1 Aŋ wääna Yeecüwa ḍaŋŋee kä jiik yaakka muure ye, i baaddoni yeeke kiinne ogo, 2 "Ŋäjje Poñ Kaaldin Wic äätïdï nïïnkä yew ti ñomuk, aŋ Minneni Mänbaan bi müükkünü me mäbaan aŋ ṭeljänä me ti ñaalok kaakkon jok."

3 Aŋ ḍuuŋku däŋkä ke yätïnï yek Yühüüṇṇï yoken ḍülï nänṭä ba' ḍuuŋgon daaŋ küülconḍe yen Jooŋ yaana battä me ogo Kayaapa ye ti. 4 Aŋ läälin pugin ogo Yeecüwa mügjï ko ätkïtïn aŋ nägjï ḍok. 5 Aŋ iken jaajjin ogo, "Ŋana waan Poñ Kaaldin Wic ti, nuŋko me lelit."

6 Aŋ wääna Yeecüwa cääyee kä Betani paa ba' Camaan yaana a näkon kä jaan ñomuk ina ye, 7 i iiŋ yaŋkalaŋ kääjin äräk Ike ti ädit kuulkul pïtïna yaana kiygä me kä car ye, aŋ pookke Yeecüwa wiñe ti i Ike cääy därŋañ ti ämï.

8 Aŋ wääna yoorene daa baaddoni ye, iken piiṇdin aŋ jayok ogo, "Yaakki ñiyene me ina! 9 Päjjïdï yoku yääjji me woo kä car, tiil yoku iñi me aangï."

10 Aŋ jiik yaakka ŋäjji Yeecüwa aŋ luukke ogo, "Ikee iiŋ rüüde yok ina? Ike näŋŋä nääŋkä ŋerken Ika ti. 11 Ikee bi cääygene kä aangï ke ikee kamat aŋ ikee batta bi cääygene kä Ika kamat. 12 Ike pïtïna yaakki pookke yori ti naŋŋe tutee kä jïŋŋä yeeni. 13 Ikee kiine a gïtken, nänṭä yaana päkene me Jiik Ŋerkä yen Jooŋ ŋommañ wic muure ye, nääŋka naŋi iiŋ yaanni ye, cäänna daa bi jaaygä me aŋ payte daa me."

14 Aŋ baaddoni yaaka caay witken kä yewwe ye yaana battä me ogo Yahüüja Garyüütï ye attä ḍuuŋku däŋkä ti, 15 aŋ tääccin ogo, "Ika bi iña ŋaaka naana müükkene kä ye?" Aŋ ike iñi tiilgä gälkä waŋgen caykä kä ḍäk. 16 Aŋ kä waan yaanja ti ike määjjin waan ääkkedeeda ŋäc.

17 Aŋ äŋ jïñe yen Poñ Bïggï Cotku ti baaddoni äätin Yeecüwa ti aŋ taaji ogo, "Ïkï ṭäkä tutkini nänṭä, yaana ämii kä amma Poñ Kaaldin Wic ye wa?"

18 Aŋ ike luukcin ogo, "Ate oon kalaŋ ti baan jï aŋ kiine ogo Nüüto jääyïdï ogo, ‘Wuuŋ yeeni waŋe cokilin, Ika atä ämä amma Poñ Kaaldin Wic baannü, ke baaddoni yeeki.’" 19 Aŋ baaddoni jiik yaaka kiinene daa Yeecüwa ye naŋi, aŋ tuttu amma yen Poñ Kaaldin Wic.

20 Aŋ biigin ti aŋŋi, Yeecüwa cääjjin ïñï amma ti ke baaddoni yeeke yaaka kä caay witken kä yew ika. 21 Aŋ wääna ämene kä ye, Yeecüwa jaajjin ogo, "Ikee nüütke a gïtken, mäŋkalaŋ ikee ti Ika bi ääkka ŋäc."

