋ tääccin ogo, "Wali m’ana a giiton a Yätkä yen Yühüüṇṇï ye? Kiṭṭä yeene yoorron wääna kääjenee kä ñaalok ye, aŋ ikoon äätodon Ike maaŋon."

3 Aŋ wääna yätkä Ïïrüüdüc tiiŋŋee kä aŋan ye, i ike ṭeeŋŋä, ke mä baan mooye Oorcalïïm muure. 4 Aŋ ike ḍuuŋku däŋkä ke nüütoni jiik ḍoocin yek Jooŋ bärkene ti muure aŋ tääckene ti ogo, "Macii bi giitä me a wa?" 5 Aŋ luugi me ogo, "A Beetlaam baan Yühüdïya jï, a pergon kä bäṭo ogo,

6 ‘Aŋ ïkï, Beetlaam, ŋommañ yen mä Yühüdïya ti,

ïkï batta ḍeeräḍeeṭ bänkä mäyken yek mä Yühüdïya ti,

aŋ ïkï ti mäŋkalaŋ bi ätä a mügdo

yaana bi kääjï mä yeeki yek mä Icärayiil ye.’"

7 Aŋ Ïïrüüdüc ŋäjjoni bärkene ti kä ätkïtïn ukcenee gïtï a tooku ken üükene woo kiṭṭä. 8 Aŋ tucce Beetlaam aŋ kiinne ogo, "Ate, aŋ Minneni maawe ṭeṭaŋ. Aŋ naana kaññe ye, i ika icka jiik, aŋ cäänna ika bi atä maaŋä."

9 Aŋ wääna tiiŋŋene jiik yätkä ye, i iken ättä kä päy yeenen. Aŋ kiṭṭä yaana yoori ina üükïn woo, aŋ iken wooyi ke yuutee ïñï nänṭä Minneni. 10 Aŋ wääna kiṭṭä yooṭene daa ye, iken juuggen ñappä kä jon ñammä mooye! 11 Aŋ iken kaaccä äräk aŋ Minneni yoori ke meen Märïyam, aŋ ḍüŋgï ïñï aŋ maaŋi. Aŋ iken kücümgü yeeken kupki aŋ ääcin woo iccinni a tiilgä ke ḍukpïlkä ke panḍeyni. 12 Aŋ iken koli Jooŋ kä lääggï ogo ŋana ḍukcodo Ïïrüüdüc ti. Aŋ iken ḍukcin baannen kä päy yaŋkalaŋ.

Yïïŋŋä Minneni Macïr

13 Aŋ wääna ŋäjjoni ḍakkene kä ye, i malak yen Pïṭo üükïn woo Yuucip ti kä lääggï aŋ kiinne ogo, "Juwu, Minneni koowu ke meen, aŋ yïïŋä Macïr, aŋ cääye wïca ke nüütke kä, winni Ïïrüüdüc Minneni maawe ṭäkke näge ḍok."

14 Aŋ ike juwin minneni koowne ke meen kä mïïllä aŋ yïïŋŋe Macïr. 15 Aŋ cääygin wïca ke Ïïrüüdüc tüwe. Yaakki ḍääkit yaaka jaayi Pïṭo kä bäṭo ye ogo, "Ika bääṭänä woo Minneni yeeni Macïr jï."

Näŋŋä Merkälen

16 Aŋ Ïïrüüdüc wääna yoorreeda ike malene daa ŋïngïn ŋäjjoni ye, ike pennä kä yaac. Aŋ ike tuccin kääygä aŋ merkälen oogen nägi ḍugin muure yaaka Beetlaam jï ye, ke bänkä yaaka cokulaŋ ti ye. Merkälen yaaka yuungen kä yewweni ke ïñï ye, kä waan yaana ookke gïtï ŋäjjoni ti kä üükïn woo kiṭṭä ye. 17 Aŋ ken ḍääkit yaaka jaayi bäṭo Ïrmïya ye ogo,

18 "Yääw tiiŋin Raama

ïwok ke nüüjdüŋ mooye.

Aŋ Rahiil week ogo merkä yeeke,

ike yaakkä kä lüüynü jok

ogo iken baawkono."

Ḍukcin Naacira

19 Aŋ wääna Ïïrüüdüc tüwnee ye, i malak yen Pïṭo üükïn woo Yuucip ti kä lääggï Macïr. 20 Aŋ kiinne ogo, "Juwu, Minneni koowu ke meen aŋ ate ŋommañ yen mä Icärayiil, m’aka ṭäkï nääkä Minneni ye tüwgïn." 21 Aŋ ike juwin aŋ Minneni koowne ke meen aŋ attä ŋommañ yen mä Icärayiil ti.

22 Aŋ wääna Yuucip tiiŋŋe ogo Aarkalayüüc mükko yätkïtïn Yühüdïya nänṭä wäyen Ïïrüüdüc ye, i ike booññu kä ḍukcin wïca. Aŋ koli lääggï, aŋ ike attä baan mä Jalïïl. 23 Aŋ ike attä aŋ cääynä baan yaana battä me ogo Naacira ye. Aŋ a yaaka jaayi bäṭoni ye ken ḍääkit ḍuuggen ogo, "Ike bi battä me ogo män Naacira."