1 "Aŋ Yätkïtïn Polloŋ jïñe bi beeljï bata ṭulgu yaaka kä caay kuññu dikoni yeeken ye aŋ atï pärjïdï ke or ñääṇṇä ye. 2 Yaaka kä duuc ye a amgï aŋ yaaka kä duuc ye a ŋäjjoni. 3 Yaaka kä duuc a amgï yaakka dikoni yeeken koowi aŋ batta a kujin ñownä dikoni. 4 Aŋ yaaka kä duuc a ŋäjjoni yaakka kuññu küjbünni yek ñownä ke dikoni yeeken. 5 Aŋ wääna or ñääṇṇä kuurenee ye iken muure bäŋŋä aŋ oodi. 6 Aŋ mïïllä kule gïtï iken cükï yokïn yääw ogo, ‘Yooṭe or ñääṇṇä ïya äätä! Kääje woo aŋ paake.’

7 "Aŋ ṭulgu juwin ñaalok muure aŋ dikoni yeeken tooti yokïn. 8 Aŋ yaaka kä duuc a amgï yaakka jaajjin ŋäjjoni ti ogo, ‘Iñon ñownä yeekic ti kä ḍeewaŋ dikoni yooko ḍaŋŋa tüwok.’

9 "Aŋ luugi ŋäjjoni ogo, ‘U’u, yaakki ïkïïn batta bi pääjjïnïn müürïnaan, päjjïdï ikee ate yääjoni ti aŋ kije yek ḍuuggic.’

10 "Aŋ wääna iken attene kä kijene kä ye, i or ñääṇṇä ḍäägin ti, aŋ yaaka yoken agene kä tootin yaakka, kaaccene kä äräk nänṭä ba' ammani ñäänkä, aŋ äntüke üüljï me. 11 Aŋ kä ḍeeraŋ aŋŋi ṭulgu meken äätin aŋ jayok ogo, ‘Mügdo, Mügdo, kupkoon äntüke.’

12 "Aŋ luugi or ñääṇṇä ogo, ‘Ikee kiine a gïtken, ikee kuje.’ 13 Aŋ aŋŋi kiijjede woo kä yaana nïïnnä ke wuuŋ yen ḍuukin yeeni kuje daa kä ye.

14 "Aŋ ŋuca Yätkïtïn Polloŋ jïñe a pääygon kä oon yaana atï taaŋkalaŋ kä utar, aŋ kiinkä yeeke bärkene ti aŋ müükkene tiil yeeke wääna atee kä ye. 15 Aŋ yaŋkalaŋ iññe kücümgü tiil kä duuc aŋ menen iññe kücümgü tiil kä yew, aŋ ḍäke iññe kücam tiil kä keelok aŋ yaŋkalaŋ daa iññe kä lïïldïn yeene. Aŋ wäättan ike attä.

16 "Aŋ yaana kuññu kücümgü tiil kä duuc ye attä aŋ ñuugulenee kä aŋ ŋuucin ti meken kä duuc ŋuca. 17 Aŋ yaana kuññu kücümgü tiil kä yew ye, näŋjin bata menen aŋ ŋuucin ti meken kä yew ŋuca. 18 Aŋ kiingon yaana kuññu kücam tiil kä keelok yaanna küññü kääl, aŋ tiil men mooye yeene jïkke ïñï.

19 "Aŋ wääna nïïnkä ḍiirene ye, i men mooye yen kiinkä yaakka ḍuukin, aŋ cääjjin ïñï paŋŋä tiil ti ke iken. 20 Aŋ kiingon yaana a kujon kücümgü tiil kä duuc ye, äätin aŋ ääcin ti meken kä duuc ŋuca, aŋ jaajjin ogo, ‘Men mooye, ika iññaa kücümgü tiil kä duuc, aŋ yooru, ika ääcänä ti meken kä duuc ŋuca.’

21 "Aŋ kiini men mooye yeene ogo, ‘Ŋeraŋ kä yaac! Ïkï kiingon ŋerconḍe yaana a lüggïnï ye, ïkï agä lüggïnï kä tïïññä gin ḍeerconḍe, ïkï bi ḍooceni ḍiirken gïtï, äätä kaacci jon ñamme gïtï yen men mooye yüünü ti.’

22 "Aŋ ike yaana a kujon kücümgü tiil kä yew ye, cäänna äätin aŋ jaajjin ogo, ‘Men mooye ika iññaa kücümgü tiil kä yew aŋ ika ääcänä ti meken kä yew ŋuca.’

23 "Aŋ kiini men mooye yeene ogo, ‘Ŋeraŋ kä yaac! Ïkï kiingon ŋerconḍe yaana a lüggïnï ye, ïkï agä lüggïnï kä tïïññä gin ḍeerconḍe, ïkï bi ḍooceni ḍiirken gïtï, äätä kaacci jon ñamme gïtï yen men mooye yüünü ti.’