22 Aŋ baaddoni anjin ïñï kä yaac, aŋ wäättana Yeecüwa tactä, kä kiṭuk kiṭuk ogo, "Pïṭo, bi a ika?"

23 Aŋ luukke ogo, "M’ana ïnko bi yïrjï gälŋä jï ye, i a m’ana bi Ika ääkka ŋäc ye. 24 Aŋ Minneni Mänbaan bi tüw bata yaana jaaynene Meeŋka Jiik Jooŋ ye, aŋ m’ana bi Minneni Mänbaan ääkke ŋäc ye, bi yaajaŋ ke ike! Iiñca ŋeraŋ ŋana yoku ike giidi me."

25 Aŋ taaji Yahüüja yaana Ike bi ääkkänä ŋäc ye ogo, "Nüüto, aŋ bi a ika?"

Aŋ luuki Yeecüwa ogo, "Ïkï jaajjini."

26 Aŋ wääna iken ämmene kä ye, Yeecüwa kuññu biŋŋan aŋ ŋüülkene, aŋ wiṇṇe gïtï aŋ iññe baaddoni, aŋ kiinne ogo, "Koowe ame a yori inni."

27 Aŋ ḍon koowne aŋ mälcin ñaalok aŋ iññeeda kä aŋ jaajjin ogo, "Mätce ikee muurijaan. 28 A yïmgä yeeki ikki, a yek jiik ḍoocin yek Jooŋ kïccäŋgenen yaaka puuktin ogo kulkin nääŋkä yaackä yek me ḍiirken ye. 29 Ikee kiine, Ika batta bi mätcä piik jaan yaana ṭulge belok bata lüütkon ye ŋuca, aŋŋa nïïnnä kïcconḍe yaana bi mätcä kä ke ikee Yätkïtïn Wäyo ti ye."

30 Aŋ iken ooljin uullu aŋ kaaccä woo üŋjïn pääm yaana wiñe a jengä jeytüünni ye ti.

31 Aŋ iken kiini Yeecüwa ogo, "Ikee muurijaan bi buurce woo Ika ti wïïrïn tiññaŋ. A pergon Meeŋka Jiik Jooŋ jï ogo, ‘Kaaydo bi pacä aŋ käbälgä yek kaal jïñe bi gääctit gïtï.’ 32 Aŋ naana Ika juwunu ñaalok tüwnü ti ye, ikee bi yüte ti Jalïïl."

33 Aŋ Bütürüc luukcin Ike ti ogo, "Naana me muure Ïkï daljini ïñï ye, Ïkï batta bi daljeni ïñï."

34 Aŋ luugi Yeecüwa ogo, "Ïkï kiineni a gïtken wïïrïn tiññaŋ i mor toon batta weekcï Ika bi reecca woo ääŋkü kä ḍäk ogo Ika kujjada."

35 Aŋ kiini Bütürüc ogo, "Naana cäänna ika tüwü ke Ïkï ye, Ïkï batta bi reeceni woo!" Aŋ baaddoni muure jaajjin jiik keelkä yaakka.

36 Aŋ Yeecüwa attä ke iken nänṭä yaana battä me ogo Jecïmaani ye, aŋ baaddoni yeeke kiinne ogo, "Cääye winni, Ika atä wïca mäṭä." 37 Aŋ kuññu Bütürüc ke merkä Jabadï kä yewwe, Yaagüüp ke Yuhanna, aŋ Ike uccin kä nüüjdüŋ aŋ jone yaaññä. 38 Aŋ kiinne ogo, "Joni nüüjï kä yaac aŋ a yaana Ika tüwü ye. Wääde winni aŋ yäwe ke Ika."

39 Aŋ wükcïn woo kä ḍeeraŋ aŋ ḍüŋjïn ïñï aŋ mälcin ñaalok ogo, "Wäyo, naana päjjïdï ye ŋana Ika naŋdaa wääcä waaññä yaana äätïdï yaanni. Aŋ ŋana Ïkï nääŋä kä ṭäktäŋ yeeni, ṭääkcä näŋjä kä ṭäktäŋ yüünü Ïkï."

