1 Aŋ wääna Yeecüwa kääjenee kä ïñï pääm wic ye, i ṭoŋ ḍiirken bäätcin Ike ti. 2 Aŋ oon yaŋkalaŋ äätin Ike ti näkä jaan, aŋ ḍüŋjïn ïñï ñome ti, aŋ kiinne ogo, "Mügdo, naana Ïkï gïmmädä ye, laatca yokïn woo."

3 Aŋ Yeecüwa ïṇte lajjene aŋ tamme yok aŋ jaajjin ogo, "Ika gïmmädä. Latci woo!" Aŋ kä ḍeeraŋ aŋŋi oon yore lattä woo kä jaan. 4 Aŋ kiini Yeecüwa ogo, "Yooru, mäŋkalaŋ ŋana nüütküdü, atä aŋ yorü nüütkü män daaŋ aŋ äccä gin’a iini Müüca ye, dalä wäätï a ŋäjjin iken ti ogo ïkï latteey woo."

5 Aŋ wääna Yeecüwa kaaccee ti Kaparnahuum ye, i ḍuuŋgon kääygä yen mä Ruumaan yaŋkalaŋ äätin Ike ti, aŋ Ike ñujgi yok ogo, 6 "Mügdo, kiingon yeeni bilti nïïn ïñï paa bür wic a püündïnï, wääcï kä yaac."

7 Aŋ kiini Yeecüwa ogo, "Ika bi äätä aŋ ike ṭeeñä."

8 Aŋ luugi ḍuuŋgon kääygä ogo, "Mügdo, batta päjjïdï Ïkï kääjä äräk baanni, jaajjä jiik kä winninä aŋ kiingon yeeni bi ṭeñ. 9 Ika cäänna agä oon ïñï mügdïn ti, ke kääygälen ïñï ika ti, aŋ yaana kiinä ogo, ‘Atä,’ ye, i daa atï, aŋ yaana kiinä ogo, ‘Äätä,’ ye, i daa ätä, aŋ naana kiingon yeeni kiinä ogo, ‘Yaanni naŋä,’ ye, i daa naŋe."

10 Wääna Yeecüwa tiiŋŋee kä aŋan ye, wiñe ḍiiktin aŋ m’aka Ike baattä ye, kiine ogo, "Ikee kiini a gïtken, Ika batta agä käñon mä Icärayiil ti m’ana luggin yeene tälaŋ aŋŋi ye. 11 Ikee kiine me ḍiirken bi üŋü kä ñomuk ke ŋäjäk aŋ cääjjï därŋañ ammä ti ke Abrayiim, ke Icaak aŋ Yaagüüp Yätkïtïn Polloŋ jï ti. 12 Aŋ merkä mä Icärayiil ḍiirken, yaaka yoku Yätkïtïn a yeenen ye, bi yibjänä me mïïllä gïtï nänṭä ba' ïwok ke ŋeeynä me leken."

13 Aŋ Yeecüwa ḍuuŋgon kääygä kiinne ogo, "Atä! Aŋ bi näŋï ḍoŋe ïkï ti bata yaana lugginii kä ye." Aŋ waan yaanna ti kiingon yeene ṭeññä.

14 Aŋ wääna Yeecüwa ḍakkee kä ti paa ba' Bütürüc ye, i Bütürüc mareyḍe kaññe nïïn ïñï a raac yore ääṭï. 15 Aŋ tamme ïnkïn, aŋ yor äärtäŋene baakkin aŋ juwin ñaalok aŋ Ike näŋgi ginäämkä.

16 Aŋ biigin yaanja ti Ike icki me m’aka cääygene meŋkeekeni ye, aŋ wääktäŋŋi yaacken yaakka ñooṭṭe woo kä jiik, aŋ m’aka a rackä ye ṭeeññe muure. 17 Yaakki ḍääkit yaaka jaayi bäṭo Ïcaaya ye ogo,

"Ike yor carreni yooko koowne

aŋ rackïtïnnï yooko waaññe."

18 Aŋ wääna Yeecüwa ṭoŋ yoorreeda kä Ike ti ye, i baaddoni yeeke ingene ogo iken irco woo koon mooye ti taaŋŋañja. 19 Aŋ nüüto yen jiik ḍoocin yek Jooŋ yaŋkalaŋ äätin aŋ Ike kiini ogo, "Nüüto, nänṭ’a atii kä ye, i Ïkï baaddeni."

20 Aŋ luugi Yeecüwa ogo, "Wiiwkä cääyge kälken, aŋ ḍïïrgä cääyge kurken, aŋ Minneni Mänbaan batta cääyge nänṭä yaana nääkcedee kä wiñe ye."

21 Aŋ baaddo yeene yaŋkalaŋ Ike kiini ogo, "Pïṭo, dalä por ika atä wäyo jïkä ïñï."

22 Aŋ kiini Yeecüwa ogo, "Bäätä Ika ti, aŋ dalä mä tüwïn jïkï mä tüwïn yeeken."

23 Aŋ wääna Yeecüwa kaaccee kä kuun jï ye, i baaddoni yeeke bäätcin ike ti. 24 Aŋ kä ḍeeraŋ aŋŋi jommuwiingä küütïn koon mooye jï, kuun wigde yok a yaana müüñe ye, i Yeecüwa a ooton. 25 Aŋ baaddoni attä Ike cuujgi aŋ kiiṇtä ogo, "Mügdo, mäkkoon ikoon ḍaŋŋa müñon!"

26 Aŋ iken luugi ogo, "Ikee booje ina? Ikee yaaka luggin yeenic ḍeeraŋ ye!" Aŋ juwin ñaalok aŋ jommuwiingä ke koon mooye gerre, aŋ yuuttu ïñï.

27 Aŋ baaddoni witken ḍiiktin aŋ tääjä pääken ogo, "A ŋaani inni? Jiike tiŋtä jommuwiingä ke koon mooye yaanni!"

28 Aŋ wääna Yeecüwa ircenee kä woo baan mä Jadarayïïn koon mooye taaŋŋañja ye, päägi ook kä yew käjä woo kälkä witin cääygene meŋkeekeni. Aŋ wïca baati m’ana kaajit kä päy yaanja ti ye, iken a mä yääññä.

29 Aŋ iken jaajjin kä yääw mooye ogo, "Ïkï ṭäkä ikoon naŋdoon ogoo, Ïkï Minneni Jooŋ? Ïkï äätini winni ikoon joojjon, i waan batta mor ḍägä aŋŋi?"

30 Aŋ kutuŋgu ḍiirken yakkalaŋ bilti kääjï kä cokal iken ti. 31 Aŋ meŋkeekeni Yeecüwa malgä yok aŋ kiiṇtä ogo, "Naana ikoon ñoolcodoon woo ye, ñoolcon kutuŋgu gïtï."

32 Aŋ kiini Yeecüwa ogo, "Ate!" Aŋ kääjin woo aŋ attä kaaccä kutuŋgu gïtï, aŋ kutuŋgu düürjïn ïñï koon mooye jï, aŋ bügjïn piitti aŋ müññü.

33 Aŋ m’aka kääjï kutuŋgu ye buurcin woo, attä baan jï, aŋ me nüütkï kä wakkä yaaka näŋŋä ḍuuggen ye muure, ke yaaka näŋŋä ḍuuggen m’aka cääygene meŋkeekeni ye ti. 34 Aŋ mä baan mooye muure kääjin woo Yeecüwa ti. Aŋ wääna yoorene daa ye, i malgä ogo baannen daljee ïñï.