24 "Aŋ yaana a kujon kücam tiil kä keelok ye äätin cäänna aŋ jaajjin ogo, ‘Men mooye yeeni, ïkï ŋäjjeni ñuugula yüünü caraŋ, ïkï iṭä nänṭ’a batta agii kä pïïton kä ye. Aŋ ïkï ḍüṭü nänṭ’a batta agii kä mäpon kä käwkä ye. 25 Aŋ ika booññu aŋ ika attä aŋ tiil yüükü jïkkä ïñï. Tiil yüükü ikki.’

26 "Aŋ luugi men mooye ogo, ‘Ïkï kiingon yaajgonḍe yaana a wuuñgon ye! Naana yoku ŋäjjä ika iṭä nänṭ’a batta agä pïïton kä, aŋ ika ḍüṭü nänṭ’a batta agä mäpon kä käwkä ye, 27 tiil yeeki batta äccädä kun tiil jï ina? Yoku ika käññä ginkalaŋ witken ti kä ḍeewaŋ.’

28 "Aŋ men mooye iinjin ogo, ‘Kücam tiil koowe kiingon yaanna ti, aŋ iñe m’ana cääyge kücümgü tiil kä caay yaanna. 29 Aŋ m’ana cääyge ye, bi iñgä me ḍiirken, aŋ bi cääygene kä ḍiräk, aŋ m’ana batta cääyge ye, yaaka bilti ike ti kä ḍeewaŋ ye, bi koojjunu me woo ike ti. 30 Aŋ kiingon yaana a waanjï yaanni yeepe woo mïïllä gïtï nänṭä ba' ïwok ke ŋeeynä me leken.’

31 "Aŋ naana Minneni Mänbaan ätä kä maaŋŋä yeene, ke malaŋŋi yeeke muure ye, Ike bi cääjjï nook yen mügdïn yeene yen gällä wic. 32 Aŋ ṭoŋ muure yoken bi ḍüülünü ti ñome ti, aŋ Ike me bi kebe gïtï bata yaana kaaydo käbälgä kibbedeeda woo jüüloni gïtï ye. 33 Aŋ Ike käbälgä bi ḍooce buŋ birrä aŋ jüüloni bi ḍooce kä buŋ aam.

34 "Aŋ wäättan Yätkä m’aka cäyok buŋ birrä ti ye bi kiine ogo, ‘Ääte, ikee yaaka age ŋüülkïnï kä Wäyo ye, kaace ti Yätkïtïn ti yaana tutkene kä me wääna ïïjjïn ti naŋŋä ŋommañ ye ti. 35 Ika nägana käñ aŋ Ika äämgana. Aŋ Ika nägana yeen aŋ Ika määtkana piik. Aŋ Ika agä boorgon aŋ Ika gïmgana äärgic ti. 36 Aŋ Ika yori elaŋ, aŋ Ika iiŋkana. Aŋ Ika yore caraŋ, aŋ Ika waañña. Aŋ Ika cääyä gaŋgar, aŋ Ika ookka.’

37 "Aŋ bi luuku mä wotku ogo, ‘Pïṭo, a tooku ken yoorini näki käñ, aŋ Ïkï äämgini, aŋ näki yeen, aŋ Ïkï määtkini piik? 38 Aŋ a tooku ken yoorini agii boorgon, aŋ gïmgïnï äärgo ti, aŋ yorü elaŋ, aŋ iiŋkini kä? 39 Aŋ a tooku ken agii kä raac aŋ cääyii gaŋgar aŋ Ïkï ookini kä?’

40 "Aŋ bi luuku Yätkä ogo, ‘Ikee kiine a gïtken, bata yaana näŋgene mädgi lïcken ke käwgi lïcken ye, i näŋgana kä Ika.’

41 "Aŋ Ike bi jaajjï m’aka buŋ aam ti ye ogo, ‘Aŋge yokic Ika ti ikee mä tuumgin, kaace maañ yaana ke cüle a tütkïnï booŋïn ke meŋkeekeni yeeke ye ti. 42 Ika nägana käñ aŋ Ika batta aga kä äämgïnï. Aŋ Ika nägana yeen aŋ Ika batta aga kä määtkïnï piik. 43 Ika agä boorgon aŋ Ika batta aga kä gïmgïnï äärgic ti. Aŋ yori elaŋ aŋ Ika batta aga kä ïïŋkïnï. Aŋ Ika agä raac aŋ Ika cääyä gaŋgar aŋ Ika batta aga kä ookon.’

44 "Aŋ iken cäänna bi lüükcï jaajjï ogo, ‘Pïṭo, a tooku ken yoorini näki käñ ke yeen, aŋ agii boorgon aŋ yorü elaŋ aŋ agii raac aŋ cääyii gaŋgar aŋ Ïkï batta agini kä yüükkïnï ti?’

45 "Aŋ Ike bi lüükcï ogo, ‘Ikee kiine a gïtken, naana ikee yaakke kä yüükkïn ti mädgi lïcken ke käwgi lïcken kä ḍeeraŋ ye, i ikee yaakke kä yüükkïn ti Ika.’

46 "Aŋ mä yaackä bi atï kaacï jooññu gïtï ke cüle, aŋ mä wotku bi kaacï ti üṇṇü gïtï ke cüle."