40 Aŋ Ike ḍukcin baaddoni yeeke ti, aŋ wäädene a ootin. Aŋ Bütürüc kiinne ogo, "Ikee batta cäänna lïïṭe yäwe ke Ika wuuŋ kä keelok? 41 Yäwe aŋ mäṭe nuŋko ŋana ḍimjede puuccin gïtï. Wääktäŋ ṭäkï aŋ gaan ken bämaŋ." 42 Aŋ iken dalji ïñï Yeecüwa kaaccä woo ŋuca aŋ mäṭṭä ogo, "Wäyo, naana waaññä yaanni batta a aŋgïnï yok ye, i daa waajä aŋ dalä ṭäktäŋ yüünü näŋï ḍoŋe." 43 Aŋ wääna ḍuukenee kä iken ti ŋuca ye, i kaññe a ootin waŋgin a pekin ïñï kä nïïnkä.

44 Aŋ daljene ïñï ŋuca aŋ attä aŋ mäṭṭä ääŋke kä ḍäk aŋ jaay jiik keelkä. 45 Aŋ Ike äätin baaddoni yeeke ti aŋ kiinne ogo, "Cumje ootene aŋ yïïke. Aŋ yoore wuuŋ ḍäägin aŋ Minneni Mänbaan müükkï me mä yaackä ïnken ti. 46 Juwe aŋ atïn! Yoore, aagdo ŋäc yeeni inni!"

47 Aŋ wääna Yeecüwa iiñjedee kä jaayee ye, Yahüüja yaana a baaddo ke meken yaaka kä caay witken kä yew ina äätin ke ṭoŋ ḍiirken kä gaaḍalli ke läcäŋgä tuuji kä ḍuuŋku däŋkä ke yätïnï yek me. 48 Aŋ iken a iñgin kä aagdo ŋäc Yahüüja gin’a nüütï ye, ogo, "M’ana bi mucku gimgin ye, ken a Ike, i müge." 49 Aŋ kä ḍeeraŋ aŋŋi ike äätin Yeecüwa ti aŋ jaajjin ogo, "Ogook, Nüüto?" Aŋ muckene gimgin*.

50 Aŋ kiini Yeecüwa ogo, "Muukonḍi näŋä gin’a umgini ṭäkkä naŋdä ye." Aŋ iken äätin aŋ Yeecüwa mügï. 51 Aŋ baaddo yen Yeecüwa yaŋkalaŋ gaaḍal yeene wuudene woo, aŋ kiingon yen ḍuuŋgon daaŋ küülconḍe tocce gitkin woo.

52 Aŋ kiini Yeecüwa ogo, "Gaaḍal yüünü ḍuukci ätte jï. M’aka ñuugal kä gaaḍal ye bi tüwok kä gaaḍal. 53 Ïkï batta ŋäjjä ogo Ika lïïlco ñujjoo Wäyo ti, aŋ Ike tucu malaŋŋi yeeke kä bïraŋ aŋ Ika tïïca. 54 Aŋ yaakki bääkkan daa bi näŋï ḍuuggen ḍääkit yaaka jaayi Meeŋka Jiik Jooŋ ye."

55 Aŋ Yeecüwa ṭoŋ kiinne ogo, "Ika agä mäddok yaajgonḍe ina ääte kä gaaḍalli ke läcäŋgä ogo mügjada ko yaanna? Nïïnkä muure Ika cääynä kaal yen änlaṇṇä yen Jooŋ jï aŋ Ika batta mügda ina? 56 Aŋ yaakki muure näŋŋä ḍuuggen ḍääkit yaaka peri bäṭoni Meeŋka Jiik Jooŋ jï ye." Aŋ baaddoni muure Ike dalji ïñï aŋ buurcin woo.

57 Aŋ m’aka müügïn Yeecüwa ye Ike iji Kayaapa ti yaana a ḍuuŋgon daaŋ küülconḍe ye ti, nänṭ’a ḍülte kä nüütoni jiik ḍoocin yek Jooŋ ke yätïnï yoken ye. 58 I baattä Bütürüc kä utar aŋŋa nänṭä ba' ḍuuŋgon daaŋ küülconḍe aŋ ike kaaccä ti aŋ cääjjin ïñï ke tïïconi, däämï düüñïn nääŋkä.

59 Aŋ ḍuuŋku däŋkä ke gütoni muure Yeecüwa määckätä ḍok m’aka jaajjï kä yelkïtïn Ike ti, nuŋko näke daa kä ḍok ye. 60 Aŋ me ḍiirken äätin jayok kä yelkïtïn Ike ti. Aŋ gütoni batta a käñin jiik’a päjjïdï näke daa kä ḍok ye. Aŋ wäättan me kä yewwe äätin 61 aŋ jaajjin ogo, "Oon yaanni jaay ogo, ‘Ika lïïṭä änlaṇṇä yen Jooŋ ḍüümü gïtï aŋ ŋocu koru nïïnkä kä ḍäk.’" 62 Aŋ ḍuuŋgon daaŋ küülconḍe yuuttu ñaalok aŋ jaajjin Yeecüwa ti ogo, "Ïkï batta cääygini kä luukcin yaana jaajjidii kä cïŋŋä yaana üüŋïdï Ïkï ti yaanna?" 63 Aŋ Yeecüwa daa a tïïŋjïnï ïñï. Aŋ kiini ḍuuŋgon daaŋ küülconḍe ŋuca ogo, "Kä yäṇtäŋ Jooŋ yaana a üdon ye, Ïkï ḍooceni lïïttäŋ gïtï, nüütkoon naana Ïkï agä Macii Minneni yen Jooŋ ye."

64 Aŋ kiini Yeecüwa ogo, "Ïkï jaajjini. Aŋ ikee kiine, kä waan yaanni ti ke ñomuk Minneni Mänbaan bi yoore cääy nänṭä teynä buŋ birrä yen Jooŋ ti, aŋ bi ätä kä curuŋgu yek polloŋ." 65 Aŋ ḍuuŋgon daaŋ küülconḍe burŋu yeene jeññe gïtï kä piinkä aŋ jaajjin ogo, "Oon yaanni jaay ina aŋŋi ḍüücï ogo iken iiro ke Jooŋ! Ïkïïn ṭäkïn mä yuṭin ina ŋuca? Aŋ tiiŋŋe kiirkä yeeke muure. 66 Aŋ ikee payde ogo ŋaaka?"

Aŋ iken luukcin ogo, "Ike päjjïdï tüw." 67 Aŋ ŋüülgü ñomgin kä ñaangä aŋ jiibi kä ïnken aŋ yakkalaŋŋi Ike määbi täŋkin, i agene kümgon waŋgin. 68 Aŋ kiiṇtä ogo, "Macii, nüütkoon naana Ïkï agä bäṭo ye, Ïkï jebini kä ŋaani?"

69 Aŋ Bütürüc cääy woo üṇtük. Aŋ ṭuulle yaana ñuugal ye äätin aŋ ike kiini ogo, "Ïkï cäänna ke Yeecüwa yen mä Jalïïl."

70 Aŋ Bütürüc riccin woo me ñomgen ti muure. Aŋ jaajjin ogo, "Batta ŋäjjä ïkï jaayä ogo ŋaaka."

71 Aŋ wääna ike attee kä äntüke yen kaal ti kä cokal ye, yooṭi ṭuulle yaana ñuugal ye yaŋkalaŋ ŋuca, aŋ m’aka yudok gunne ti ye kiinne ogo, "Oon yaanni ke Yeecüwa yen mä Naacira."

72 Aŋ ŋuca ike riccin woo kä lïïttäŋ aŋ jaajjin ogo, "Oon yaanna kuju."

73 Aŋ kä ḍeeraŋ aŋŋi m’aka yudok wïca ye äätin Bütürüc ti aŋ kiine ogo, "Ïkï bääkkan daa ke iken a gïtken, jiik yüükü muure nüütï ïkï agä män Jalïïl."

74 Aŋ ike jujjin kä tuummu ḍoŋe aŋ lïïtkede ogo, "Oon yaanna kuju." Aŋ kä ḍeeraŋ aŋŋi toon weekcin.

75 Aŋ Bütürüc päjjin jiik’a jaayi Yeecüwa ye ogo, "I toon batta mor weekcï Ika bi reecca woo ääŋkü kä ḍäk." Aŋ Bütürüc kaaccä woo aŋ weeŋŋä kä yaac.